Salai Van Lian Thang Nih Dr. Lian Hmung Sakhong A Comment Mi Cu A Turu Bak Ko

A ttha tuk! Ngasa petu nakin nga tlaihdan chimtu kha an biapi deuh tawn. “Great leader create more leaders, not followers” tiah an ti. Tulio vawleipi hi Baby boomers chanchuak (1946-64 kar chuak) Trump, Biden, Putin, Boris, Modi, Suu Kyi, Xi Jinping, Angela Merkel tbk nih an hruai lio asi. Chin miphun tu hi cu atlangpiin biaknak le ramkhel hruaitu deuh hi Generation X chan (1965-80 kar chuak) deuh nih an hun hruai lio asi. Tu hi Millennials chan timi Generation Y chanchuak (1981-96 karchuak) nih zeitik kan chan a phak lai tiah a hun naih cuahmah. Gen. X nih zultu si loin zeibantuk Gen. Y hruaitu phun dah nan hrin hna lai i nan chuahter hna lai, timi hi a biapi ngaimi asi. Cucu pakhatnak. Kawl nih an tuah tawnmi “Literacy Talk” timi khi a ttha ngai. Tukum thimnak Electoral Politics nih fiang tein a hun langhtermi cu: Seminar, Workshop, Training, Consultation, Literacy Talk tbk awareness programs a phunphun kan tuah ahau timi hi a hun si. Constitutional knowledge, Federal Education, Right Based Approaches tbk. a phunphun a hun hau. “History without Political Science has no fruit. Political Science without History has no root” tiah an ti.

History hrim hi ttha tein theih kan hun hau hna. Tulio a kan hruaitu Generation X chanchuak nih “empower” tuah lei in nan kan hruai hi a hau. Cucu pahnihnak. WW II hnu New World Order tharah The UN Charter (1945) ah “Equal Rights and Self-Determination of Peoples” timi le “Decolonization Policy” a rak um cang. Hi vawlei chantiluan “New World Order” le “Nation Building Concept” kha Vai hruaitu Nehru, Kawl hruaitu Aung San le Naga hruaitu AZ Phizo tbk nih cun an rak tlaih khawh cang. Cucaah India nih Independence a lak lai nikhat aa duhah “Naga Independence” cu vawleipi theih in AZ Phizo nih a thanhpi hmasa hna. U Aung San nih hi New World Order tiluan a rak tlaih khawh ve ruangah “kum khat chungah independence kan pek lai tiah na thanh hrimhrim a hau” tiah Mirang cozah cu a nor colh ve ko, cuticun 20 December 1946 ah PM Attlee kha Parliamentary Announcement a tuahter ko, ahnu London an va kal kha cu Kawlram independence hmuh ding a fiang cia dih cangmi kha asi ko.

Chim duhmi: WW II hnu New World Order le Nation Building Concept hi kan pupa hna nih ttha tein rak tlai kho ve hna sehlaw tuni Chinram hi ram pathum ah aa chuah lai lo. “Kan tthen sawh hlah uh” ti hmanh a chim zia kan rak thiam lo kha cu ruahtthan ahhin lung a fak! Tulio Generation X a kan hruaitu le hna nih Aung San, Nehru le Phizo hna bang khan tuni vawlei chantiluan he milin nan kan hruai khawh hi a herh ngaingai ko. Nation-Building Workshop bantuk hi Chinmi ah a voi 1nk asi men lai. A ttha ngaingai. Rang ngaiin aa thlengmi vawlei ramkhel tiluan he milin kan miphun tunmernak rian hi kalpi thiam a hau ngai ko. Cucu pathumnak. CNF nih Chin State ati bal lo. “Chinland” timi biafang a hman tawn. Cu “concept” kha tampi in chim a hau i karhter le lianter hi a hau. Tuni khuachhak le khuathlang vialte hi Chinland cu an si, kan ram le vawlei dih an si. Chin State cu 13,907 square miles lawng a kau. Chinland timi (Mizoram, Manipur, Tripura, Chittagong Hill, Nagaland) cu 35,000 square miles (90, 649 Sq. Km) leng a kau, cucu “kan ram le kan vawlei” tiah kan auh khawh dihmi an si.

