Russia ram nih Putin nawl pek nak in February ni 24 ah khan

BREAKING NEWS; Min Aung Hlaing Nih Russia Nih Ukraine A Tuk Bantuk In China Nih Myanmar A Tuk Ve Lai!
===========
Nichuah Lei Europe ram ah acang mi Russia-Ukraine kong he pehtlai in emergency meeting cu February ni 26 ah SAC ralhrang phu hna nih an tuah nak kong cu Irrawaddy thawngzamh nih a chim.

Mah tonbiaruah nak ah Russia-Ukraine kahdohnak ruangah Kawlram cungah zeidah thatnak achuah timi kong cu abia pi bik in ceihhmai nak an ngeihnak kong cu min langhter a si lomi minung pakhat nih a chim. A tu ning cun China nih Myanmar adoh lai lo si ko nain PDF pawl nih China chawlehnak an phihkham i SAC ralhrang nih kan kham khawh lo a si ah cun China nih Myanmar a tuk kho men tiah SAC ralhrang nih a chim.

Russia ram nih Putin nawl pek nak in February ni 24 ah khan Ukraine ram cu a tuk i mah dohnak cu SAC ralhrang nih acohlang nak kong cu Zaw Min Htun nih VOA thawngzamh zung ah a chim.

“Pakhat nak bik ah Russia nih aram hruainak uknak daihter nak caah tuanvo alak. Tuah aherh mi tuanvo lak aherh mi a si tiah ahmuh. A pahnih nak ah Russia lei in Vawleipi daihnak cu a thingmi Vawlei cung ram ah thazaang athawng bik in a dir i Vawlei cungpi hmuh ter a duh hna” tiah a chim.

Mah kong tonbiaruah nak ah cun SAC ralhrang hruaitu Min Aung Hliang nih PDF pawl nih Tuluk Chawleh nak an phih kham a si i SAC ralhrang nih kan kham khawh lo ah cun ramri a si mi China nih Myanmar a doh kho men tiah a chim.

“𝐌𝐀𝐇 𝐙𝐀𝐖𝐍 𝐇𝐌𝐀𝐍𝐇 𝐈 𝐑𝐔𝐀𝐇 𝐊𝐇𝐀𝐖𝐇 𝐋𝐎 𝐋𝐈𝐎𝐀𝐇”; Zei ruangah dah Russia nih Ukraine hi a chim/a tuk? tiah line cung in a ka halmi nan um pah len. Tawite in ka van in lehmi hna zong nan um ko cang nain, awlzang deuh in mi tam deuh nih nan rel khawh nakhnga hi capar tawite hin ka theih tawk ka van ṭial.

Russia ram hi Khuasik tuknak ram a si caah zuding loin a um kho lomi, zu ram khun mi phun, harnak phunkip tuar in ram harsa le sifak ngaingai a rak simi “Russia” cu Adolf Hitlar nak hmanh in mi a thah le a nawnmi an tam deuh ko lai tiah an ruahmi pa, Joseph Stalin (Bible sianginn in an rak chuahmi pa) hruainak in a hung ṭhangcho i, Nazi Germany hmanh kha a tei i, Joseph Stalin in Mikhail Gorbachev chan ah cun vawlei cungah ram kau bik le lian bik, ram ṭhangcho, ram rum, ram ṭhawng bik pakhat ah a van i hlorh.

The USSR (Union Soviet Socialist Republic) cu ram pakhat te ah a rak ummi cu kum (1991) ah khan independence ram (15) ah aa ṭhen. Cu hna cu independence ram an si cio ko buin Russia ruah ning tang ah a ummi le fellowship ngeih a duhmi ram an um lioah Ukraine le a cheukhat hna hi cu Russia hruainak le ruahnak tang ah um a duh bak lomi an si.
Europe ram hna he hawikomh le an hruai ning a duhmi an si.

