Russia president Vladimir Putin cu Kum 70 a tling cang lai!

Russia president Vladimir Putin cu Kum 70 a tling cang lai!
=========
February 1, 2021 zing arkhuang ah Ralkap nih uknak an rak lak i, Myanmar rammi paoh cu kan arh dih cio. Zeiti holh le cawlcangh awk rak hngalh cio a si lo. Meithal thatha aa tlaihmi Ralkap cu mizapi nih rak ttih cio a si. “Kan tei hna lai lo” tbk ruahnak in mizapi thinlung a nenh. Fear/ ttihnak he khah cio a si.

Asinain nikhat a liam i, ni hnihnak ahcun, “Moral Courage” a ngeimi pasal/ nusal hna an von chuak i bel le kheng tum in Ralkap dohnak an thawk. Tlawmpal ah Moral courage a ngeimi Mino/ Generation Z pawl zalam cungah an chuak. Ralkap nih a von kah hna hnu ah meithal tlaih in Nihin tiang an doh. Teinak tak hmuh ding ahcun, “moral courage” nih lam hmai a sa zungzal.

“Moral courage” hi laica in zeitindah kan leh hnga:- Thihnak le sunghnak a chuahpi khomi thil, Minung tampi nih an ttih i, a si kho lai lo tiah an ruahmi cungah ralttha tein nunnak or sunghnak ton zong ttih loin, a pah chih ngammi tuahsernak hi, “moral courage” timi cu a si hnga. Tulio Ukraine President volodymyr zelenskyy nih thangtthatnak le mintthatnak a conak bik cu, “Moral Courage” a ngeihmi ruang ahhin a si.

“Russia cu an tthawng tuk. Ukraine cu an lak colh lai. An in tlaih ahcun, thah ding na si caah, nan zam a tha deuh” tbk in ttihnak le zumhlonak in Vawleipi nih an hmuh piak lio ah, nunnak sungh ithim in, ralttha tein ral ngan taktak a dohmi cung ah teinak nganpi a hmuh thluahmah. A ralthatnak nih Russia 🇷🇺 cu fak taktak in a den thuahmah rih ko.

Ukraine president volodymyr zelenskyy hi Kum 44 lawng a si. Mino te a si. A cabinets zong Mino an tam. Russia president Vladimir Putin cu Kum 70 a tling cang lai. Putar a si cang. Hlan chan ruahnak in ral a tu. Lih a chim. Hlennak in Mizapi tei aa timh.

Ming Aung Hlaing zong hi Kum 65 a si cang. A Kum cu a taar tuk rih lo nain a tuahsernak cu model a out taktak. A khuaruahning le state media in mizapi a kan hlen ning tuak tikah, hruh chan lio khuatuak a si. Tulio Ukraine 🇺🇦 nih ral an tuk ning an dirhmun le Myanmar ram defense forces hna nih ral an tuk ning hi aa khat. Moral courage/ thinlung ralthatnak he Anmah nak a let in a tthawnmi ral ngan taktak a dotu an si.

Cucaah, tulio kan ram ah People Defense Force/ Chinland Defense Force vialte hi, thinlung/ruahnak/spirit he ral a tumi, raltthatnak/ courage he aa khatmi an si caah, teinak an hmuh thluahmah ve ko cang. Ral teinak ahcun, “Courage/raltthatnak” hi a tawhfung a si in a lang. God Bless Chinland and God Bless Our Defense Forces!

Mibu khuasaknak ah hruaitu a biapi ning hi Ukraine le Russia war nih a langhter ngaingai. Ukraine president Volodymyr Zelenskyy ralthatnak/ Courage nih Russia ram harnak a pek i, Vawlei cung politics muisam a thlen cikcek.

Russia cu vawlei cung Ralkap ah a thawngbik 2nk an si. US a changtu an si. UKRAINE ram hi fawituk in a tei lai tiah an zumh cio. Asinain Ukraine President nih a nunnak thap in, ral ttha tak in a dirh hnawh hna tikah, Ukraine Ralkap le mipi an thazaang a tlung i, Russia nih an iruah ning bantuk in an tei kho ti hna lo.

Ukraine president Volodymyr Zelenskyy cu thah/assassinate dingin Putin nih Chechen special force a thlah hnawh hna. Anmah KGB/ Spy agent zong a thlah hnawh hna nain an thah kho lo. “Keimah hi number 1 target ka si” timi aa hngalh ko nain raltha tein a ram le a miphun a dirhkamh peng thiam.

Volodymyr Zelenskyy hi miralchia President sisehlaw a zam cang lai. Asilo ah fawite in Russia sinah surrender a tuah cang lai. Fawite in Russia sinah I surrender hna sehlaw, 2014 i Crimea a lak bantuk kha a si lai. West lei zong nih fakpi in sanction an tuah manh lai lo. RUSSIA 🇷🇺 president Putin Tuhi a lianngan chinchin lai. A ral a tha chinchin lai. Asinain,

Volodymyr Zelenskyy raltthatnak/ courage nih Mipi thazaang a ttawnter. West ram pawl lungrualnak zong a chuahter. West ram nih faktaktak in Putin cungah sanctions an tuah khawhnak hi, President Volodymyr Zelenskyy nih fek tthup in a dirh hnawh peng ve ko caah a si. Cucaah, miphun le ram nih teinak a hmuh khawhnak hnga ding caaahcun, Joshua bantuk miralttha hruaitu hi a rak herh rumro ko tinak a si.

