Ayeyarwady Ramṭhen Ah SAC Nih Ralkap Chungkhar Hna Cu Leng Chuahnak Nawl An Phih!
===================
Ayeyarwady pengkulh chung ah SAC ralkap umnak hmun i khuasa mi ralkap chungkhar hna cu SAC nih an umnak hmun in chuahnak nawl an phih, tiah Ayeyarwaddy Times nih a ṭial. SAC nih ralkap chungkhar hna cu leng chuak in rianṭuannak nawl an phihpiak hna hnu ah, ‘eidin bawmhchanh nan si lai’ an ti hna, tiah SAC ralkap hna he naihniam in um mi nih an chim.
“Atu bantuk in lengchuahnak nawl an kan phihpiak i anmah pekmi tirawl lawng kan hngah a si ahcun rawl lo in kan thi ko lai, tirawl cu chim lo phaisa hmanh an kan pek khawh lonak a sau cang, leng chuahnak nawl an kan phih cang caah tlik zaam duh zong ah a har cang” tiah SAC ralkap chungkhar pakhat nih a chim.
SAC ralkap he naihniam in a ummi hna chim ning ah, Ralkap chungkhar hna cu eidin kong ah an har ngai hna i, cheukhat cu a thli in leng ah an chuak i, chungkhar pawcawmnak ah rian an ṭuan tawn. Ayeyarwady ramṭhen chung ah SAC kuttang um ke ralkap hi battalion 20 a um i, June thla thawk in an chungkhar hna cu an umnak hmun leng in chuahnak nawl an phih, tiah Ayeyarwaddy Times nih a ṭial.
June 8 ah Thayetchaung peng, Yange khuate le Kamyaing khuate karlak ah a rak lut mi SAC ralkap pawl cu PDF phufonh nih an kah hna i mins 30 tluk kahdohnak chung ah ralbawi 1 telh in 13 an thi i tampi hliam an tuar. Cubantuk in June 13 zaanlei sml 3:00pm hrawng ah Thayetchaung peng,
Yange khuate pawng Mwe tlang ah hmunhma a khuar mi SAC ralkap pawl PDF phufonh nih an va kah hna i mins 15 tluk kahdohnak a rau, SAC ralkap 1 a thi, zaanlei sml 4:00pm hrawng ah voikhat an kah ṭhan hna i SAC ralkap 1 a thi chap tiah theih a si. Kahdohnak chung ah Thayetchaung peng PDF phu a si mi (TYC-PDF), Kalonemin Guerrilla phu hna bawm in kahdohnak an tuah tiah theih a si.
Sagaing ramṭhen, Shwebo peng, Sin-in khua ah hmunhma a khuar mi pyusawhtee 4 cu PDF phufonh nih an kah hna caah an 4 ning in an thi, hriam zuun 4 an lak khawh tiah NUG Ministry of Defense nih a thanh. June 20 chun ah Sin-in khua le Minsi khua karlak ah Shwebo pengkomh PDF B04, Sin-in PDF phufonh hna nih an kah hna tiah an langhter.
Kahdohnak chung ah pyusawhtee 4 an thi i Carbine zuun 3, AK47 zuun 1, kuan 296, Grenade lung 3, kuanbawm 4 le kuan khamnak 4 an lak khawh tiah an thanh. Karenni ram, Hpasawng peng ah a um mi SAC Infantry 134, 135 hna cu Dtone in bom an thlak hna caah Sergeant Aung Chan Myae telh in ralkap 3 an thi tiah theih a si.
June 20 zaanlei sml 3:00pm hrawng ah Karenni ram, Hpasawng peng, SAC Infantry 134 le 135 hna cu Drone in bom an thlak hna caah Sergeant Aung Chan Myae le adang ralkap 2 bom nih a khen hna caah a hmun ah an thi tiah theih a si.
Atulio Hpasawng khua ah SAC ralkap thazang an der i Karenni phu pawl, PDF phu pawl nih an doh hmasa lengmang hna tiah theih a si.