Russia Cu Anmah ser mi hriamnam lila nih an phomh hna!

Anmah ser mi hriam kha anmah kahnak ah ai cang!
=======
Russia ser ttihnung tuk mi bomb cu anmah lila kahnak ah Ukraine ralkap nih an hman. Mahhi bomb hi “thermobaric bomb” silole “vacuum bomb” ti asi i Soviet Union chan lio ah Russia nih a rak ser mi asi. Russia ser hriam lak ah ttihnung ngai mi hriamnam asi. Rocket bantukin an kah i 9 km tiang a zuang kho.

Target a phak tik ah thli lak oxygen he a puak i mei-alh in a puak, cucaah “blazing sun” ti zong in an kawh. A puah tik ah building ngan pipi le container ngan pipi zong a khuai khawh. Oxygen he cawh in a puak mi asi tik ah a pawngkam minung nih vacuum bomb le oxygen ai cawh mi thli an dawp sual ahcun takpum organs vialte a hrawh khawh ti asi i mi tampi thihnak a chuah ter kho tu ttihnung hriamnam asi.

Soviet Union lio ah an rak ser mi asi i Russia nih Afghanistan a rak tuk lio ah voikhatnak an hman. Cu hnu ah Chechnya a tuk lio ah an hman tthan. Atu Ukraine a tuk lio ah voithumnak an hman tthan. Russia ralkap nih Ukraine ah vacuum bomb (blazing sun) an hman ti an theih ka ah Ukraine cozah an thin a rak hung tuk, an thin zong a phang.

Russia nih Ukraine khuapi cheukhat a van chuah tak hnu ah Ukraine ralkap nih vacuum bomb cu an lak khawh i a tu cu Russian ralkap retreat an tuahnak Ukraine nichuah lei ah Russian ralkap kahnak ah an hman ve. Anmah sermi ttihnung hriamnam kha anmah thihnak hriam ah ai cang ti nak asi cu. Ukraine nih Russia sin in hriamnam a lak khawh mi hi a tam ngai ti asi.

March thla dih zong ah Russian forces’ most advanced high-tech weapon asi mi “Kharasukha-4” Ukraine ralkap nih an lak, an kut a phan. “Kharasukha-4” cu NATO kut a phak le bang ahcun a chung um high-tech hmang in Russia cawlcangh ning le timhlamg ning kha theih khawh/tleih khawh asi lai ti asi le hi zong hi Russia hnulei an i thawn nak a ruang pakhat asi kho ve.

Thermobaric weapon (vacuum bomb) hi Russia lawng hman mi cu asi lo. Britain le USA nih an hman ve ko. British ralkap nih Taliban ral dohnak ah Hellfire AGM-114N-rocket par ah thermobaric bomb an rak hmanh i an rak kah bal ve hna. US ralkap nih Iraq ah an rak hman ve. Hriannam dang sawhsawh he ai lo lo, a mithah ning zong a fak hleice caah mah hi hriam hman hi Human Rights Organizations pawl nih cun an doh ngai.

Tutan cu sau nawn in van ttial ning mu. Russia ralkap hi ruahning bantuk in an rak tthawng lo. Lenglang ruah ning tluk in an rak tthawng taktak lo ti kha mi tampi ruah ning asi. Ukraine ralkap nih an khuapi cheukhat Russia kut in an lak tthan thluahmah. Russia ralkap thong tampi inn tlung ti in an liam. An vanlawng, raltuknak tank, helicopters tamtuk a lo.

Ukraine a ning piin lak khawh ding an izumh ti lo caah Ukraine nichuah lei um Donbas region lei tu focus tuah in kan nam cang lai an ti. Cutin Ukraine khuapi lak ding an hmuitinh cu an chuah tak i nichuah lei ah retreat an tuah. Russia thazaang le Ukraine thazaang van zoh ta hmanh sih;

