San Diego in Trump dirpi ah a rak ra mi nu pakhat Ashli Babbitt hna cu Capitol ah meithal kah nak in a nun nak a liam

Nai te cu kum thar kan hngak i kum thar cu a hung chuak, kan rak don, kan rak lomh cio, saduhthah chun mang tam pi he. Zei kar lo ah nai te kan don mi kum cu ni 7 a hlun manh ko cang. Hi chung ah tuanbia zei maw zat ai ttial manh i US thimnak dingfel te i a um khawh ak hnga ti ah San Diego in Trump dirpi ah a rak ra mi nu pakhat Ashli Babbitt hna cu Capitol ah meithal kah nak in a nun nak a liam. US airforce ah rian a rak ttuan bal mi zong asi ve ko na in a ho nih min tthatnak zong peek lo in ui te le ar te thih in a hei thi ko i a thlarau hna zei lam dek a hai panh ve. Kum hlun a thlah tti cio mi kum thar ni 7 chung kan lam zulh ai dan manh tuk ning cu hi hi asi ko, vulei cung cu.

George Flyod timi pa cu thil ttha lo tuah mi record tampi a ngei mi asi. 2020 May thla ah Palik nih an tlaih i a cawltaal tuk ruang ah Palik nih luan deuh in hmual an hman i a nunnak a liam. GF cu Hero an ti i min that nak an peek pin ah a min ah hin ttawhnak (power) a um mi bantuk in an ruah i BLM le Antifa pawl nih GF min an i chaal poh ah zei dah a cang ti cu ho poh nih kan hmuh dih mi asi. Ni zaan i Capitol i thil a cang mi lila zong cu Gf min tthawnnak nih hnu lei in a rak dir kamh mi asi ati mi zong an um.

Donald Trump cu Capitol buaibai hnu ah a social media account vialte an phih piak dih hnu in tuzing cu an van hon piak tthan. A biachimi mi zong an van langh ter i Capitol buainak cu faak pi in upadi lo ning in a cawlcangmi an si caah You will pay the price… ati hna. Faak pi in a mawh chiat hna. Pu Biden nih cun nai Capitol a cawlcang mi cu bia faak ngai in Thug, misual bu ti mi bia hmang in mawhchiatnak bia a chim. Asinain BLM pawl tu cu a hnak kar ah a tenh peng hna i zei tluk in thil ttha lo an tuah i inn an duah thil vialte an hrawk hmanh ah mawhchiathnak bia faak a chim bal lo. DonaldTrump nih cun GF lio zong ah kut aluan mi palik pawl kha faak pi in amawh chiat tthiam tthiam ko hna. Ka chim duh mi cu hi bantuk vulei, hi bantuk society, hi bantuk culture, hi bantuk chan ah khua asa mi kan si hi ho poh nih fiang te in kan i hngalh a hau ti hi asi.

Vulei cung ah cun dinnak taktak hi kan hmu kho ti lai lo. US rampi hi dinnak phunglam fek te i ai tlaih kho cem mi asi caah kum 300 hmanh a upa rih lo na in vulei seemka i a rak um cang mi ram vialte nak in a tthang cho deuh i upat ai hlawh deuh. Asinain vulei fimthiamnak chan ti luan faak tuk in a dawi ruang ah a speed ai tthing kho ti lo i US pi zong tutan cu accident a tong ruangmang ve. US Election pi cu Vulei cung mi vialte hmuh hngaan ah Lam lai ah a ril ko. Vulei cung mi vialte nih tho law tho law ti in an i bochan cemmi an Pathian cio sin ah thla an cam i heh ti ah an au hnawh cio. A pathian ah Media asi minih Media an i bochan i a pathian ah technology asi mi nih Big Tech an i bochan, a pathian ah upadi asi mi nih Court/congress an i bochan i a Pathian ah Pathian nung asi mi Pathian nung sin ah heh ti ah thla an cam ve. Vulei cu Pathian nih minung kut ah a peek mi asi caah a tthawng bik nih teinak an hmuh cu Pathian khuakhan hrim zong arak si mi asi ko.

Vulei cung ah biatak a ttanh mi thlacamtu vialte nih adih um nak in thla cu an cam ve ko na in Jeremiah Johnson nih a chim bang thlacamnak hi a rak tthawng tawk lo, Media le Bigtech ai bochan mi an tam deuh, an tthawn deuh tuk ruang ah Media le Bigtech nih an dir pi mi president nih teinak a hmuh hi a rak si ko. Nikhat chung ah cell phone zei can dah kan hman i zeicandah thla kan cam ti hi pumpak in tuak hna usih law kan i fiang dih ko lai dah. Cucu tutan US Election teinak a hmu tu cu asi. Media President asi caah Media nih thluachuah a hmuh chin chin ve rih lai ti zong zumh asi. Pastor Jeremiah Johnson nih cun mipi sin ah prophet a tuah mi a tlin lo ruang ah ngaih thiam halnak zong a tuah phah. A prophet hawi nih an mawh chiat ve. A ruang cu mipi thlacamtu dai thlan ruang ah asi ko mi kha ngaih thiam hal a hau hme maw ati mi zong an um. President nih a tlin lo ruang ah mipi ngaih thiam hal phun khi asi. A herh kan ti maw ti cio hlah dek.

Ka lung ah a um mi cu. Zei thil hmanh hi an thar peng bal lo. An thar ni in hlun hram ai thok mi lawng te an si. Asinain Khrih chung i a um mi cu an thar peng (2 Kor 5:17). Cu caah hlun kho lo i thar peng kan duh ah cun Khrih chung ah um i zuam ko hna usih. Khrih chung i na um ah cun. Na hrin tthan, Na tha a nuam peng lai, Na um a har kho lai lo, Zei poh hi a ttha lei kap in na hmu kho peng lai, Lung dongh nak khua na ruat duh lai lo, Pathian na thangtthat huam peng lai, Caan lawngkang na ngeih chun Bawipa he hman na huam lai, Nai lawm kho peng lai, Na thar peng lai, na hlun kho lai lo. Dinnak a ttanh mi le dinnak ruang ah nunnak tiang a pe mi hna upat peek bu in. Credit: Salai Bawiukthang Cinzah