Salai Pa Hmun hi a min ka hngalhnak cu a sau cang!
Salai Pa Hmun
==========
Salai Pa Hmun hi a min ka hngalhnak cu a sau cang. 2017 Australia ka tlawn lioah kan rak i tong. Coffs Harbour ka caam lioah CNA/F rianherh in a hong tlawng. Khrihfabu ah kan pahnih in biachimak kan rak ngeiṭi. A voikhatnak kan i hmuh a si caah biaruah kan cim lo. Muko mekazin kong, Lairam kong in Kawlram kong tiang zan khuadei deng bia kan rak rak i ruah. Hihi kan i hmuh hmasa bik a si i a hnu bik zong ah a cang ai ne.
Salai Pa Hmun hi Australia kan i ton hnu in Muko ah caṭial ka sawm i voi thum a kan ṭialpiak manh. 2020 December Muko mekazin ah “Colonialism, Ṭhanchonak le Holh” tlangtar in a ṭialmi hi a hnu bik a kutneh a si. Cathiam le carel a si bang capar pical; reltlak le relphu, a kan ṭialpiaktu a si. Muko lawng si loin mekazin le cauk dangdang ah ca pipa a ṭial tawn.
2019 ah an nu (Sayama Nguri) he Europe an tlawng (a cung hmanthlak hi Europe an tlawn tan hmanthlak a si). An phanhnak Europe hmun ropui le an tuanbia tete Kawlholh in facebook ah rel nuam le rel tlak ngai in a rak ṭial/tar, tlolh loin ka rak rel. Thil a hngalh lawng si loin caṭial thiam bak pei a rak si hi ti a ka fianter chinchin.
Email le messenger in ca kan i kua, bia zaza kan i ruah tawn. A hnu bik kan biaruah hi tukum January 6 ah a si. Capar a ṭialmi tete khawm in cauk chuah a duhnak kong le a ngandamlonak kong a ka ruah (a cung hmanthlak tarmi khi). Kan biaruah le saduhthah aa lim hlan ah ni bang a kan liamtak ruangmang hi a si ee. A tanglei a kong tawi hi, 2020 December Muko mekazin a capar tang ah kan tarmi a si (amah kuat ning in). Amah upatnak le thlahnak ah ka hun tar ṭhan.
Salai Pa Hmun cu Matupi peng Siatlai khuami a si. University of Rangoon in B.Sc. (Maths), Busk (Hons), M. Phil. (Maths) a awng. MIT (Insein) in B.R.E. le Curtin University of Technology in Graduate Certificate of Tertiary Teaching a awng. PhD candidate (Mathematics), Swinburne University of Technology. University of Rangoon ah Tutor, Magwe University ah Assistant Lecturer a rak ṭuan.
Cu hnu in, Curtin University of Technoloy, Saraw (Malaysia) le Swinburne University of Technology ah ah Parttime Lecturer a ṭuan. Atu lio hi Community Liaison officer, Westjustice, Interpreter a ṭuan lio a si. A chungkhar he Melbourne (Australia) ah an um—Muko, 2020 Dec. Ka u Pa Hmun, na ngeihmi ceunak dihlak chuah in vawlei ah na ceuta. Liam siaherh lo tein. Na nau, Joel Ling.
CNF, Australia Regional Committee Chairman asimi Saya Pa Hmun nih tuzing ah pumsa damlonak in hi vawlei nunnak in Melbourne khua ah a kan liamtak. Hopoh kan lung a kuai, kan ngaih a chia. Atubantuk dohthlennak caan chung, thazaang le ruahnak chuah kan herh lio i a kan liamtak ko hi tuar a har khun.
Keimah caah cun; ka pa bantuk, ka hawi bantuk, ka saya bantuk, miphun kongkau ah lam a ka hmuhsaktu, thazaang a ka pe pengtu asi. Kan iton le phone kan ichawnh ahhin kan bia a cat kholo. Miphun Party, Miphun Dohthlennak, Miphun rian le Miphun lungrualnak ti pawl ah hmai a fongmi nationalist pakhat asi. Amah konglam le kan ipehtlaihnak hi tial cawk asilo. Tuni cu kan rak tlawnlennak le kan riantuntinak pawl ruat than in, a zuun tuar a har hringhran. Saya, Bawipa taangnem ah daite in vai din chung ai ne mu.
Saya Pa Hmun nih tuan tukin a kan liamtak cu kan miphun caah sunghnak ngaingai a hun si. Chinmi lakah a zatawk fimcawnnak a ngeimi educated pakhat asi lawng siloin tulio a kakip in kan miphun a hruai liomi Generation X chanchuak hna lakah kan arfi ceu pakhat asi ve lengah Kawlram ramkhel tiluan ṭha tein a pemhmi le Chin miphun ramkhel a ṭanh ngaingaimi kan pasalṭha asi.
Ramkhel dirhmun le tiluan kan thlirning le hmuhning a luangti kho ngai tawn i, kum zeimawzat hmunkhat ah a dirti tawnmi zong khi kan si. Miphun a ṭanh ngaimi Saya Pahmun bantuk mithiam pakhat a hun bau lai hi ka ui ngaingai. Pumsa in kan kaltak chung hmanhsehlaw miphun a dirpinak bia le hla hna le cabia hna cu a zungzal in an rak nung peng lai. RIP Saya Pa Hmun.