SAC He Kahdohnak A Tuah Lomi Hriamtlai EAOs Phu 5 Cu SAC He Tonnak An Ngei Ṭhan
==================
SAC ralkap he kahdohnak a tuah lomi tlangcung hriamtlai EAOs phu 5 cu June 26 le 27 ah SAC he Naypyidaw ah tonnak an ngei, tiah theih a si. NCA ah min a thutu hriamtlai EAO hi phu 11 an si nain KNU le CNA telh in hriamtlai phu cheukhat hna cu SAC ralkap nih nawlngeihnak an laak hnu ah NCA biahren buar in SAC ralkap an doh ṭhan hna.
ALP, DKBA, KNU/KNLA-Peace Council, LDU, PNLO hriamtlai phu 5 le SAC cu Naypyidaw ah tonnak an ngei, tiah theih a si. Cu tonphumhnak ah cun ALP in Chairman Saw Mya Ya Zar Lin, DKBA in ralbawizik Saw Sein Win, KNU/KNLA in remdaihnak Council Vice Chairman Dr. Naw Ka Paw Htu, LDU Vice Chairman, Kyia Phu,
PNLO Chairman Pyia Tan Khun Ukar nih a hruaimi remdiah ceihmainak aiawhtu hna an kai, tiah theih a si. Tonpumhnak ah cun 2008 phunghrampi chung ah remh an duhmi ceihhmai, hlan lio hnatlaknak an rak ngeih cangmi vialte a tak in ṭuanchuah ding, remdaihnak Conference tuah ding, mahle hmunram cio remdaihnak ser ding le rithaisii hrawh ding ti hna an ceih, tiah theih a si.
Tuluk hruainak in NCA minsen a thu lomi ṭangṭi phu MNDAA, TNLA, AA le SAC cu June 1 ah tonnak an rak ngei ve. Ni thum chung bia i ruah ding in timhtuahnak an rak ngei nain a nihnihnak ah SAC nih an chuahpimi biatung cu ṭangṭi phu 3 lei nih an cohlan ti lo caah ceihmainak an rak ngol, tiah theih a si.
Mon ramkulh, Ye peng Hnitkayin khua um palik sakhan cu PDF ṭangṭi phu hna nih kan kah i SAC ralkap 9 an thi, tiah Albino Tiger Company-1 nih an thanh. June 25 zinglei suimilam 11:40 hrawng in Hnitkayin palik sakhan ah umhmun a khuarmi SAC ralkap pawl cu Kyiaphyu Column le Battalion 27 hna nih an kah. Ṭangṭi PDF lei in hliamhma pumi an um lo, tiah theih a si.
Kahdohnak a daih in SAC ralkap Mi 35 pahnih nih Hnitkayin khua cu an kah ruangah khuami 3 nunnak a liam pinah hliamhma pumi zong an tam. Innlo zong tam ngai an rawk, tiah Albino Tiger Company-1nih an thanh. Cu bantuk in Sagaing ramṭhen, Chaung U peng Natyekan khua pawng Monywa-Mandalay lam cung ah umhmun a khuarmi SAC ralkap pawl cu drone in bomb kan thlakhnawh hna i a thimi le aa hliammi an um, tiah Federal Wings nih an thanh.
June 25 zan ah SAC ralkap 80 hrawng nih umhmun an khuarnak hmun cu Federal Wings nih bomb an thlak i, hliamhma pumi hna cu June 26 zinglei suimilam 4:00 hrawng ah motor pahnih nih an lak hna. Natyekan khua pawng um mi SAC ralkap nih cun PDF le tualchung mi 15 an thah hna i Lethtauktaw khua le Nganyintaw khua zong mei in an khangh, tiah Khit Thi Media nih a ṭial.