Active soldiers: Russia 900000 Ukraine 209000, Reserved soldiers: Russia 2000000 Ukraine 900000, Fighter jets: Russia 1379 Ukraine 125, Heavy artillery: Russia 4684 Ukraine 1122, Tank vehicles: Russia 3170 Ukraine 927, Raltuknak tinbaw: Russia 31 Ukraine 1, Storm tank: Russia 5220 Ukraine 1184, Hitluk in thazaang ai thlau ko mi

zeiruangah hitin Russia an der hnga i Ukraine a lak khawh lo ti mi ah thiamsang pawl nih an chim ning cu hitin asi;
Russia ralkap chung ah corruption a tam tuk i a chung in mum nih a ei bantukin an rop an ti. Feb 26 ah Ukraine cozah nih an rak chim mi cu Russia nih hmanding in an chiah mi raltuknak tank pawl pahra ah pakhat lawng an hmanh khawh an ti. Aruang cu a chung thil le engine pawl kha an ralkap lila nih an rak zuar, an rak ei dih ti asi. Russia hi Transparency International nih a langh ter ning ah vawleicung a corrupt bik ram pawl ah ai tel ve.

An moral a tla, a niam. A hramthok tein corruption a tam ahcun moral a niam cia cang. Cupinah Putin nih Ukraine ah a thlah mi hna ralkap tampi cu Ukraine ah raltuk ding in an kal kha an thei lo, information va lak ding sawhsawh ah kan kal tiin an ruah ti asi. Cunglei order in ral an van tuk taktak tik le Ukraine lei nih moral tthawng tuk in an rak doh hna tik ah an rak iruah ning asi ti lo i an moral a tla colh ti asi. An ralkap tampi cu zeiruang ah Ukraine ral kan tuk ti zong an fiang lo ti asi.

Cunih offensive war taktak an van luh tik ah an moral a cak kho ti lo. Mah zawn ahhin NATO ram ralkap le Russia ralkap ai dannak an chim mi cu; NATO ram pawl cu assignment-based leadership asi i tanglei ralkap kha zeidah tuah ding ti mi le zeiruang ah ti kha chimh dih an si i zeitin na tuah lai ti kha chimh asi lo ti asi. Zeiruangah na tuah lai ti kha zeitin na tuah lai ti mi nak in a biapi deuh zungzal ti si. Russia tu cu “zeiruangah” ti kha tanglei minung nih an i fian lo tik ah an moral a cak kho lo ti si.

Ral hmai a kal mi kha hnulei in an herh mi an pe chan kho hna lo (logistical failure). Ukraine lei hi an tactic a rak ttha ve. Ral hmai a kal mi Russia ralkap kha hnulei in pechan kho lo ding in chah khawh an izuam. Ral hmaikal nih an herh mi thilri (ammunition, fuel tbk) hnu lei in an pe chan kho hna lo. Russia nih an ral hmai kal pawl herhmi pechan tu ding ah 5 columns bak in an thlah mi trucks pawl cu an duhnak hmun an phan kho lo.

Russian generals tam tuk an thi. Atu tiang ah Russian generals hi paruk an thi cang. World War 2 lio ah ral a dih tiang ah US generals 10 an rak thi ve i cu hna cu ruah lo piin Pearl Harbor Japan nih a rak kah nak in a thi mi an tam. Russia tu cu anmah bak nih an iremh an iremh i an fa fuh mi ah caan rau lo ah generals 6 an thih tik ah strategy fak piin an ipalh ko ti a lang i cu nih cun an tanglei ralkap pawl moral zong a zawr ter ti asi.

Russian ruble tu cu an control khawh ngai. Ukraine a tuk tlawmpal ah nitlak ram pawl nih fak taktak in economic sanctions an pek ruang ah Russian phaisa cu 60% bak in a man a rak tla i 1 USD ah 150 ruble tiang a tla. Cu le kangka in, Russian nih leklak an economy a pur lo nak ding, an phaisa fak pi a tlak lo nak ding, thilman fak tuk a kai lo nak ding tiin action an van lak colh ve.

Interest rate kha 20% an kai ter colh, Russian companies vialte nih ramdang currency an ngeih mi kha Russian phaisa ah an thlen ter dih hna, an cozah nih currency market ah ramdang phaisa cawk lo ding in an phih. Cutin an van cawl ve ruang ah Russian ruble cu a man a kai tthan i a tu hi 1 USD ah 80 ruble asi tthan cang (ralthawh hlan level he ai khat luklak). An i ven ning hi economic theories umtuning te asi ko. Cucaah fak deuh in sanctions tuah chap ding in an aupi cuahmah. Credit: Sangukceu Zinhlawng