Maungdaw Peng Ah SAC Ralkap 90 Hrawng Nih An Hriamnam An Chiah I AA Sin Ah An I Ap. Myanmar–Bangladesh ramri Rakhine ramkulh, Maungdaw peng, Tamanthar khuakomh ah SAC ralkap 90 hrawng nih nizan March 25 ah hriamnam an chiah i AA sin ah an i ap, tiah tualchung mi nih an chim.
“Tamanthar khua sakhan ah cun SAC ralkap 120 leng an um i ralbawi cheukhat telh in minung 35 cu sakhan chuahtak in an zaam nain a taang mi minung 90 hrawng nih nizan March 25 chun ah an hriamnam an chiah, sakhan cu AA nih a ningpi in an uk,” tiah Tamanthar khua mi pakhat nih a chim.
AA nih March 24 ni thawng an thanh mi ah cun, Tamanthar khua SAC ralkap sakhan laak ding in kan kah cuahmah i sakhan in a zaam mi SAC ralkap pawl zong kan dawi hna i minung 20 hrawng an thi, tiah an langhter.
Rakhine ramkulh chung thla 4 leng i kahdohnak ah Mrauk-U, Kyauktaw, Minbya, Myebon, Ponnagyun, Pauktaw, Ramree le Chinram thlanglei Paletwa khuapi an laak khawh cang. The Chin Post
Thawngpang dang: Cun March 24 ah Kama khua ah a rak phan mi SAC ralkap riahcaw phor mawtaw in ralkap 100 hrawng cu Myaing peng, Twin-ma khua ah ke in an luh lio ah zinglei sml 7:00am in zaanlei sml 5:00pm tiang bom lung 50 leng an thlak hnawh hna caah SAC ralkap 4 an thi, 12 hrawng an i hliam tiah theih a si.
Kahdohnak chung ah Myaing PDF B01, Wolf Guerilla phu, MRTF, Black Cobra, PKU-ThuRein, Kamma Underground, PPDF, DMG, Freedom Frighters, Pauk PDF, Earthquake Defense Force, Young Force, Black Ceetah le adang dothlennak phu pawl an i bawm hna tiah theih a si. CBN Daily News