Russia nih Ukraine a tuahto ning cu a fak bak ko. Hlan chan lio, Pathawng, misual luakchuak nih duh paoh in a derthawmmi an velh hna i, aho nih an chanh ngam hna lomi bantuk an si.Russia nih duh paoh in Ukraine cu a den cuahmah ko nain Russia he ralthawh ttih ah an chanh ngam lo. Ukraine Ralkap nih vawlei ral Cun an khuapi an ven khawh tuk ko nain Van in Russia nih a den thluahmah tikah ithen awk le iven awk a tha lo.

Ukraine president Zalensky nih Van/ air ral tal cu kan kham piak ko sawh ulaw tiah NATO le US cu no-fly zone tuah ding a hal hna nain No-Fly Zone tuah ahcun, NATO le US Ralkap nih Russia Vanlawng kah a hau lai caah, Russia he donak a chuak colh lai tiah an ruah caah an ngamh lo.

Tutan Ukraine vs Russia war zoh tikah UN nih Russia an mawhchiat. NATO le US nih Ukraine ram hi bawmh hna sehlaw, WW3 a chuak lem lai lo. Zeicatiah, RUSSIA cu aho ram hmanh nih bamwh le chanh a tong lai lo timi a fiang ngai. Asinain Russia nih Nuclear/ Nuke hi 1600 hrawng a ngei caah, Europe khi fak tuk in a den sual lai timi an ttih caah, asi khawh chung in Ukraine pinah ral dang aa chap lo ding an ven hi, si dawh a si.

RUSSIA Ralkap nih ground/ vawlei ral Cun Ukraine khuapi lak an iharh ngai ngai. Tuhi no 10/ 10 days a si cang. Ukraine nih zeitluk indah an khuapi an ven khawh hnga? Vawlei hi, Vawlei ah misual minung pakhat nih fak tuk in harnak a pek khawh rihmi hi a poi taktak a si ko.

Russia ram ah Putin uarlotu an karh caah Martial Law order a chuah hnik tiah biavaivuan a chuak. Nizan a biachimmi zoh tikah lih le lih in Russia Mipi a hlen hna. Ukraine Ralkap nih China students, India student, le ramdang students pawl an tlaih hna ralsa an tarh hna a ti. India 🇮🇳 MP nih a chawnh i, a chimmi a hman lo. Ukraine Ralkap tu nih an zam khawhnak an bawmh lehlam hna tiah India lei in bia a chuak.

Ukraine minung, miphun thleidan hmang, Neo Nazis pawl nih Russia minung harnak an pek hna a ti. Russia ram ah bomb a thlakmi le Innlo a hrawhmi cu, anmah Ukraine 🇺🇦 ralkap nih an tuahmi bantuk in Russia state TV ah a langhter i, Russia Ralkap in hartong bawmh ah kan kalmi a si tiah a ti hna. RUSSIA Ralkap a thimi cu lukhong tampi pek ding le Ukraine ram ah ral a tumi Ralkap pawl bonus pek ding zong a chim.

Russia ram ah social media a phih i, Nitlak lei Media pawl a khar piak hna. Anmah Russia State TV lawng hi a dikmi a si tiah a chim i, West pawl cu, “Empire of lie” a ti hna. Russia 🇷🇺 ram ah US dollar tampi cawk a khap i, Russia leng ah Phaisa chuahpi zong limited a tuah.

Ukraine ram ah Ralkap a thlahmi hna lakah Kum no, Mino an tam. Ramri ah Military Drill ( Rehearsal) tuah dingin a hlen hna i, Ukraine ah a kuat hna. Ruahlopi in Ukraine Ralkap he an itong tikah, an ttih. Raltuk an duh lo caah, a cheu Ralkap nihcun an mawghmi tanks datsi/ gas hna an zuhter hram i, lampi ah an itapter. A cheu Ralkap cu Ukraine Ralkap sinah surrender an tuah. Satellite hmanthlak nih a tlaihmi Russia military convoy/ truck? ruun pipi hna cu, traffic jam ah itap hna sehlaw a dawh tiah a cheu nih an ruah.

Ukraine khuapi cu a kulh hna i, chuak kho lo. Luh kho loin a tuah hna. Ukraine ah Nuclear Power plant cu an hrawh piak hna caah, winter khuasik lakah Ukraine Mipi tampi cu heat lo, le light lo in an um. Ukraine Mipi cu a zam kho zam hna seh, a zam duhlomi thi hna seh tbk phun in thlachiat a ruat bak lo ti a lang.

Putin hi 2019 Coronavirus a um hnu in midang he hlat in a um cang an ti. A cabinets pawl be hlapi in a thu zungzal. Aho ruahnak hmanh a lo bal lo. A ho hmanh nih ruahnak zong an cheuh ngam lo ti a si. RUSSIA tampi caahcun, Chan thar Nebuchadnezzar ti awk in a um. Miphun thleidannak lungput a ngei. Hlan chan ruahnak in a um. Thinlung/ ruahnak zong dik ti hlah sehlaw a dawh tiah tampi nih an ruah.

2003 lio i, US Ralkap, Iraq ram ah Kum khat hlei chung ah a thimi nakin, tutan ah RUSSIA Ralkap a thimi hi an tam deuh cang tiah an chim. A Ralkap a thimi an tam pinah, a hriamnam, tanks le jet pawl tampi hrawh piak a si.
Khat lei in, Approval rating 35 lei ah a tlami US President Joe Bidden nih State of Union speech ah US alliance lungrualnak cu celebration a tuah ti a si.

CHINA zong a sawm khawh i, RUSIA he naite in a ummi India zong 🇮🇳 a sawm khawh hna ti a si. Russia oil le gas cu advance in Phaisa an pek cang caah, phih awk a ttha deuh cio lo ti a si. UKraine refugee cu Canada Cozah nih fawite in Canada ram rat khawhnak lam, sepcial Visa waiver in lam a sial piak hna. Credit: Zasang Cinzah