Salai Ceu Bik Thawng: Mipi Lamzawhnak Dirpi/Telpi Hna Usih!

Mipi Lamzawhnak Dirpi/Telpi Hna Usih!
===================
1. Tuchun Halkha an cawlcanghnak cu lung a hmui taktak. Salai Ngun San Aung , Salai ElishamaTN le hruaitu hna le aa telmi mipi nan dihlak upatnak kan pek hna. Yangon le hmunkip lamzawhnak ah telpitu Chin mipi nan dihlak zong upat kan pek hna.

2. Thaizing zong Halkha lawng si loin Thantlang ah lamzawhnak an thawk cang lai. Mipi kan dihlak nih dirpi hna usih law telpi cio hna usih.Cun hmunkip dangkip um zong nih kanmah le kan umnak cio in lamzawhnak siseh adang a lamkip in ralkap uknak dohnak ah kan si khawh tawk in i tel cio hna usih.

3. “Keimah pakhat thamcu kai tel lo zongah a poi lo, midang nih an tuah ko lai” timi ngei lo tein “keimah kai tello ahcun a si kho lo” timi lungput ngei in hi mipi cawlcanghnak ahhin itel cio hna usih.

4. Pumpak in lamzawhnak ah aa tel kho lomi zong nih kan thlacamnak in siseh, kan ngeihchiah chawva in siseh, democracy le ralkap uknak kan duhlonak kha langhter cio hna usih. Phelhsolhnak umlo tein kan itel khawh cionak lam hawl hna usih.

5. Hi ralkap uknak dohnak hi lamzawh lawng si loin a lamkip in a tuahtu an um—kan Chin miphun chung zongah. Sianghleirun sianghngakchia zong Petition Letter timi cozah sin tialnak in siseh, DAWR nei zong nih dawr kharnak in siseh, Rampi Riantuantu(civil servant), a bik in kan sibawi pawl le ngandamnak riantuan pawl zong nih nuarnak tuahnak in siseh, a lamkip in an cawlcangh kan hmuh hna i lung a hmui khun. Hi pin zongah a lamkip in cawlcanghnak phun dangdang zong timhlamh asi ko.

Rampi nawlngeihnak cu mipi sin in a rami asi tiah atu nawlngeihnak a tlaitu ralkap lila nih naite i an cathanh ah an phuan. Cucaah rampi nawlngeihnak surlu (sovereignty power) hi mipi sin in a tihna a putmi asi bang mipi sin ah nawlngeihnak a phanh tthan hlan tiang raltha tein dirti in nawrti ko hna usih. Upatnak he, Salai Ceu Bik Thawng