Salai Bawi Lian Mang: CHRO Nih Hin Myanmar National Human Rights Commission Hi Kan Rak Ton Hna

CHRO Meeting With Myanmar National Human Rights Commission (MNHRC). CHRO nih hin Myanmar National Human Rights Commission MNHRC hi kan rak ton hna. Tuandeuh pi 2013 lio ah.

Kawl cozah nih Chin Kharihfa mihna cung ah namnetnak, cozah phaisa, cozah nawlneihnak le ralkap thazaang hmang in biaknak mithlawm deuh asimi Chin Kharihfa an kan namnet nak cu ttha te in research kan tuah I report kan ttial. Cu report kan ttial mi cu chiah sawhsawh lo in Europe, US, Canada le UN sin ah kan kal pi.

Kan ca ttial mi le kan chimmi ttha te in an ngaih hnu ah UN nih ram pakhat cung ah biachim nak nawl anei in a chiah mi “UN Mandate Holder” upa panga nih Kawl cozah I president Theih Sein sin ah CHRO nih Chin Kharihfa mihna sin ah namnet nak nan tuah mi kong ah UN kan sia aherh. Hi kong he pehtlai in Burma cozah nih UN sin ah chimfian nak nan neih ahau tiah an ti. UN Mandate holder panga hna cu UN Human Rights Special Rapporteur on Burma, UN Special Rapporteur on Indigenouse Peoples, UN Special Rapporteur on Freedom of Religion and Belief, UN Special Rapporteur on Minority Rights hna an si.

UN mandate holders 5 nih President Thein Sein Sin ah ca an ttial tik ah um sawhsawh awk a ttat lo caah President Thein Sein nih Myanmar National Human Rights Commission cu CHRO nih achim mi hi adik mi asi le silo hlat ding ah afial hna.

President nih afial hna bantuk in MNHRC nih cun Na-Ta-La Siangin pawl I cozah nih sianghngakchia an chimh cawnpiak ninghna le thil sining dangdang an hlat. Geneva UN lei nih thawng an kan thanh mi cu President Thein Sein nih MNHRC kha CHRO nan report kong he pehtlai in hlathlai nak a tuah ter hna ti kha an kan chimh. Cu caah cun NMHRC cu nan va hlathlai mi nan hmuh ning zeitin dah asi ti hal ah le CHRO kan dirhmun va chim ah kan va ton hna.

Tthate in MNHRC nih cun an office ah an kan ton. Commissioner pa kha Diplomat hlun asi tik ah apanh ngai I mi chonh biak a thaim ngai. Cu kan iton nak I an chim mi cu CHRO nih UN, US, EU le Canada sin I nan chimmi vialte hi a dik mi lawngte asi. President Thein Sein nih a kan fial bantuk in kan hmuh ning cu President sin ah ca kan ttial cang tiah a kan chimh.

Cu bantuk in UN mandate holders pawl nih hlathai nak tuah ding in ram pakhat kha an hal ah cun hlathlai nak an hmuh chuahmi kha zapi theih ding in leh nak tuah phung asi. Cu caah cun Kawl cozah nih zapi theih in MNHRC nih an hmuh ning an ttial mi cu an chuah te lai tiah kan hngah hna I atu tiang an chuah duh lo. Tuandeuh ralkap uknak chan lio I Kawl cozah nih UN I athlah mi palai pawl cu zaangfak lei khi an si. Vawlei pi nih UN ah an den lengmang hna caah UN meeting kai cu an caah cun vawlei pi hmai I hmualphoh bantuk khi asi.

Hi bantuk in MNHRC nih Chin miphun telh in Union of Burma ram chung I a um mi biaknak le miphun sinak in mitlawm hna hi a kan runven khawh lo caah Chin State ah hin kan mah te in Chin State Human Rights Committee kan ser lai timi cu CNF le Union of Burma bilateral agreement ah ai tel. Mah cu Chin State Human Rights Committee adir khawh ding cu a biapi ngaingai mi asi.

Biapehpar ah; Meeting I kan chuah pah ah commission I ai tel ve mi Kachin pa nih UN le international tiang fakpi in nan kal kho I a tha tuk a ka ti. Kachin ka si aka ti caah Kachin holh ka thiam chun in ka chonh I alawm ngai. zeitin dah Jingphawh hol na thiam aka ti i. Kachin ram ah ka um bal ka ti. Zeidah na rak tuah aka ti i Tapung ka rak ttuan ka ti. Tih nung in a ka ti i, Chin holh ka thiam ve a ka ti I zeidah na thiam mi cu asi tiah ka ti I anih pah in “ Nang pen Kawlte that ding maw” a ka ti I kan ni len. Kawl pawl nih an kan zoh len. Credit:Salai Bawi Lian Mang

Leave a Reply

Your email address will not be published. Required fields are marked *