Russia Billionaire nih Ukrainian Mipi Harsatnak A Tongmi Hna Bawmh A Timh Hna!

Russia Billionaire nih Ukrainian Mipi Harsatnak A Tongmi Hna Bawmh A Timh Hna!
============
Chelsea Team Ngeitu Russia Mirum Nih Chelsea Team Cu Zuar Hratin A Hmuhmi Phaisa Vialte Cu Ukraine Ram Buai Ruangah Harsatnak A Tongtu Hna Cu Bawmhnak Ka Pek Lai Tiah A Chim! Chelsea team ngeitu Russia mirum nih Chelsea team cu zuar dingin timhtuahnak a ngei i, a hmuhmi phaisa vialte cu Ukraine ram buai ruangah harsatnak a tongtu hna sinah bawmnak ka pek hna lai tiah a chim.

Kum 55 simi Chelsea team ngeitu mirum cu Russia President Putin he pehtlaihnak a ngei tiah sualphawt a tong i, amah nih cun ka ngei lo tiah a chim. Britain Parliament nih amah zong dantatnak le phihkhamnak pe dingin timhtuahnak an ngeih lioah atu bantukin zuar aa timh hi a si.

Chelsea team caw a duhmi zong an um cang i, a hmuhmi phaisa vialte cu Ukraine ram buai ruangah harsatnak a tongtu hna sinah bawmhnak ka pe lai tiah a chim. Atu caan karlak ah hin club/team, thazaang petu mipi le riantuantu hna pinah club sponsor-tu le thanchonak caah a tha bik lai tiah ka ruah caah club/team zuar dingin timhtuahnak ka ngeihnak a si tiah a chim.

A zuarnak man phaisa vialte hmangin bawmnak petu ding zatlang bawmnak petu foundation phu pakhat dirh dingin a riantuanti hawi sinah theihternak zong a tuah cang i, cu foundation in Ukraine ram buai ruangah harsatnak a tongtu sinah bawmhnak ka pek lai tiah a chim hi a si.

Kharkhiv Khuapi Ah Russia Vanlawng Phu An Tum Ruangah Kahdohnak A Fak! Russia Parachute (လေထီး) ralkap hna nih Ukraine ramchung khuapi bik changtu Kharkhiv khuapi ah March (2) ah an tum ruangah Ukraine ralkap he fak taktakin kahdohnak a chuak tiah Ukraine ralkap nih an chim.

Russia vanlawng ralkap hna cu Kharkhiv khuapi ah an tum hnuin sizung pakhat cu an kah i, Ukraine ralkap he pehzulh in an i kap tiah Ukraine ralkap nih cathanh an chuah hi a si. Minung an tamnak hmunah Russia ralkap nih kahdohnak hi fak tukin an tuahmi hi timhcia tein an tuahmi a si tiah Ukraine President nih a chim.

Hi kong he pehtlai in ahohmanh ngaih thiam ding a si lo bangin ahohmanh philh khawh ding zong a si lo tiah Kharkhiv khuapi cu dung gyi hmangin vawi tamtuk an kah hnu in Ukraine President nih a chim. Kharkhiv khuapi cu March (1) ah Russia nih an kah chungah minung 10 nak tam an thih pinah minung 35 nak tam nih hliam an tuar tiah Ukraine ramchung runvennak zung nih cathanh an chuah.

Meng 40 tlukin a saumi Russia ralkap hna nih Kharkhiv khuapi ah kahdohnak tuah dingin an kal caah Ukraine mipi a thong thongin himnak hmunah an zaam.

Voi Hnih Nak Biaruah Than Awk Ah Russia le Ukraine An Cohlan! Belarus Ramri ah Nikhat Ni 28.2.2022 ah, Russia le Ukraine Kuzale hna an i ton. Russia ralkap kan ram in chuak dih hna seh, riangrang tein raldohnak ngawl ding ah Ukraine nih an hal caah, voihnih nak bairuah than awk ah hnatlaknak an ngeih. Ram hnih ai awh tu hna nih News ah achimh veve mi asi.