Tuni vawleicung ram 85 nakin Chinland hi a kau i a ngan deuh. Zogam zong kan ram, Zoram zong kan ram, Mizoram zong kan ram, Lairam zong kan ram, Chinram zong kan ram timi concept hi tampi seino thinlung chungah a luh a herh ko. Mizoram i ramkhel party khi cu: Zofate inpumkhatna (Chin hrinfa vialte lungrualnak le ipumkhatnak) timi hi an itinhmi kawltung pakhatnak ah an chiah ngawt. Khuachak lei tu hi cu kan unau hna hlamnak le kawlnak lei siloin Kawlrawn lei tu hi kan thinlungput a luang deuhin a lang tawn. Hihi lehthal a hau i ”Chinland concept” hi tampiiin Generation X chan hruaitu hna nih nan kan chimh hi a hau. Cucu palinak. MNF founder Pu Laldenga nih MNF dohtlennak cu “Mizo Nationalism le Vai Nationalism idohnak asi” tiah a sullam a fianter.  Tulio MNF hruaitu Pu Zoramthanga (2017) nih nai ah cauk a chuah, “Mizo Hnam Movement History (A History of Mizo Nationalism Movement)” tiah a cauk min a pek. “Mizo Nationalism” timi hi ralttha tein an chim zungzal i an dohthlennak zong “Mizo Nationalism Movement” an ti, cucu mino hna thinlung chungah thlaici an tuh, ti an toih, an nunter, an kheuter i, kung nganpi ah an hun chuahter khawh.

MNF an legacy nganbik cu Mizoram Peace Accord (1986) le Mizo Nationalism hi a hun si. Cu an tuhmi a theipar cu: Vai nih zeitluk an lian i an tthawn zongah a zeitihmanh in ILP an hrawhpiak khawh ti lomi hna le Assam nih ramri pekhat zong an det khawh ti lomi hna hi asi ko. Chinmi zatlang lakah “Chin Nationalism” timi biafang chim hi a rak har ngai tawn. Hruaitu tampi hna hmurkaa zongin “ Chin nationalism” timi biafang hna hi a chuak duh sasai tawn lo. Kum 10 leng ka chim cang i, cabia tampi ka tial, a phunphun in dehcawh hna ka tong theo. Nain, apoi ka ti nemmam lo! Tuni cu “Chin nationalism” hi zapi hmai chim ngam lomi biafang a hun si ti lo, ralttha ngaiin le uangthlar ngaiin zatlang ah aupi cuahmahmi biafang ah a hun ichuah cang! “Chin Nationalism” timi biafang officially tein a hmang hmasa bikmi cu naiah buu a hun dirmi Chin National Organization (CNO) kha an si. Kan ilawm ngai.

NCA process hi zei cantiang a kal lai kan thei kho hna lo caah zei saludah kan hruaitu le nih nan hun tlunpi te lai timi kan thei kho rih hna lo nain Generation X chan kan hruaitu le hna nih a ra dingmi chanchuak Generation Y, Generation Z le Generation Alpha chanchuak pawl hna kutah salu nganbik nan tlunpi ding le legacy nganbik chiahtak dingah nan kan tinhpi dingmi cu “Chin Nationalism” thlaici tuh hi asi ko. Cucu a hram fek tein nan kan tuhpi khawh ahcun Generation Y chanchuak pawl nih kung nganpi asi tiang an hun pehzulh conghramh ve ko hna lai. Cu lawngah kan ram le vawlei hi a ra laimi generations (Gen. Y, Gen. Z le Gen. Alpha chanchuak) hna chanah him tein kan chiah khawh te hna lai. Cucu panganak asi. Ka comment sau tak 🙂 Credit: Salai Van Lian Thang

Leave a Reply

Your email address will not be published. Required fields are marked *