Khampat Khuapi Ah Kahdohnak A Chuak; Mipi 1 A Nunnak Liam
=========
2023, July 22 zan suimilam 7:30 tluk ah Sagaing ramṭhen, Khampat khuapi um SAC ralhrang sakhan le palik sakhan cu mipi ralkap ṭangṭi phufonh nih luhhnawh in an kah hna caah kaphnih kar kahdohnak a chuak. Cu kahdohnak ah CNDF ralkap 1 nih hliamhma faak tuk lo a tuar, tiah theih a si.
SAC ralhrang nih an kahmi hriamngan kuan cu No.1 sang um Roman Catholic(RC) biakinn hmai ah a tla i tualchungmi pa 1 a nunnak liam, tiah theih a si. A luancia July 10 ah Khampat khuapi hrambunh SAC ralhrang nih a ruang umlo in mipi 2 an tlaih hna caah atu bantukin an luhhnawh hna i an kah hna hi a si, tiah theih chih a si.
Atu bantukin kahdohnak a chuah caah Khampat khuapi le a pawngkam um Kanan khua in mipi cheukhat hna nih khua chuahtak in ral an hrial hna, tiah kan theih. SAC Ralhrang Hriamngan Kahnak In Nunnak Liammi.
Shwebo Peng Pyusawhti Sakhan An Kah Caah 9 An Thi; Hriamthil Tam Ngai Zong An Laak. Sagaing ramṭhen Shwebo peng ah pyusawhti ralhrang nih umhmun an khuarnak Nyaung- pin-hla khua cu mipi ralkap ṭangṭi phu nih luhhnawh in an kah hna caah ralhrang 9 an thi i hriamthil tam ngai zong kan laak khawh chih, tiah Shwebo peng PDF in ṭuanvo ngeitu pakhat nih a chim.
“Nihin July 23, zing suimilam 3:00 tluk ah pyusawhti thazaang 25 hrawng nih umhmun an khuarnak sakhan cu luhhnawh in kan kah hi si i minute 20 tluk kaphnih kar kahdohnak a chuak. Cu kahdohnak ah ralhrang 9 an thi i hliam pumi zong an tam pinah meithal zuun 3 le kuan pawl telh in hriamthil tam ngai zong kan laak khawh chih” tiah a cunglei upa nih Khit Thit ah a chim. Kahdohnak cu Shwebo Justice Force le ṭangṭi phufonh hna kan si, tiah a chim chih.
Mipi Ralkap Ṭangṭi Phu Nih Letkat Tlang Um SAC Ralhrang Sakhan An Laak. Karen ramkulh, Myawaddy peng chung um SAC ralhrang nih umhmun an khuarnak Letkat tlang sakhan cu Karen National Liberation Army(KNLA) le ṭangṭi phufonh nih an laak khawh caah a tlang thluan ning in kan humhak khawh cang, tiah mipi ralkap Cobra Column hriamtlai nih thawngthanhnak an tuah.
2023, July 20 ah SAC ralhrang nih umhmun an khuarnak Letkat tlang sakhan cu kan laak khawh hi a si i July 21 thok in mahka tlang thluan cu kan humhak khawh dih cang, tiah an langhter.
Kahdohnak ah SAC ralhrang lei thimi an tam i hliam a pumi zong an tam pinah 60MM kuan 16, Bomb 15, Jammer seh 2, bomb kawlnak seh 2, 60MM hriamngan 2, meithal kuan pawl le hriamthil dang tam ngai zong, kan laak khawh chih hna, tiah Cobra Column nih an langhter chih.
Kahdohnak cu KNU/KNLA, Cobra Column Battalion 1, Federal Wings le Black leopard hna fonh in kan si i mipi ralkap ṭangṭi phufonh in minung 6 nih hliamhma an tuar, tiah an langhter chih. Credit: Lungmili Media