Russia nih Ukraine atuk hi ni (5) asi cang. Ukraine khualipi pakhat te hmanh an lak khawh rihlo. Ukraine Khualipi Kyiv lei ah a ra lut ding mi Russia ralkap cu meng (15) a hlatnak ah an phan cang. Khuapi chung lut khawh lo ding in Ukraine nih an dohnak cu Vawleipi an khuaruah ter dih hna. Khuapi pakhat hmanh an lak khawh lo caah Russia ralkap an lung a rawk ngai ngai.

Ukraine nichuak lei khualipi Mariupol hi Kyiv khualipi thlanglei ah aum. Russia nih anlak khawh bak ve lo. Kharkiv khuapi zong an lak khawh hlei lo. Raldohnak tu cu a fak hrinhran. Russia Tamada Vlardimir Putin nih Ramri thluan ah a chiah cia mi ralkap thazang 75% hi a hmang cang ti asi. Media nih an chimh nak ahcun Russia tanks le Motors kan hmuh hna lo.

Russia Helicopters tampi le Jet Fighters tampi cu Ukraine nih an kahthlak dih rua. Ramri thluan ah hmuh awk an umlo. Hman awk zinan le Petrol a dih mi zong an tampi. Russia ralkap tampi cu lampi ah an i pungh ko hna. Nika ah an i pho ko hna. Ukraine mipi 350 an thih cang i 1700 nih hma a put tiah Sunday ah Ukraine nih an thanh.

EU chungtel ah cohlan zawk zawk awk ah Ukraine nih ca a tial. Russia nih NATO le EU chungtel siter a duh lo caah Ukraine atuknak aruang hi asi bik. Ukraine PM Denys Shmyhal le Hlutdaw Chairman Ruslan Stefanchuk hna hmai ah EU chungtel ah Cohlan ding in Tamada Zalensky senthuh lio hmanthlak asi.

UKraine caah EU Bawmhnak Hi Zeibantuk Dah Asi Ve. Russia nih Ukraine atuk ni (4) chungah Ralzam 400000 leng ansi cang. 300000 hi EU ram ah an i dawr. EU nih Refugee sawk herh loin Zalon tein kum (3) tiang an ram ah umnak nawl an pek hna. EU Home Affair Vuanci hna biaruahnak in fekter mi asi.

Russia nih fak tukin le ningcang lo tukin Ukraine atuk caah EU nih an lehrulh ve mi asi. Russia nih Ukraine atuknak cu ningcang phunphun in kan dohkalh lai. Ukraine ah hriamnam phun phun, mi athah khawh i Russia thilri a hrawk khawh bak mi thilri hna, Zinan Petrol le Sii ai, hnipuan fenh le ai, eidin tirawl tiang in Ukraine cu EU nih a bawmh lai. Joseph Borel, EU ramdang lei le Mumal Luzik nih a chimh mi asi.

Ukraine bawmhnak cu asi khawh chung, kan thazang dihlak in, kakip le alamkip in kan tuah lai. Hriamnam le mi athah colh i thilri ahrawk khwah colh mi thilri bawmhnak caah EURO 450 Million kan hmang lai. Zinan Sii ai le adang caah EURO 50 million kan hmang lai tiah Mr. Borrel nih a chim. G7 meeting biachah ning in Russia Bahu bank nih an ngeih mi Hnarcheu cu kan phih cikcek khawh cang. EU kut ah aum cang.

