SAC Nih Thimnak A Tuah Dingmi Ah Russia Nih A Bawmh Lai
===========
SAC nih a tuah dingmi thimnak(election) cu tlukruannak a ngeimi a si khawh nakding ah Russia nih kan bawmh lai, tiah Russia Duma Hluttaw Deputy Chairman Sholban Kara-ool nih a chim. May 30 ah Sholban Kara-ool le Min Aung Hlaing cu Shan ramkulh, Taunggyi khuapi ah tonnak an ngei i, atu bantukin Mr. Sholban Kara-Ool nih Myanmar cu thimnak ah a bawmh naklai kong a chim nain zeitindah a bawmh lai ti cu fianghlang tein a chim lo. Russia Duma Hluttaw Deputy Chairman le SAC kuttang Union Election Commission Chairman Thein Soe nih a hruaimi aiawhtu phu he zong May 30 zinglei ah tonnak an ngei.
Sholban Kara-ool nih cun Myanmar ram i ukhruainak a upatnak kong a chim pinah SAC kuttang Union Election Commission Chairman Thein Soe zong nih tlukruannak a ngeimi si ding in thimnak kan tuah lai i vote firnak a um lonak ding zong upadi kan ser, tiah Myanmar Alin ah a chim.
SAC nih zeitik ah dah thimnak kan tuah lai ti cu biafiang a thanh rih lo nain SAC hruaitu hna he tonnak an ngeih lio atu bantuk in Myanmar ram thimnak kong he pehtlaih in Russia Hlttaw palai Sholban Kara-ool nih cun a chim, tiah The Irrawaddy nih a ṭial.
Karen Le Mon Ramkulh In PDF Pathum Kan Sinah An Lut Tiah SAC Nih An Thanh; Mon ramkulh, Ye peng Sinphyusin hall ah a ummi PDF ralkap pahnih cu hriamnam le zen-kuan he kan sinah an rak lut, tiah SAC nih an thanh. Hriamnam le zen-kuan he kan sin i an rak luh caah lawmman phaisa kan pek hna i, PDF sin um ti lo ding in minsen an thut hnu ah an nu le an pa sinah kan kuat hna, tiah an langhter.
Cu bantuk ṭhiam in Karen ramkulh, Myawaddy peng, Gyiaphyu Column in PDF ralkap pakhat cu SAC sinah a lut, tiah SAC lei nih an thanh.
SAC nih zarhkhat chung ah PDF ralkap 40 an thi i, 10 tlaih an tong, tiah May 29 ah an thanh. Cu pinah hriamngan zun 12, kuan phuntling 2,025, bomb lung 45, hridawh bomb lung 138, ralkap he aa pehtlaimi thilri 87, cycle 22 le motor 2 kan laak, tiah SAC lei nih cun an langhter.
SAC Ralbawizik Chang Soe Win Le Tuluk Ralbawi Naypyidaw Ah Tonnak An Ngei! SAC ralbawizik chang Soe Win le Tuluk ralbawi(Military intelligence) Major General Yang Yang cu Naypyidaw ah tonnak an ngei. Nizan May 30 ah SAC ralbawizik chang Soe Win le Tuluk Central Military Commission Director, Major General Yang Yang hna cu Naypyidaw ah tonnak an ngei i, Tuluk-Myanmar ramri a daih khawh nakding kong an ceih, tiah SAC nih an thanh.
Atu lio hi Tuluk cozah nih AA, TNLA le MNDAA telh in Myanmar ram chaklei hriamtlai phu ṭangṭi phuthum(3) le SAC ralkap karah remdaihnak kong ceihmai ding in Mingla hmunram ah tonnak ngeih ding in timhtuahnak ngei lio a si, tiah theih a si.
Timit Kahdohnak Ah SAC Ralkap 20 Renglo An Thi; Atu i a kal cuahmah mi Timit kahdohnak ah SAC ralkap lei 20 renglo an thi tiah theih a si. Cu nak in a thi mi an tam deuh kho.Tutan Timit kahdohnak hi SAC ralkap nih cunglei he tanglei he thazang tampi he an nam hna. Kan Chin ralkap hna nih a si khawh chung in an kah ve hna tiah theih a si.
Kan Chin ralkap hna hi minung thazang le hriamnam in bawmh le zuanhnawh an herh tuk lio a si. SAC nih an i timh mi cu Timit lak i cuticun Thantlang zong lak dih ding khi a si caah tutan Timit kahdohnak hi kan tei hrimhrim a herh. Credite;The Chin Post