SAC ralkap Jet Fighter nih Timit, Lungkhar tlang ah bomb a thlaknak kong!
=================
SAC ralkap Jet Fighter nih Timit, Lungkhar tlang ah voi tam ngai bomb a thlak, tiah theih a si. Nihin June 3 suimilam 11:40 hrawng in 12:00 tiang ah SAC ralkap Jet Fighter nih Lungkhar tlang ah bomb a thlak. Bomb a thlakmi hi a tam ngaingai. Hakha khuachung zong a tlerh dih, tiah Hakha um mi pakhat nih The Chin Post ah a chim.
Chin ramkulh, Tedim khua hrambunh 269 Battalion in SAC ralkap pakhat cu May 31 ah PDF-Zoland sin ah meithal zun khat, kuanbawm le meithal kuan he a lut, tiah PDF-Zoland in ṭuanvo ngeitu pakhat nih a chim. PDF-Zoland sinah a lutmi SAC ralkap pa cu Tedim khua hrambunh 269 Battalion in a si i, MA 1 zun khat, kuanbawm 4, meithal kuan 260 leng he a zaam i, laksawng kyats sing 50 an pek, tiah theih a si.
A luancia May 13 lio zong ah Tonzang khua hrambunh Khah Lah Yah 268 in SAC ralkap Lah Min Aung, pumpak number Tah-572235 cu PDF-Zoland nih an rak tlaih i, a himnak hmun ah an chiah, tiah theih a si. Hramhram in uknak a latu SAC ralhrang nih rampi biathli thuhnawhnak lei he aa pehtlaimi phungphai in kum 3 chung thong an thlakmi NLD cozah in tangka lei ah khuakhan lairel tu pahnihnak vuanci (Vice Minister of Planning and Finance) U Sat Aung Cu nihin June 2 ah Yamethin thonginn in a chuak, tiah theih a si.
U Sat Aung cu SAC ralhrang nih zawnruahnak in an chuahmi si loin thongthlak ding in nawl an chuahmi kum a thlin cang caah a rak chuak khawh hi a si, tiah Yamethin thonginn a pehtlaitu hna sin in theih a si. SAC ralhrang nih uknak a laak hnu ah NLD cozah chawlehnak ah ruahnak petu Sean Turnell zong an rak tlaih i, SAC nih a computer chung ah ramkhel kong he aa pehtlaimi chawlehnak pawl hmun a si tiin rampi biathli thuhnawhnak lei he aa pehtlaimi phungphai in taza an cuai ve.
Tazacuai a tongmi hna cu Daw Aung San Suu Kyi, NLD cozah chungtel tangka lei ah khuakhan lairel tu (Minister of Planning and Finance) vuanci a rak simi U Kyaw Win, U Soe Win, pahnihnak vuanci U Sat Aung le Sean Turnell hna an rak si i an 5 ning in SAC ralhrang nih thong kum 3 cio a thlak hna hi a si. Atu ahcu Daw Aung San Suu Kyi pakhat lawng thonginn chung ah a taang cang i anmah he sualphawt ṭii in an tlaihkhihmi hna minung 4 tu cu an luat cang, tiah People’s Spring nih a langhter.