SAC ralhrang pawl cu technology leiin an sang chinchin cang ko!!

Facebook Kan Phih Lai i Social Media Platform Thar Kan Ser Lai By SAC Ralhrang
==============================
Myanmar ramchung mizapi nih kan hmancem mi Facebook cu kan phih lai i Social Media Platform pakhat a aiawh ah kan ser lai, tiah SAC chimphuannak nawlngeitu General Zaw Min Htun nih nihin thawngfianhnak ah a chim. SAC nih thawng an thanhnak MRTV, MWD hna le ralkap nih mizapi lungtuaitamnak ah an hman mi page le account hna cu facebook nih a rak phih dih hna caah atu bantuk in SAC nih social media platform thar ser ding in timhlamhnak an ngei, tiah ruah a si.

Social Media Platform thar ser nakding ah thiamsang pawl le SAC ministry pathum i fonh in kan ser lai, tiah General Zaw Min Thun nih cun a chim chap. SAC nih Social Media Network thar ser an timhmi cu sullam um lo tuk mi a si, ser kho hmanh hna seh law mizapi nih an hmang duh lai lo. Facebook an phih khawh le phih khawh lo cu phundang, Platform dang a tamtuk. Ralkap sermi Platform hman kan herh lo, tiah min langhter a duh lo mi pakhat nih cun a chim.

Social Media kong ah SAC nih Facebook cu kan phih ko nain kan hlawh a tling lo. SAC ralkap video le an thawngpang cheukhat cu facebook nih a rak hnawhpiak caah General Zaw Min Thun nih cun Facebook a mawhchiatnak a rak chim bal.

SAC nih cun uknak an lak hnu in Cyber Security Upadi ser in Phone ah VPN(Virtual Private Network) aa chiah mi pah cu kum 3 thong thlak ding in nawl an rak chuah. Tukum January thla thawk in VPN Application cu chek hram an thawk fawn. Myanmar rampi dirhmun in Facebook hmangtu milu hi 19.25 Million an si, tiah Data Reportal Website nih February (15) ah a tarlangh.

Relchap, Zahnak Area Chung Ah Ramvaihnak Scope Hmang In Ramvaih/Vakah Le Lenkhang In Va Rapchiah Kham A Si Cang!
CDF-Thantlang control Area pakhat a si mi Zahnak Area chung ah Zahnak Youth Association le Khuabawi hna hnatlaknak in Area chung ah scope bunh mi zen/kuan meithal phun he ramvaih le vakah siseh, lenkhang zar in varap chiah (lochung riit khamnak telh lo) khap a si cang, tiah theih a si.

“Cu hlan cu ZYA le Bawitlang nih an khap nain hmalaknak ai ruan lo ruang ah Police sin ah ap a si cang caah, Police nih hma an lak cang lai. Scope bunh mi meithal/air-gun cu hmuhnak poh ah chuh an si lai i, lenkhang varap tarh cu hrawhpiak an si lai,” tiah Department of Information Director- PATZA (PATZA- Public Administration Thantlang-Zahnak Area) nih The Chin Post ah a chim.

“Hi bantuk kan tuahnak a ruang hi atu lio Lai khuate lei ah lenkhang zam in va rapchiah ruang ah siseh, airgun scope bunh in vakah hman tuk ruangah sa-va an an har ngaingai cang i, mipi lei duhsaknak ruang ah a si” tiah a chimchap.

Thailand Ram Motor i Lehnak Ah Chin Mi Pakhat Le Myanmar mi 2 An Nunnak A Liam! Thailand ram ah tanglei lam in a lut mi Myanmar mi hna nih an i citmi motor pakhat cu nihin August 17 ah aa let i, Chin mipa pakhat telh in minung 3 an thi, tiah theih a si.

Cu motor chung ah cun phung ning lo in a lutmi Myanmar mi 33 an i tel i, cu an i citmi motor nih cun thingkung pakhat a suk sual caah minung 3 an nunnak a liam i, 4 hliamhma an tuar, tiah theih a si. Motor i leh ruangah nunnak a liammi Chin pa cu Kalaymyo, Indaikung(အင်ဒိုင်းကုန်း) sang ah a ummi Pu Hu Lian, kum 20 a si. Pu Hu Lian nih cun a nupi le kum khat tluk fanu pakhat a taantak hna. A ruak cu a chungkhar nih an umnak hmunram ah kirpi ding in an tawlrel lio, tiah theih a si.

