RIP; Kawlram le India ramri ah bomb puah unau pahnih an nun nak a liam, A Poi Tuk Ee!

RIP; Kawlram le India ramri ah bomb puah unau pahnih an nun nak a liam, A Poi Tuk Ee!
===========
September 29, 2021 ni ah khan, India le Myanmar Border, pawng Moreh, Manipur ah unau pahnih Lienkhogin Gangte kum 22 le Lalsangmoun Gangte kum 24 cu bomb puah nak in an nunnak a liam. Mah bomb hi World War 11 lio ah an rak hman mi bomb a si tiah an zumh tiah thei a si.

Hi kong he pehtlai in aho hriamtlai phu nih bomb puah timi thawngpang theih fiang a si rih lo. Manipur ah bomb puaknak in unau pahnih an nunnak a Liam mi min hi kanmah Chinmi cu si dawh kan si lo. Anmah Manipur lei minung an si men lai, tiah ruahdomh an si.

India le Myanmar Border i tu bantuk in Bomb puah hi a poi ngaingai. Kan Kawlram chung buainak a kar saling a si tikah zei bantuk hriamtlai phu nih an chiahmi le phummi dah a si hnga, tiah theih duh ngai cio a si. Manipur state chungah anmah Manipur hriamtlai phu pakhat khat nih an phummi a si kho men, cheukhat nih an chim.

CNF le PDF-Gangaw nih SAC Ralhrang Motor Bomb in an Puah, 30 Hrawng an Thi. October 1, zinglei sml. 10:00 hrawng ah Gangaw-Kalay motor lampi ah CNF le PDF-Gangaw i bawm in SAC ralhrang motor bomb an puah hnawh i ralhrang 30 hrawng an thi, tiah PDF-Gangaw nih nihin ah thawngpang an chuah.

“PDF-Gangaw, CNF le kiangkap mipi ralkap pawl i bawm in SAC ralhrang motor bomb kan puah hnawh i minung 30 hrawng non ah an i chuah. A dang hliam a pumi an tampi,” tiah PDF-Gangaw nih cathanh an chuah.

“SAC ralhrang pawl bomb puah hnawh an ton hnu ah miakpi in an rak kah len hna nain hliamhpu um loin himnak hmun ah kan phan kho,” tiah thawngthanhnak ah an langhter chih. SAC ralhrang motor bomb an puah hnawh lio ah kiangkap i mipi ralkap pawl nih CNF le PDF-Gangaw cu an bawmh ve hna.

SAC Ralhrang Kut in Thantlang Khuami Minung 6 an Nunnak a Liam Cang. Aluancia August 25 in September 30 tiang ah Thantlang khuasa minung 6 cu SAC ralhrang kut in an nunnak a liam hna. A nunnak a liammi hna cu: (1) Pa Van Bawi Thang (kum 10); (2) Pa Uk Lian Kam (kum 14); (3) Pu Hlei Bik; (4) Pastor Cung Biak Hum; (5) Pu Ral Tu (kum 77)
(6) Pu Hram Cung (kum 59).

Thil Sining; (1) Van Bawi Thang (kum 10): August 25 ah Thantlang khuachung ah SAC ralhrang nih meithal le bomb an kah ruang ah meithal kuan nih a khen i a nunnak a liam. (2) Pu Hlei Bik le Uk Lian Kam (kum 14): August 25 ah SAC ralhrang nih an kahmi bomb innleng ah chuahnak ah a puak i an nunnak a liam. A dang minung 11 hliamhma an pu hna.

(3) Pastor Cung Biak Hum: September 18 ah Thantlang innkaang meithah bawmh ding in a kal lio ah SAC ralhrang nih an kah. A sui kutdonghrolh lak awkah a kutdong an tan. Phone le suimilam an lakpiak chap. (4) Pu Ral Tu le Pu Hram Cung: September 29, Hakha in Thantlang an rak tlun lei ah Thantlang khualuhnak pawng ah SAC ralhrang nih an kah hna.