Ruili Khuapi Ah Myanmar Rammi Hna Lamkam Ah It In Rian An Kawl. Myanmar-China ramri, Ruili khuapi ah rian a har tuk caah Myanmar rammi hna cu lamkam ah it in rian an kawl, tiah theih a si.
Myanmar-China ramri, Ruili khuapi ah rian a har tuk caah rianṭuan ding in a kal mi Myanmar rammi hna cu rian an hmuh khawh lo caah lamkam ah it in rian an kawl.
Mi tam deuh cu Company nih rian an kawl piak ko hna nain an thiammi le rian an auhmi aa tlak lo caah rian an hmu kho lo i hman ding phaisa zong an ngei lo. Cun Hotel zong an hlang kho lo, hotel hlan man hi khankhat ah a tlawmbik sing 250000 in 50000 kar a si, tiah Ruili ummi mino pakhat nih a chim.
A luancia February thla thok zong ah Myanmar rammi hna cu rianṭuan ding in Muse ramri lei ah an kal nain Muse khuapi zong ah rian ngei loin a ummi minung a thong leng vansang in an um, tiah ramri um khuami hna nih an chim. Lungmili Post
Relchap: Chin ramkulh, Chin hriamtlai phu hna karlak ah ramkhel lei ruahnak aa dan ruang ah Matupi peng hrambunh CDF-Matupi cu Chinland Council (CC) le Interim Chin National Council (ICNCC) hna ah i tel ding in an ruahning aa dan ruang ah Brigade (2) ah an dir, tiah theih a si.
2024, February 23 in 25 tiang Matupi peng chung zungkip le mizapi hriamtlai phu hna Battalion kip in Commander hna nih Chinland Defense Force – Matupi i, a voi 2nak tonpumhnak an tuah hnu ah CDF-Matupi cu Brigade 1 le 2 ah an i ṭhan hi a si.
“Ramkhel ah ICNCC le Chinland Council (CC) an dir i CDF-Matupi Brigade-2 cu Chinland Council (CC) a cohlang mi phu an si. Brigade-1 cu Chinland Council (CC) ah tel a duh rih lomi dirhmun an si. Cucaah Brigade-1 le 2 ah kan tuah. Chinland Council (CC) a lungtling mi phu cu Committee i tel ding ah an zapi in luh an ngah” tiah CDF-Matupi chimphuannak nawlngeitu Salai Nine John nih a chim.
CDF-Matupi Brigade-1 ah Battalion-1 le Battalion-5 hna an i tel i, Brigade-2 ah Battalion-2, Battalion-3, Battalion-4 le atu tonpumhnak an ngeihmi ah an cothlan tharmi Battalion-6 hna an i tel, tiah theih a si.