Aa khongmi hna cu Thailand ram ṭuanvo ngeitu hna nih thlopbul ding in sizung ah an kalpi hna, tiah theih a si. Aa khong lo mi cheukhat le motor khaltu cu an zaam caah Thailand palik nih an kawl hna, tiah theih a si. Rohingya Ralzam Hna Cu Pehtlai In Bawmhnak Kan Pek Hna Lai – Michelle Bachelet, Bangladesh ram Rohingya ralzam sin ah a phanmi United Nations High Commissioner for Human Rights, Michelle Bachelet nih cun tu lio thilman kai tuk ruang ah harnak a tong cuahmah mi Rohingya ralzam hna cu vawlei cung ramkip hna nih bawmhnak pek cio ding in nawlnak a tuah.

Hpapun Pengkomh Thlacheu Chung Kahdohnak Ah SAC Ralkap 40 Leng An Thi, KNU brigade 5 hmunram, Hpapun pengkomh chung in August thlacheu tiang ah kahdohnak voi 53 a chuak i, cu kahdohnak chung ah cun SAC ralkap le BGF 43 an thi, 17 hliamhma an tuar, tiah KNU brigade 5 nih cathanh an chuah.

August 1 in August 15 tiang KNLA le SAC ralkap/BGF kar a chuakmi kahdohnak kong cu KNU nih nihin August 17 ah an langhter i, kahdohnak chung ah KNLA chungtel pakhat a nunnak a liam, tiah an langhter. Kahdohnak chung ah hmunhma rilonh in cawlcanghnak a tuahtu SAC ralkap le BGF hna nih khuate lei; Lei le dum chung hna cu tinhchih in kahdohnak an tuah caah tualchung mi 2 hliamhma an tuar, tiah KNU nih an thanh.

Ngatahmio Khua Cu SAC Ralkap Nih An Khangh Caah A Khua Ning In A Kaang!: Magway ramṭhen, Yezagyo peng Ngatahmio(ငတမျှော်) khua cu nihin August ni 17, zing suimilam 10 hrawng ah SAC ralkap le Pyosawhti i bawm in an khangh caah a khua ning in a ciam dih, tiah khuami pakhat nih a chim.

Khuami pakhat nih cun, “Nihin tiang ah kan khua ah kahdohnak zong a chuak bal lo, a ruang um loin an khangh, atu hi an khangh cuahmah lio a si caah khuachung kan lut ngam rih lo. A thimi le hliamtuarmi an um le um lo zong kan thei rih lo, tualchung hriamtlai phu nih an kalhnawh lio a si,” tiah a chimchap.

Ngatahmio khua cu inn 600 hrawng umnak khua a si i, khuami pawl cu an khua ning in a himnak ah an zaam, tiah theih a si. A luancia August ni 11 zong ah SAC ralkap pawl cu khuachung ah an lut i, thilri zeimawzat an fir pin ah cycle 11 zong an rak khangh, tiah theih a si.

Rohingya ralzam hna nih him tein an umnak ṭhing an kir khawh ṭhan nakding ah kan i zuam lai. Rohingya ralzam hna nih cun an umnak hmun kir an duh tuk hna nain Myanmar ram mi sinak(identity) an pek hna hnu le nuhrin covo an ngeih hnu lawng ah an umnak hmun ah cun an kir lai. UN zong nih pehtlai in bawmhnak kan pek rih hna lai, tiah Michelle Bachelet nih cun a chim.

Rohingya ralzam hna cu dinei ah a bik in harnak an tong, ramdang hna zong nih Rohingya ralzam hna cu pehtlai in bawmhnak pek an herh, tiah Michelle Bachelet nih cun a chim chap.

Mogoke Ah Hringtu Nu Nih Kum 5 Tluk A Fa Cu Kyats Sing 15 In A Zuar! Mandalay ramṭhen, Mogoke(မိုးကုတ်) ah hringtu nu nih kum 5 tluk a fa cu August thla thawk ka hrawng ah khan Ks. sing 15 in a zuar, tiah DVB News nih a ṭial. Ngakchia cawtu puaisa(agent) nih, cu ngakchia cu Laukkai(လောက်ကိုင်) ah a kuat, tiah min langhter duhlo mi pakhat nih a chim.

Min langhter a duh lo mi pakhat nih a chimning ah cun, “Midang hmuh ah cun i cawmken piak bantuk in an langhter nain, a tak ah cun minsen thut in cawkzuarnak an tuah. Nihin August 17 zong ah khuate lei in nu pakhat nih a fa a zuar, nihin ah minsen thutnak an tuah, cu ngakchia a cawtu le a kum zat theih a si rih lo,” tiah a chim.

