Ralhrang Nih Malsaawm Khua Ah Thilri An Fir Hna
=================
Gangaw lei in a rak kai mi SAC ralhraang Light Infantry Division 77 (Tatmah 77) nih Hakha peng, Malsawm khua ah umhmun an khuar chung ah khuami inn pawl an bauh, khuami ngeihchiah thilri an firnak nehnang hmanthlak an si.
Khin U – Ye U motor lam ah khadohnak a chuak i SAC ralkap pahnih an thi; Nihin May 10 chun ah Sagaing ramthen, Khin U peng chung, Khin U – Ye U motor lam ah SAC ralkap le tualchung PDF pawl kar kahdohnak a chuak i SAC ralkap pahnih an thi, rammi ralkap lei nih meithal zun hnih an lak khawh tiah kan theih.
Umhmun an khuarnak Moetein tiva hlei in Khin U – Ye U motor lam lei ah a ra mi SAC ralhraang pawl le tualchung PDF pawl an i kap i SAC hriamnam MA 1 meithal zun khat, AK 47 meithal zun khat, 5.56 zenthong 15 le kuan bawm 3 an lak khawh tiah, Khin U PDF sin in theih a si. Cu kahdohnak cu minute 3 hrawng lawng a rau i Khin U peng PDF le tualchung LDF i bawm in an kah hna. Rammi ralkap lei hma pu um lo in hnulei an kir kho tiah theih a si.
Chuncung khua ah CDF-Hualngoram ralkap pahnih nih ram ca ah nunnak an pek; Nizan May 9, Hakha peng, Chuncung khua ah SAC ralhraang hmanh ta mi bomb puahnak in CDF-Hualngoram ralkap pahnih nih ram le miphun ca ah an nunnak an pek tiah thawng kan theih.
CDF-Hualngoram ralkap a si mi Elsangzela (Kum 21) le Ramthianghlima (Kum 22) cu Chuncung khua chung SAC ralhraang nih an kal taak mi bag an laak lio ah ralhraang nih bomb an hmanh ta mi bomb nih a puah hna i an nunnak a liam tiah kan theih. SAC ralhraang pawl nih Chuncung khua an chuah taak cang caah camp lei kir ding in an i timh lio ah atu bantuk an ton hi a si tiah kan theih.
Khin-U peng ah SAC ralhraang pawl raal lam sial in an luh caah tualchung mi 7000 leng an zaam; Sagaing ramthen, Khin-U peng ah SAC ralhraang nih raal lam sial in an rak luh caah tualchung mi 7,000 leng an zaam tiah Khin-U peng thawng thanhtu phu nih an thanh.
Cu ralhraang pawl cu Khin-U peng Nichuah lei Kabut khua le Kuhtat khuate mei in a khaangtu ralhraang 200 hrawng, Khin-U peng Nitlak lei Ywathitkone khuate Pyusawhtee pawl le Ye-U in a ra mi ralhraang 70 hrawng aa fonh mi phu an si tiah an chim.
Khin-U peng Nichuah lei Kabut khuate ah khua mi a bawmchantu PDF hna le SAC ralkap pawl cu May 7 ah an i kap i PDF ralkap pahnih an thi tiah tualchung mi sin in theih a si. “Khuami an chanhchuah hna lio ah SAC ralhraang kah mi hriam ngan nih a khen hna ca ah an nunnak a liam” tiah khuami pakhat nih a chim.
SAC ralhraang pawl nih Kabut khuate le Kohtat khuate mei in an khangh ti zong tualchung mi nih an chim. May 8 zinglei ah Yonepin khuate le Kinpaung khuate pawng zong ah kahdohnak a um tiah theih a si. Khin-U peng Nitlak lei Aungtha le Konetha khuate lei zong ah hriam ngan le meithal puah bu in an rak luh caah khuami an zaam ti zong tualchung mi hna sin in kan theih. Credite; The Hakha Post