Ramkhel Ruang Ah Thongtla Nu Hna Tlaihhrem Le Thah An Tong. SAC ralhrang nih uknak an laak kum 3 chung ah nu 5416 an tlaih cang hna i cuchung ah 196 hi Kakhin ramkulh in an si, tiah theih a si.
February 1, 2021 in February 28, 2024 tiang ramkhel ruang ah tlaih le thah a tong mi nu 810 tluk an si cang i cu chung ah kum 18 tang minung 5 telh in minung 22 hna cu SAC ralhrang nih an tlaihhrem hna hnu ah an thah hna, tiah AAPP nih March 2, ah an thanh.
Tlaih a tongmi nu hna cu an umnak thong-inn chung ah SAC ralhrang nih CCTV an bunh i an zoh peng hna. Cu pin ah a thurhnawmmi bia ṭhalo in an ti hna, an tuk an velh hna i an chiaṭha thleidannak chung tiang ah an kut hrolh in checkhlatnak an tuah hna, tiah theih a si. Lungmili Post
Thawngpang dang: Nicaan Luan Eidin Tawlrelnak Kong He Pehtlai In CDF-Thantlang Bual Area Nih Cathanh An Chuah. Chinland Defense Force – Thantlang , Bual Area, Department of Home Affairs nih khuakip dawr ngei dih lak nih nicaan luan eidin tawlrelnak kong he pehtlai in March 2, ah a tanglei bantuk in cathanh an chuah.
A cunglei kong he pehtlai in nicaan luan eidin zuar le din ei ruang ah zawtfahnak a tuarmi an um ti thawng kan theih. Cucaah Chinland Defense Force – Thantlang, Bual Area chung ah ahohmanh nih 2024, March 2 thok in nithla luan cangmi ( expired date ) eidin hna cu zuar hrimhrim lo ding a si lai. Hi thawngthanhnak a zul lomi cu phungning in dantatnak tuah nan si lai, tiah an thanh.