Ngakchia zuartu hringtu nu hna hi Mokko pengchung mi an si i, an chungchuak fa an zuarnak kong ah zei bantuk harnak an ton le a zuarnak a ruang theih a si rih lo.

Mandalay FEA Hriamtlai Phufonh In Minung 4 An Hriamthil He An Tlau! Shan ram chaklei Naungcho(နောင်ချို) lei ah hriamthil a cawtu FEA phufonh chungtel 4 cu hriamthil an cawknak in an kir lei, Mandalay khuapi ah August 16, zaanlei suimilam 3:00 khan an hriamthil he an tlau, tiah Anonymous Force Mandalay (AFM) nih cathanh an chuah.

Anonymous Force Mandalay (AFM) hruaitu Bu Tiger nih cun, “Nizaan zaanlei ah leng kan chuak lai tiah an chim i, atu tiang pehtlaih khawh an si ti lo. Hriamthil cu Naungcho(နောင်ချို) in Mandalay tiang phorh a si cang, zaanlei an chuah hnu ah pehtlaihnak kan tuah kho ti hna lo,” tiah a chim.

Hriamtlai phu chungtel 4 hna sin ah cun pistol 2, Ak 47 pakhat le phu dang hriamthil zong aa tel. Local PDF le Anonymous Force Mandalay-AFM phu hna hriamthil man he cun sing 200mmk man a si, tiah AFM phu hruaitu Bu Tiger nih a chim. A tlaumi 4 hna he pehtlaihnak a ngeimi hna cu i ralring cio ding in FEA phufonh nih an theihter hna.

Mandalay UG phufonh FEA cu Freeland Attack Force (FLA), Emerald Girls Army (EGA) le Anonymous Force Mandalay (AFM) phukomh hna an si.

Myaing Peng Nihnih Chung Kahdohnak Ah SAC Ralkap 8 An Thi, Magway ramṭhen, Myaing peng tualchung hriamtlai phu nih SAC ralkap hna cu nihnih chung pehtlai in an kahdoh hna caah SAC ralkap 8 an thi. Kuan, bomb le an hriamthil zeimawzat zong kan lak khawh, tiah Myaing hriamtlai phu nih nihin August 17 ah cathanh an chuah.

Myaing peng, Taekyi(တဲကြီး) khua le Naytat(နယ်သတ်) khua kar ah August 15 le August 16 ah SAC ralkap hna cu Myaing hriamtlai phu nih bomb puahhnawh in an doh hna, tiah theih a si. August 15 ah riahcaw a phortu SAC ralkap motor 2 cu bomb an puahhnawh hna i, SAC ralkap 1 a thi, 3 hliamhma an tuar. Ralvengtu SAC ralkap 4 zong an kah hna i SAC ralkap 3 an thi, pakhat hliam a tuar, tiah Myaing hriamtlai phu nih cun an thanh.

August 16 ni zong ah, tualchung hriamtlai phu hna nih, August 15 ah SAC ralkap nih ralvennak an tuahnak hmun cu an kahdoh ṭhan hna. Cu kahdohnak ah cun SAC ralkap 3 an thi i, 2 hliamhma an tuar, tiah an langhter. Nihin August 17, Myaing tualchung hriamtlai phu nih cathanh an chuah ning ah, nihnih chung kahdohnak ah SAC ralkap lei ruak 8 le hliamhma tuarmi 2 cu SAC ralkap nih motor in an thiar hna, tiah an langhter.

Kum Khat Leng Ah Mindat Peng Ralhrial 9500 Leng Cu Anmah Le An Khua Cio An Kir Kho Rih Lo, Chin ramkulh, Mindat peng kahdohnak ruangah ralhrial 9500 leng cu kum khat leng a rau cang nain anmah le an khua cio ah an kir kho rih lo, tiah theih a si. 2021 May thla in Mindat peng ah SAC ralkap le CDF Mindat kahdohnak ruangah tualchung mi 20,000 hrawng ralhrial in an um, tiah Mindat peng ralhrial zohkhenhtu phu in ṭuanvo ngeitu nih a chim.

