Rohingya miphun thahnawnnak kong ah Min Aung Hlaing nih Vawlei cung Muslim fonh phu OIC lemsawi a timh hna!
Rohingya miphun thahnawnnak kong ah Min Aung Hlaing nih Vawlei cung Muslim fonh phu OIC lemsawi a timh hna
——-
Min Aung Hlaing hruaimi ralhrang nih Rohingya miphun thah nawn thlu a timhnak kong he pehtlaiin tazacuai a si mi kong ah vawlei cung Muslim phu OIC sin ah nawlnak tuah ding in palai athlah cang hna. Organisation of Islamic Cooperation (OIC) sin ah Myanmar muslim mirum a simi Hte Aung le a hawi le cu ralhrang aiawh in thlah an si tiah Muslim pawl sin in theih a si.
Rohingya kong ah tazacuai a si mi Ralhrang hruaitu hna cu lungrethei in an um cang caah ICJ le ICC i an case kong ah zangfah zawnruahnak tal nan ngei kho deuh hnga maw tiin va sawilem awk ah OIC chungtel ram a si mi Saudi Arabia ram ah Hte Aung le a hawile hi an thlah hna.
Min Aung Hlaing le a hawile pawl cu Rohingya miphun thahnawnnak a tuah tiin Kenya ram nih cun ICJ ah taza a rak cuai hna. Kha an case kha a ralai mi February 21-28 tiang theihnak an ngei lai tiah official in ICJ lei nih an thanh cang.
ICJ ah NUG ai-awh in U Kyaw Moe Tun a dir lai. ICJ ah ralhrang pawl ralchanh in Myanmar mipi le NUG ai awh tu ding ah U Kyaw Moe Tun nih a hruai mi hna cu an kal lai tiah ramdang vuanci Daw Zin Mar Aung nih a chim.
ICJ ah Rohingya he pehtlaiin ralhrang pawl bia ngaih a si lai. Kum 2017 lio hrawng Rohingya miphun thahnawnnak ruangah ICJ ah Min Aung Hlaing le a hawile pawl cu Kenya ram nih taza a rak cuai hna. Cu he pehtlaiin a ralai mi February 21-28 tiang an bia ngai in dothlat an si lai tiah theih a si. Cu an bia chim lio cu vawlei cung mipi dihlak nih ngai kho dingin ICJ Website le UN Web TV in thlah a si lai.
Chin ram tel in ram pumpi huap in District chap timh. Chin ram telh in ram pumpi huap ah District chap cio ding in ralhrang pawl nih timhtuahnak an ngei tiah social media cungah pholangh a si. Cu hlan sining ah Chin ram ah District 4 a um. Hakha District, Falam District, Mindat District le Matupi District tiin.
Asinain tutan ah Tedim District le Paletwa District tiin an chap ahcun Chin ram ah District 6 a um lai tinak a si.
Ram pumpi huap in district 42 chap an timh i cu hlan ah ram chungah district 75 a um. An chap mi he fonh cun Myanmar ram chungah District 117 a um lai tinak a si.
RCSS/SSA Headquarter ah Siangsangruun dih puai le a awng mi conglawmhnak tuah. Shan ram hriamtlai phu a si mi RCSS Headquarter ah siangsangrunn dihnak puai sunglawi in an tuah. RCSS headquarter ah a um mi Loi Tai Leng School ah sianginn a kai mi hna conglawmhnak le sianginn dih puai sunglawi ngai in an tuah kho tiah theih a si. Loi Tai Leng sianginn ah a kai mi dihlak Sianghngakchia minung 18 hna cu Siangsangruun awnnak certificate zong an pek hna tiah theih a si. Credit: Suimilam Media
