Putin Nih Cluster Bomb A Ngeih Cangnak Kong A Chim
=========
Russia president Vladimir Putin nih cluster bomb an ngeih cangnak kong chim in, Russia nih Ukraine ram i ummi ka ralkap cluster bomb hmang in kah an si ahcun an ram i aa chiah mi bomb hna cu hrawk ding in nawl ka ngei tiah a chim.
July 16, khan State TV ah President Putin an komhnak hi langhter a si. Cu hmun ah Putin nih a chim mi cu cluster bomb hmang in kahdohnak tuah cu sualnak lianpi ‘crime’ tuah bantuk a si taih chim in Russia nih zeitluk in ralthuam a deih lo zong ah cluster bomb hi kan hmang bal lo tiah a chim.
Cluster bomb hi ram 100 chung ah khap a si i, Russia nih Ukraine a kah hnu ah Ukraine nih US sin in cluster bomb hi zeimawzat cu bawmhnak a hmun tiah an chim. A sinain, hi cluster bomb hi Ukraine cozah nih an ral hna kahdohnak ding in ralthuam an i deih lo hnu lawng ah hman a si lai tiah a chim.
Ukraine le Russia hi kan hnuzarh chung khan Zaporizhia kahdohnak kong ah khat le khat an rak i puhtonh. Nikum khan Russia nih Zaporizhzhia hi laak a rak timh a sinain a lak khawh lo ca ah Ukraine kuttang ah a um tiah an langhter. Hi kahdohnak ah hin Human Right Watch nih an chim ning cun, Russia le Ukraine nih hin cluster munition bomb hi kahdohnak ah an hman ve ve tiah an chim.
Wagner PMC Nih Belarus Ralkap Cawnnak A Pek Hna. Russia ram caan raulo te chung in Wagner private ralkap company member hna nih Belarus ralkap cu kahdohnak an cawnter hna Ukraine buainak in kahdohnak hmun ah an thil tawn ceiphainak an ngei tiah Minsk Defence ministery nih a langhter.
July 15, ah Minsk Defence ministery nih Wagner hruaitu he fonh in ralkap training tuahnak ding “Road map” an ser tiah an chim. Wagner ralkap nih Belarus ram chung ah Osipovichi khuapi pawng ah training tuahpi ding in Balarus territorial defence force hna theihternak an tuah hna tiah an langhter. Hi ralkap training tuahnak hmun ah a hlei in cawn an timh mi cu ralkap hmunhma lak ning, cawlcangh ning le engineering first aid training hi kalpi a si lai tiah an chim.
Long Island Ah Nu 12 Thattu An Tlaih Khawh Cang. Kum 2010, khan Suffolk County palik Parkway ah Ahannan Gilbert kum 15 hlawhhlang rianṭuan tu a tlau mi an rak kawl lio ah palik officer John Mallia le a kuttang rianṭuan hna nih (Nu) lawngte ruak 4 an rak char. NBC nih a langhter ning cun (Nu) 4 hna hi Amber Costello, Melissa Barthelemy, Megan Waterman le Maureen Branard-Barnes hna an si tiah an langhter. Kum 2015 khan hlawhhlang rianṭuan ve mi nu pakhat ruak zong an rak char.
2010, khan (Nu) ruak lawngte 11 hi Long Island ah an rak char hna. Hi ṭihnung mi thahnak hi ṭuanvo ngeitu hna nih ṭha tein hlathlainak an tuah hnu ah min pahnih in an bunh Long Island Serial Killer, the Gilgo Beach Killer or the Craigslist Ripper tiin an kawh. long Island minung 12 thattu hi “News Yourk-based architect” inn sak thiam mi Rex Heuermann kum 58 tluk up a si tiah an langhter.
Pennsylvania Ti lianhnak In Ngakchia Minung 5 Nunnak Liam 2 An Tlau. July 15, khan Pennsylvania i Upper Makefield peng ruahsurnak nih tilianhnak a chuak ter ca ah ngakchia minung 5 nunnak liam 2 an konglam theih lo in an tlau tiah ṭuanvo ngeitu hna nih an chim.
Nunnak liam mi lak ah a tam deuh cu chungkhar khat an si hna i Charleston South Carolina in khuapi lei ah an chungkhar tlawng ding ah a kal mi an si hna tiah an langhter. Chungkhar ah pa bik le a fapa kum 4 mi cu tilian lak in an chuak kho a sinain hringtu nu, a pi le fa le dang pahnih tu cu an chuak ti loh tiah Brewer nih a chim. tilianhnak hmun hma hi Aqueduct lampi le Wrighstown lampi karlak ah a si tiah palik hna nih an chim.
Vinij Nih A Timhlamh Mi Boxing Thonghnak Puai Ah Buakaw Le Manny Pacquiao Ground-Breaking In An I Thong Lai. Fresh Air Festival tuahtu Vinij nih Thailand ram ah lentecelhnak puai phunkhat tuah ding in timhlamhnak a ngeih mi ah hin Muay Thai ace Buakaw Banchamek le Filipino boxing minthang Manny Pacquiao an i thong lai tiah theih asi.
Boxing thonghnak puai hi kum 2024 January thla ah tuah ding in timhlamh a si i Thailand ram ah tuah a si lai. Prsee conference le official minthutnak hi kum 2023, July 21 zanlei suimilam 4:00 ah tuah a si lai.
A tu hi company nih vawlei pumpi lentecelhnak ground-breaking boxing a vawi 3 naak puai tuah a timh hi asi tiah Fresh Air CEO Vinij nih a mah FB page ah a langhter. An i thonghnak ding hmunhma hi Press conference an tuah hnu ah a fiang te lai tiah ṭuanvo ngeitu hna nih an langhter. Credit: Lungmili Media