“Ral kan hrial chung ah sii-ai le eidin kan har tuk. Fur caan ahcun facang kan chiahnak zong a cin dih i, kan facang a rawk dih. Ral kan hrial ka ah cun ramchung he ramleng he a kan bawmtu an tam ngai. A hnu cun SAC ralkap nih an kham hna caah bawmtu zong an zor tuk cang. Sii-ai le eidin a har tuk caah nau pawimi aa rawkmi an tam,” tiah a chim chap.

Mindat peng hi milu 30,000 leng an si i, a luancia 2021 May thla 15 le 25 kahdohnak ruangah ral a hrialmi 20,000(zatuak 90) an rak phan i, atu cu 9,500 an taang, tiah theih a si. Mindat peng kahdohnak ruangah hliamhma faak a pumi hi 5 an um i, kut ke a bulmi zong an tam. Ralhrial mi chung in sii-ai chambau ruangah 50 hrawng an nunnak a liam.

Mindat peng ah SAC ralkap nih mi check hlatnak an tuah i, CDF he pehtlaihnak nan ngei, tiah an tlaihmi hna hi 65 an si i, hremnak ah an thahmi hna hi 10 an si. Atu tiang SAC ralkap nih check hlatnak an tuah peng rih, tiah theih a si. Mindat peng ah SAC ralkap nih inn 17 an khangh pinah inn 100 leng an hrawh, tiah ṭuanvo ngeitu nih cun a chim.

Pale Le Taze Kahdohnak Ah SAC Ralkap 6 Le Pyusawhti 5 Nak Tlawm Lo An Thi, Sagaing ramṭhen, Pale peng Inpinhti(အင်ပင်ထီး) khua um Pyusawhti sakhan cu, nizan August 16 zan sml 6:00-7:00 tiang M.R.D.A. Battalion 4 nih hriamngan lung 35 in kan kah hna caah Pyusawhti 5 nak tlawm lo an thi, tiah cathanh an chuah.

Cu kahdohnak ah cun M.R.D.A. Battalion 4, Yinmarbin pengkomh No. 6 M.R.D.A. Battalion nih an kah hna i, anmah lei in a thimi le aa hliammi an um lo. Bo Naga hruaimi M.R.D.A. kuttang ah Yinmarbin pengkomh Battalion No.3, 4, 5, le 6 cu NUG runvennak zung in COC he rian ṭuanṭinak an ngei, tiah theih a si.

Sagaing ramṭhen, Taze peng Kanpauk khua pawng ah nihin August 17 zing sml 10:00 hrawng ah SAC ralkap le PLA kahdohnak a chuak i, SAC ralkap 6 an thi, tiah PLA sin in theih a si. Taze, Kanpauk khua pawng kahdohnak ah PLA le Taze PDF hna i bawm in an kah hna.

Kum Khat Chung Ah SAC Ralkap Le An Ṭuanpi Hawi Hna Nih Nu 37 An Tlaihhrem Cang Hna! July 1, 2021 in July 31, 2022 tiang ah SAC ralkap le an ṭuanpi hawi hna nih Myanmar ram chung ah nu 37 an tlaihhrem hna i, cu chung ah Sagaing ramṭhen cu tlaihhrem a tong mi nu an tambiknak a si. Kumkhat chung ah nu 23 an tlaihhrem hna.

A pahnihnak cu Mandalay ramṭhen in a si i, kumkhat ah nu 5 an tlaihhrem hna, tiah Burma Human Right Network nih cathanh a chuah. Cazin kan khawmhsuat mi chung ah aa tel lomi zong um khawh a si caah hi nakin a tam deuh kho, tiah Burma Human Right Network nih a ṭial.

US le South Korea Cu Raltuk Cawnṭinak An Ngei Lai! US-South Korea Raltuk cawnṭinak cu a ralai mi zarh chung ah kan ngei lai, tiah South Korea Ralkap nih nizan August 16 ah an thanh. N. Korea nih Missile hneksaknak le Nuclear in a tlerhkhawnh lio ah atu bantuk in S. Korea ram hawi ṭha a si mi US he raltuk cawntinak an tuah lai. Kum dang ah cun raltuk cawnṭinak cu August 22 in September 1 tiang an rak tuah tawn.

‘Ulchi Freedom Shield’ tiah min pek mi raltuk cawnnak ah hin raltuknak tank, raltuknak tilawng le vanlawng hna in cawnnak an ngei lai i, ralkap thonghra reng lo an i tel lai. US nih S. Korea he a nganmi raltuk cawntinak kan ngei lai, tiah bia a rak kamh hnu in atu bantuk in timhlamhnak an hun ngeih hi a si. A luancia kum ah cun, US nih North Korea he pehtlaihnak ngeih aa zuam cuahmah lio a si caah le Covid rai ruang ah raltuk cawnnak cu nganpi in an rak tuah lo.

