SAC Ralhrang 30,000 Tluk An Thi Cang Tiah NUG Cozah Nih An Langhter
————
National Unity Government (NUG) cozah dirh ni thok in kum 2 chungah SAC ralhrang a thimi 30,000 tluk an si cang i 10,000 leng hliam an tuar tiah NUG cozah nih May 3 thanh ca an chuah mi ah an langh ter.NUG cozah kum 2 tlin camtuak cathanh chuah mi ah an langh ter hi a si. Hi kum hnih chungah PDF phu 300 leng le khua humhimnak kongkau mipi vengtu ralkap (Pah-kah-phah) phu 250 leng dirh a si nak kong le SAC ralhrang nak in thazaang kan thawng deuh.
Mah pin ah uknak tha lo duh lo ruang ah SAC ralkap chung in 13,000 leng mipi sin ah an i fonh cangnak kong le NUG cu tlangcung hriamtlai phu cheukhat hna he tangti in pakhat le pakhat i pehtlaihnak Committee C3C le J2C zong dirh in hmunkhat ah rian an tuan tinak kong zong an langh ter chih.
Thailand Ram Ah Phungning Lo Lut Myanmar Mi Ngakchia Telh In Minung 30 An Tlaih Hna; Thailand ram Chin-yan pengkomh ah phungning lo Myanmar mi kum 5 ngakchia telh in minung 30 hna cu Thailand ram palik tuanvo ngeitu hna nih an tlaih hna.Aluan cia May 3 zan suimilam 9 tluk ah motor pahnih in ramri lonh in an luh lio ah an tlaih hna hi a si. An tlaih mi hna hi kum 24 in kum 45 kar Pa minung 9, kum 18 in kum 40 kar Nu minung 10, kum 5 in kum 15 kar ngakchia minung 11 an dihlak minung 30 an si.
An tlaih mi hna hi, Thailand ram chung luhkhawh nak card a nei mi an si ko nain an luh khawhnak hmun le hma ri an lonh caah an tlaih hna hi a si. An tlaih mi hna hi Shan ramkulh chaklei um mi deuh an si hna.Aluan cia April thla chung lawng ah Thailand ram phungning lo lut Myanmar mi minung 400 leng tlaih an tong tiah Thailand ram Media pakhat nih a langh ter. Hi thla chungah voi 12 phungning lo lam in an rak lut i minung 185 cu Rakhine ramkulh in a ra mi an tam.
Myanmar ram buai ruang ah hlawhfa awk rian a har i mitam deuh cu Thailand le Malaysia ram hna ah phungning lo in a kal mi an tam. Thailand ram kalnak ah minung pakhat nih Myanmar tangka sing 16 in sing 40 tiang Puaisa sin ah an pek hna tiah kan theih.
Kum Tlinglo Ngakchia Telh In Tleihhrem Le Thahnak Kong Ah Sualnak Tuahtu Pah-Kah-Phah Minung 4 Dantat Ding In NUG Nih Thawngthanh; 2022 August 30 Sagaing ramthen Chaung-u pengah SAC ralhrang sin ah thawngpang petu hna tiah puh in kum tlinglo ngakchia telh in minung 7 tleihhrem hnu ah a that tu Pah-kah-phah chungtel minung 4 hna cu dantat dingin kan tawlrel lio an si tiah NUG nih May 4 ah thanh ca an chuah.
SAC ralhrang sin ah thawngpang pe tu tiah puh mi minung 7 hna cu 2022 August 8 ah Chaung-u Pah-kah-phah nih an rak tlaih hna i August 30 ah phungning lo in an rak thah hna hi a si.Hi konghe pehtlai in Pah-kah-phah minung 4 cu tualchung PDF nih 2022 August 30 ni lila ah an tlaih hna i August 31 ah an thah mi hna ruak cu an hlai than hna hnu ah check hlatnak an tuah.
Lainawng mi minung 7 hna cu 2022 September 22 ah Chaung-u PDF kut ah an chanh hna hnu ah a dang tein an chiah hna. 2023 January 26 ni in zarhkhat chung NUG cozah tuanvo ngeitu zung hna nih phungning in dandat ding in an tawlrel lio hna a si.
Mah pin ah hi tuahser nak cu NUG cozah nih a ngeih mi, mipi ralkap ukhrauinak phungphai (Code of conduct) he aa kalh mi a si pin ah nuhrin covo buar nak kong le nu le ngakchia cungah an limhang thlak le dawhcah lo in tuahsernak kongkau upadi ningin tawlrel lio le an cungah dandat nak pek mi kong zong a rauh hlan ah mipi theih in thawngthanh nak kan tuah than lai i sualnak a tuah mi poah NUG cozah nih thleidannak um lo in upadi ningin dantat an si lai nak kong cathanh chuah mi ah an langh ter chih. Credite; Lungmili Post.