Pakokku Hrambunh 252 Battalion In SAC 2 Le Kawkareik Peng In SAC 2 Cu Mizapi Sin Ah An I Fonh
=========
Lungmili Post | Vaupi 10 | 2024
Magway ramṭhen, Pakokku peng hrambunh Khah-Lah-Yiah 252 battalion in SAC ralhrang 2 cu hriamthil pawl he mizapi sin an i fonh caah tangksa sing 60 laksawng kan peek hna, tiah Yesagyo peng Southern YSO PDF sin in theih a si.
Mizapi sin ah aa fonh mi 2 hna cu SAC Aung San Lin (kum 20) le Aung Thet Pine hna an si i 2024, April 5 ah MA 1 meithal zuun 1, kuanbawm 1 le 5.56 kuan 25 zong an i put chih caah tangka sing (60) laksawng kan pek hna i a himnak hmun ah kan thlah hna, tiah an langhter.
Yesagyo peng Southern YSO PDF sin ah SAC ralhrang 2 le an kuttang palik 2 an dihlak minung 4 cu hriamthil pawl he an rak i fonh cang, tiah an langhter chih.
Cu bantuk ṭhiam in Karen ramkulh, Kawkareik peng ah SAC ralhrang 2 cu 2024, March 22 le April 5 ah hriamthil pawl he mizapi sin ah an i fonh, tiah theih a si.
“Mizapi sin ah aa fonh mi SAC ralhrang 2 nih MA 1 meithal zuun 2, kuanbawm 10, kuanfang 420 le kut cheh bomb 3 zong an i ken chih. Atu hi a himnak hmun ah ṭha tein kan zohkhenh hna i CDM phunglam he aa tlak ning in kan kalpi hna lai” tiah tualchung hriamtlai White Dragon Battalion in ṭuanvo ngeitu pakhat nih a chim.
Mizapi lei ṭang in kan sin ah aa fonh mi SAC ralhrang le an kuttang palik pawl cu White Dragon Battalion in ṭuanvo ngeitu hna nih lunglawm tein kan don hna i ṭha tein kan zohkhenh hna, tiah a chim chap.