A luancia August 8 in 14 tiang US, S.Korea le Japan ram hna cu Missile i kham ning le Bomb kawl ning cang cawnṭinak kan rak ngei, tiah US Ministry nih an thanh. US le S. Korea nih an cawn ding mi cu ral in i kham ningcang cawn a si lai, tiah an thanh hna nain N. Korea lei nih cun “Kan ram rak tuk nak ding ah raltuk an cawng,” tiah a chim ve.

Salay Ah Khuabawi Pa Le A Nupi Kah Thah An Tong: Magway ramṭhen, Chauk peng Wakinba khuabawi pa le a nupi cu kah thah an tong, tiah tualchung mi hna sin in theih a si. Khuabawi Soe Ngein le a nupi San San cu an inn chung i an um lio ah hngalh lomi hriamtlai phu nih an kah thah hna.

“Zingka tein meithal thawng kan theih. Zoh zong kan va zoh ngam colh lo. A hnu ah khuabawi pa le a nupi cu an rak kah thah hna,” tiah tualchung mi pakhat nih a chim. A luancia June 16 ah Chauk peng, Myanmar Economics Bank hngak ralkap pakhat an thahmi le atu khuabawi pa le a nupi thahnak kong zong ah PDF lei nih thawngthanhnak an tuahmi a um rih lo.

Taiwan Ramkhel Hruaitu Hna Cu China Nih Phihkharnak A Tuah Hna! China nih Taiwan ramkhel hruaitu pawl cu China ramchung luhnak nawl a phih hna, tiah theih a si. US House of Representatives Palai hna Taiwan an phak hnu nizan august 16 ah Taiwan pawngkam ah raltuk cawnnak pehtlai in ka tuah than lai, tiah China nih a thanh hnu in atu bantuk in ramkhel hruaitu hna cung ah phihkharnak a hun tuah ṭhan.

US House of Representative palai hna zalong tein Taiwan an tlawnmi kong ah a herh lo mi lehrulhnak tuah lo ding in US nih China cu ralrin a rak pek. Edward Markey nih hruaimi US palai hna cu Taiwan President Tsai Ing-wen he tonnak an ngei i tutan an khualtlawnnak cu US Party ngan pahnih caan saupi rak i ceih cangmi phungphai ning tein a kalmi an si tiah US nih cun a chim. China nih phihkharnak a tuahmi hna cu US um Taiwan Ambassador Bi-khim Hsiao tel in Taiwan Parliament palai cheukhat hna an i tel.

Yangon Ramṭhen Ah Pehtlai in Ruah A Sur Caah Peng Tam Deuh Ah Ti A Lian! Yangon ramṭhen ah nihin August 17 zinglei in ruah a sur tuk caah deilei sml 3:00 hrawng in peng tam deuh ah cun ti a lian, tiah tualchung mi hna nih an chim. Rangon ramṭhen, Yangon khua lai, Hlaingtharyar, Bahan telh in peng tam deuh ah ti a ngan i, a niam deuhmi inn hna cu um awk ṭha loin ti nih a phum, tiah theih a si.

“Zan khua dei ruah a sur caah kan inn tang lei cu ti nih a phum. Zinglei sml 2:45 hrawng ah ti cu kan inn chung ah a lut. Voi khat hmanh hi bantuk kan tong bal lo. Kan hawikom kan i chawnh cio hna tikah Yangon ramṭhen peng tam deuh ahcun ti a lian,” tiah Yangon ummi pakhat nih a chim. Ti a ngan tuk caah Shwepyithar peng 14 lam tonnak pawng ti a kai tuk i, sehzung rianṭuanmi cheukhat zong an thlah hna. Motor aa chawkmi zong ti a ngan tuk caah an dir dih, tiah theih a si.

Yangon khuasa laimi pakhat nih cun, “Cat loin ruah a sur peng ko. Nihin August 17 zong a sur ko. Kannih lei bel hi cu kan umnak a sang deuh i ti lian nih a phummi a um hraw rih lo. Nihnih chung a sur rih lai an ti,” tiah The Chin Post ah a chim.

