SAC Ralbawi Pahnih Nih Aung San Suu Kyi Cu Thonginn Ah An Va Ton
==============
Uknak a latu SAC ralbawi pahnih Lieutenant General Ya Pyi le a pension cang mi Lieutenant General Khin Oo hna nih Aung San Suu Kyi cu a tlaknak Naypyidaw thonginn ah May 27 ni le June 4 ah khan an rak ton, tiah The Irrawaddy nih a ṭial.
SAC ralbawi pahnih nih cun Aung San Suu Kyi cu atu lio ramchung thilcang kong an va chimh pin ah PDF pawl cawlcanghnak donghter ding in an chimhruah, tiah theih a si. Aung San Suu Kyi nih Lieutenant General Ya Pyi le Khon Oo cu zeibantuk bialehnak hmanh a pe hna lo, tiah theih a si.
Sagaing ramṭhen, Mingin peng, Ain-kyin-taung khua um ralhrang pyusawhti pawl sakhan pakhat cu tualchung hriamtlai nih luhhnawh in kan kahdoh hna caah SAC ralhrang pakhat telh in 5 kan tlaih hna, tiah Student’s Revolutionary Force(S.R.F) nih June 12, nihin ah cathanh an chuah.
A luancia June 8, zinglei suimilam 4:30 tluk ah Student’s Revolutionary Force(S.R.F) nih luhhnawh in an kahdoh hna hi a si. Kahdohnak ah phyusawhti ralhrang 3 an thi i, SAC ralhrang pakhat telh in 5 tlaihkhih an si, tiah an langhter.
Hi kahdohnak ah Carbine M-2 meithal zuun 1, 4.8 meithal zuun 2, kah-pah-sah nih a serchuahmi meithal zuun 1, 4.8 kuan 63, 0.30 kuan 114 le phone 3 zong kan laak chih khawh, tiah cathanh an chuahmi ah an langhter chih. Magway ramṭhen, Salin peng, Thayettaw palik sakhan pakhat cu a luancia May 10, zinglei suimilam 3:00 tluk ah PDF ṭangṭi phufonh nih luhhnawh in an kahdoh hna caah SAC ralhrang bawi pakhat telh in 12 an thi, tiah theih a si.
June 11, nizan zinglei suimilam 8:00 tluk ah palik sakhan ah ca an taarmi pawl cu ralhrang nih an laak dih hnu ah cuka hmun cu an chuahtak dih, tiah theih a si. Hi kahdohnak ah PDF ṭangṭi phufonh nih ralhrang sakhan cu an la kho manh lo. PDF nih luhhnawh in kah an timhmi hna an theih manh caah hlankan in ralhrang pawl timhlamhnak an rak ngei manh cang caah atu bantuk in mipi ralkap lei hnu lei an tolhnak ruang a si, tiah Khit Thit nih a langhter.
Tualchungmi pakhat nihcun “Palik sakhan kahdoh lio ah hin SAC ralhrang bawi pakhat a thi pinah a thimi dang zong an tam ngaingai. Palik sakhan uktu (sakhan hmu) zong a phei ah kuan nih a khen i hliam a pu ve. Mipi hna nih ziah sakhan nan chuah taak tiin an hal hna nain zeihmanh an chim duh lo” tiah a chim.