Russia Nih a thli tein bawmhtu a ngeih tiah an ruah!
Belarus Ram Nih Russia A Bawmh Tiah Ukraine Nih A Fehter!
=========
Russia leikap tangin Belarus ram zong nih a kan kah cang tiah Ukraine nawlngeitu hna nih an fehter cang. Ukraine ram he ramri taktak a simi Belarus nih Ukraine ram chaklei sangin a ralkap a luhter tiah an chim. Ukraine hluattaw nih March (1) ah twitter cungah a tial nak ahcun Ukraine ram chaklei Chia Nyi Hit hmunhma ah Belarus ralkap an lut cang tiah a langhter.
Belarus cu caan saupi Russia hawikom tha a si i, Russia ralkap nih Ukraine ramchung kahdohnak an tuah ka zongah Belarus ram ah hrambunh in an kan luhhnawh tiah a tial. Ukraine ram chaklei ah a ummi Kyiv khuapi pawngah meng 40 tluk a saumi Russia raltuknak motor le tank an phan lecangka in Belarus ralkap zong nih Kyiv khuapi chaklei kapin an kan luhhnawh tiah a langhter.
Belarus President cu EU ramchung ah a donghnak bik hramhram uktu pakhat ah ruahmi le cazin ah khumhmi pakhat a si. A nih hi a liamcia caan tlawmpal ah khan nuclear ngei lo dingmi ram ah cazin khumhmi cu hrawh hratin Russia nuclear hriamnam hna cu a ramchung ah chiah khawhnak lampi a sialpiak.
Nai ah khan Ukraine President nih Belarus President cu phone chawnh in biaruahnak a ngeihpi lio ahcun Belarus President nih raldohnak ah hin ka tel lai lo tiah biakamnak zong a ngei tiah theih a si.
EU Chungtel Ah Cohlang Dingin Ukraine President Nih A Nawl Hna! Europe ramchung ah Ukraine zong chungtel pakhat ah cohlan dingin Ukraine President nih Febuary 28 ah khan minsen thutnak a ngeih lecangka in chungtel ah cohlan dingin nawlnak zong a ngei chih.
Ukraine cu EU chungtel pakhat ah cohlan dingin nawlnak kan tuah cang. Ukraine cu Russia nih ramchung ah luhhnawh hratin kahdohnak a tuahmi hi i ven kan herh caah atu bantuk caan boruak laakah hin EU nih Ukarine ram cu chungtel pakhat ah rak kan cohlang hram u tiah president nih a nawl hi a si.
Kannih nih kan i timhmi cu EU ramchung mipi he hmunkhat ah um ti le taangti ding hi a si i, a biapi cemmi cu bangrannak covo hi a si. Cu nih a sawhmi cu tlukruannak asiloah covo i khahnak a si ko. Keimah nih cun kan i tlak bak ko tiah ka ruah tiin Ukraine President nih amah hmanmi social media ah a chim.
EU ramchung ah chungtel a simi ram (nih cun Ukraine ram zong EU chungtel ah cohlan awk tlak a si tiah Febuary 28 ah khan minsen an thut diam cang tiah Deltanewsagency nih a tial.
Ukraine Ramchung Ah Khuapi Nganbik Changtu Rawhralnak Hmanthlak! Ukraine ramchung ah khuapi nganbik changtu Kharkiv cu March 1 ah Russia nih a kah ruangah cozah zung telh in mipi inn tampi zong a rawk. Russia nih vanlawng hmangin kahdohnak a tuah ruangah Kharkiv khuapi le Kyiv karlak ah a ummi Okhtyrka khuapi ah Ukraine ralkap (70) leng an thi tiah AP thawngzamhnak nih a langhter.
Russia nih Saturday zaan le Sunday zing tiang Ukraine khuapi Kyiv cu lak dingin a thapi ai chuahsek len nain Ukraine ralkap paraltha pawl nih an phirphahlik loin an rak dawi hna. NATO nih hriamtha a bawmhmi nih tamtuk a khamh khawh caah Russia cu ai zizaang ngaingai cang i Nuclear in ai hrocer cang.
MoD, Wikipedia, Daily Mail chirhchan in tunai Update thar: Russia ralkap 5,300 an thi cang i minung 200 an tlaih cang hna. Vanlawng 29 le helicopter 29 an thlak piak cang hna. Cun Su-25 le An-26 cu an mahtlak in an tla u crews an thi dih ti asi. Tanks 191 le Armoured Vehicles 816 an hrawh piak cang hna.
Russia nih Ukraine ah missiles 350 tluk an kah cang tiah US official nih an chim. Russia phaisa man ngeihnak 30 percent tluk a tla colh ruangmang. Europe ram vialte nih Russia khualtlawng Vanlawng an ramcung ah zuan an khap dih. Ram tampi nih Russia he pumpululh le lentecelh ding an duh ti lo.
Russia nih a celh ve ti lo i rumro lo ti tluk in Ukraine cu remnak siampi a duh cang, Ukraine Palai pawl Belarus ramri ah Russia he biaruah dingah an phan cang, President Volodymyr Zelensky ai tel lo. Russia cu a ceituk cang i remnak hi tuah zokzok kho sehlaw a cash a tha deuh lai dah, asinain tu dirhmun ahcun a thin a lin chin lengmang cang i ralkap thazaang thawng chinchin in Kyiv cu an vun fuh cuahmah than lio asi.