Ram Chung Ral Ruangah Hakha Peng Ah Ralhrial In A Ummi Minung 5,535 An Phan, Uknak laak hnu in ram chung ah ral a tho i tlang ram lawng ah siloin rawn zong ah kahdohnak a chuak. SAC ralkap nih inn le lo an khangh piak hna. Kalay, Gangaw hrawng Chin mi umnak inn le lo zong hrawhpiak le khanghpiak an tong.

“Ram chung ral ruangah ralhrial in Hakha peng ah a ummi hi a luancia July 25 tiang ah khan minung 5,535 an phan. Hakha khua chung ah 628, Mie peng ah 2,143, Zokhua peng ah 1,077, Senthang peng ah 1,601 le Hakha CCU camp ah 86 an um. A hlan ah cun 83 an rak si nain nau 3 an ngeih caah 86 an si cang. An dihlak ah Hakha peng ah ralhrial in a ummi hi minung 5,535 an si,” tiah Hakha peng ralhrial zohkhenhtu phu in ṭuanvo ngeitu nih The Chin Post ah a chim.

Cheukhat cu ramlak ah thla ruk an rak um i, ei le din awk an ngeih ti lo caah Hakha peng ah an rak i ṭhial. Cheukhat cu Hakha a rak fuh panh colhmi zong an um. Hakha peng ah ralhrial in a ummi hi thla khat le thla thum li ti bantukin a ummi zong an um, an i lo cio hna lo, tiah a chim chap.

Atu hi Hakha khua chung um Khrihfa bu kip sin ah ralhrial mi hna ca ah bawmhnak hal a si. Zawnruahnak le dawtnak tein Khrihfa bu hnar cheu nih bawmhnak an pek cang. Facang Chiti, Sa, Angki, Tawhrolh, Um-kheng, Ti sik An-hnah le phaisa ti bantuk in a dangdang eidin thilri bawmhnak an pek hna.

Hakha peng ah ralhrial in a ummi hna nih cun “An duh herhmi le an co hnga awk a simi an hmuh, an co khawh nakhnga” ti lung put he kan zohkhenh hna. Kan hmaika a chuakmi thil a si caah kaltaak awk le pheo awk a ṭhami thil a si lo, tiah a chim. Kan phaknak hmun cio in ralhrial mi hi daw hna u si. Kanmah le kan ti khawhnak zawn cio in zohkhenh kilveng hna u si. Lungrual tein rian kan ṭuanṭi ahcun Pathian nih thluachuah a kan pek lai i, ei awk din awk ngei lo in a kan chia hrimhrim lai lo.

Hakha peng ah ralhrial in a ummi hna hi anmah le an umnak khua cio ah tluang tein an tlun khawh, an kir khawh ṭhan nakhnga zong kan i zuam cuahmah, tiah Hakha peng ralhrial zohkhenhtu phu in ṭuanvo ngeitu nih The Chin Post ah a chim.

United Nations Special Envoy on Myanmar Noeleen Heyzer Cu Yangon A Phan! United Nations Special Envoy on Myanmar Noeleen Heyzer cu nihin August 16 zinglei ah Yangon a phan, tiah theih a si. Noeleen Heyzer cu thaizing August 17 ah Nay Pyi Taw ah SAC ṭuanvo ngeitu hna he tonnak an ngei lai, tiah SAC chimnak nawlngeitu General Zaw Min Thun nih a chim.

UN nih Noeleen Heyzer khualtlawnnak kong cathanh a chuahmi ah cun Myanmar zatlang bu hna le ṭuanvo ngeitu hna he tonnak a ngei lai, tiah a thanh i, SAC he tonnak an ngeih khawh in zei bantuk bu dang he tonnak a ngeih rih lai cu SAC lei nih an thanhmi a um rih lo.

Noeleen Heyzer cu nikum October thla in Myanmar ram buainak tawlreltu ding ah rian khinh a si i atu hi a voikhatnak Myanmar a phak a si. SAC he tonnak a ngeih ding mi hi UN Security Council nih a hnu bik SAC sin ah halnak a tuahmi, Hramhram tuah sernak vialte ngol ding le harnak a tong cuahmah lio mi mizapi hna bawmhnak pek khawh ding kong an i ceih lai, tiah UN nih cun a thanh.

Noeleen Heyzer Myanmar a tlawn cu SAC cohlannak a si sual nakhnga lo a biapi ngai. ASEAN palai zong nih voihnih khengte a rak rathnawh hna nain zei hmanh ṭhat lei a panh lo mi hi an i zohchun awk a si, tiah NUG Ministry of Foreign Affairs Deputy Minister U Meo Zaw Oo nih cun a chim ve.