Russia nih amah ṭhit hruainak Warsaw Treaty Organization (Warsaw Pact) tang ah um peng ve hna seh ti a duh hna i, NATO (North Atlantic Treaty Organization) ah nan lut hrimhrim lai lo a ti bur ko hna. Cucaah Ukraine ramchung ah tapung a thomi hna cu Russia hruainak tang ah um a duhmi an si tiin bia a tuah, a rak bawmh hna i, Ukraine he i ṭhen in independence a phuanter hna.

Atu zongah hin Russia nih Ukraine president Zelenskky cu nan meithal tung ulaw cabuai ah “remnak” bia kan i ruah hna lai tiah a sawm pinah Ukriane ralkap hna sin zongah nan politic hruaitu hna kut hin chuak uh. An uknak chut hna ulaw, hruaitu thar thim in uknak cu nan kut ah a um ko lai tiin “coup” tuah dingin a lemsawi hna. A sullam cu Nitlak ram pawl ruahnak, uknak, hruainak tangah um loin Russia na rak si i, Russia duh ning le ṭhit hruainak “Warsaw Pact” tangah um peng ve ko ti hi a si.

Ukraine president Zalenskky cu American le Europe ram tampi nih na himnak hnga ram dang ah rak zam ko tiah an sawm len ko nan, “ka ram le ka miphun cu ka zamtak hna lai lo! Zamnak nakin zenthong kan herh deuh” tiah a ti bur ko.
Amah hi Ukraine ram, Judah miphun a si. A pule hi Jewish family ah unau pa (4) an si i, pathum cu Nazi pawl nih an rak thah hna. A pu pakhat lawng hi a unau rual hna lakah a nung dammi a si. Zelenskky hi Ukraine comedian minthang pakhat a si lioah president ah thimmi a si.

Ukraine nak hin Russia hi a let thum in minung a tam deuhmi an si pinah ralkap thazaang, hriamnam thazaang, phaisa thazaang le a dangdang, zeizong kip ah dirhmun aa thlau tuk mi an si. Ukraine hi Khrihfa ram tiah auhmi ram a si i, a ramchung mi zakhat ah sawmkua hi cu Khrihfa an si i, nizan lebang ah khan cun hriamnam a tlai kho ve lomi lawng hmanh si loin, hriamnam a tlai liomi an ralkap runpi tiangin Pathian thangṭhatnak hla an sa i, Pathian sinah bawmhnak hal in thla an cam.

“Mah zawn hmanh kan i ruah khawh lo lio zongah hin” kan umnak hmun cio in thlacam in bawmhnak halpiak ve cio hna usih! Russia ralkap runpi nih cun Ukraine khuapi “Kyiv” cu an kulh ko nain, tuzing tiang ah cun an la kho rih lo.
Ukraine hi “NATO” member taktak a si rih lo caah NATO nih hriamnam le ralkap he zuanhnawh awk a ṭha deuh rih rua lo.

Asianin American, England le Europe ram tampi nih Russia cu chawleh-chawhrawlnak le Bank le phaisa ah a lam an phih thluahmah i, nihnih thum chungte hmanh ah Russia dirhmun cu a tla thluahmah ve ko cang. NATO respond force in defense minister nih cun NATO member ram a simi ah cun kan ral (Russia) hi pe-khat, kar-khat te zong a lut lai lo tiin Ukraine ramri ah cun hriamnam ṭhaṭha he an ralkap an thlah thluahmah cang hna.

Joseph Stalin nih minung maktaduai (10) renglo a thah a nawn hna hnuah vawleicung ram ṭhawng bik le ram rum bik pakhat ah a dirh a siammi, Russia hi mi tampi thah le nawn a timhtu President Vladimir Putin hmang hin thlak le sungh, sifah le ṭumchuknak khur ah tla ve ruangmang cang seh ti thlacamnak he ka caṭial ka donghter. Credit; 𝑩𝒊𝒔𝒉𝒐𝒑 𝑪𝑲 𝑵𝒐 𝑪𝒉𝒉𝒖𝒎