Russia Sin Ah Cawn Tlak mi le Putin Aa Chuaksual Cang Ko Rua. Ukraine tuknak ah Russia nih an sungh mi hi a tam tuk hrinhran. Arau hlan ah Putin tiang tli dawh in thil aum cang. Vawlei pi ah thazang a thawnbik mi ram pakhat asi ve mi Russia rilmal nih hi tluk in thilri le ralkap an sungh hi ningzak tuk awk asi. Kawl Rallokap hmanh ni 5 chung ah 4500 leng cu kan thah khawh tung hna lo. Ukraine nih an hrawk mi Tanks, Jet Figters le Raldohnak Motor thatha vialte hi a man in tuak cawk lo asi. MAH te Ralhrang Rallokap an ngeihmi in tuak ahcun let 7 bak in a tam dueh.

Vawleipi le USA, NATO, EU, UK te pawl nih Ukraine bang in kan bawmh hna sehlaw, Ni (5) ah MAH kan thluk lai tinak asi. Ukraine an bawmh mi Hriamnam le Phaisa (1/7) Chue sarih ah cheukhat te hi kan bawmh hna sehlaw cu Kanram le miphun a dam nak hi a hlan tuk cang.

Ni 4-5 chung ah NATO le American tuahmi le tinh mi cu alangh dih hirhiar ko. An pumpak in ral an doh ve lo, an ngunsawm le Hriamnam in an doh ve caah Russia an pulh dengmang hi asi. Putin cu sivang tukah Nuclear hmang cang uh ati cang hna. Ukraine hawikom ram hna hi Nuclear ngeih lo ah maw aruah hna hnga. Israel pa nih Ukraine Tamada asi tikah, Israel nih a bawmh lai zong hi Putin nih tuak a philh rua. Hngalhriang thih kaw, vomkhuai a hnakruh afak ti pei asi khah.

Hramhram in ral asertu tiah Russia mipi nih an mawhchiat cang. Raldoh loin a kir ahcun Russia cu Saupawh le sawthelh asi cang lai. Ralsungh buin hitin akal ahcun, limhang a zawr dih lai, Super power 2nk cu Tuluk ah achanh cang lai. Joe Biden a uar lo tu hna hi hi USA thluak lawngte asi tihi nan philh rua.

Ral adih hlan ah Russia nih an sungh mi hi a tam tuk caah laimi nih tuak khawh phun asi lo. American nih Russia thuatnak caah Ukraine hi a dangh. Soirawl ah tar dawh asiko. Biden a tar naisai rih tung lo. A ti tuk ko hen hi. Russia ral asungh ahcun Tuluk Rili thlanglei le Taiwan a mit athi tuk i cilh a dawlh mi Tuluk caah mangchia asi cang lai.

Globalization chan ahcun, Mi zei ram hmanh mah lawng tein um khawh asilo tihi an kan cawnpiak. Mipi le Vawleipi nih cohlang lomi ral cu an sung tengteng tihi asiko. Putin nih atuaknak ahcun Russia nih Zinan le gas hi vawleipi ka pek hna. Cucu ka phih hna ahcun an dih ati ve. US nih Russia SPH sin ah dollar 2 in a rak cawk mi Alasaka ah Zinan le gas hman cawk lo a um hi Putin nih atheih ti lo.

Canada nih Zinan le gas vawleipi a pek khawh ti zong Putin nih tuak aphilh. Australia zong a rili chung um a chiah mi Zinan le gas in arum khawh ve i Tuluk le Russia sipuazi ah an kan tei khawh ti kha Putin tuak aphilh mi asi. Russia sipuazi an phih mi hi ram sifah ah aa chuak khawh mi asi caah Russia mipi tampi nih Putin sandah an piahhnawh hi asi. Semiconductor an phih ahcun Russia cetzung, computer, information le IT vialte a stop dih cang lai.

Cucaah Putin cu KTV ah akal i kawl hla asa. Keimah nih palh lo awk cu thalo lakin ka palh cang. MAH aw rak palh ve ti hlah. Hnu kir ko uh sih, Mipi nawl pek cang hna usih tiah lunghno ngai in Putin hlasak mi rak ngai cio ve tuah uh. Credit: Joseph R. Thang