Mozambique Ah Rili Chung Tilawng Pilnak In Minung 90 Leng An Thi. Mozambique chaklei hmunram rili chungah tilawng pakhat cansualnak tongin a pil caah minung 90 naak tlawmlo an thi, tiah ṭuanvo ngeitu hna nih an chim.
Tilawng chungah khualtlawng minung 130 leng an um i, a tutiang ah 5 lawng an chanhchuah khawh rih hna. Nampula ramkulh ngal-eu zawtnak hrik hrial dingah a rak zaam mi hna an si, tiah kan theih.
2023, January thla thok khan Nampula ramkulh hi ngal-eu zawtnak nih a tlunhhnawh hna caah ngakchia telhchih in minung tampi an rak thi, tiah ṭuanvo ngeitu hna nih an chim.
Ngal-eu zawtnak hrik hi kum 25 chungah a fak bik lio caan a si 2023, October thla thok in zawtnak hrik kai mi 13,700 tluk an um i, mi 30 leng an nunnak liam cang, tiah UNICEF nih a langhter. Lungmili Post
Thawngpang dang: SAC Ralkap Nih Shwebo Peng, Shartaw Khua Mi 5 An Thah Hna I Inn 400 Leng An Khangh. Sagaing ramṭhen, Shwebo peng, Shartaw khua mi 5 cu SAC ralkap nih an thah hna i inn 400 leng an khangh.
April 6 ni ah SAC ralkap cu Shwebo peng, Shartaw khua ah rallam sial in an lut i khua mi U Win Khin, U Ung Maung, U Naung Naung Htun, U Soe Aung le Daw Nyunt Yin cu an tlaih hna i an thah hna hnu ah inn 400 leng an khangh, tiah theih a si.
“Thah a tong mi hi minung 5 an si i kum 80 cung le kum 90 cung a zaam kho lo mi tar pahnih cu meikhangh in an thah hna, a zeng mi pakhat telh in minung pathum cu meithal in an kah hna hnu ah tikhur ah an thlak hna, khuapi ning ti tluk in inn an khangh i inn tlawmte lawng a kaang lo mi a si,” tualchung mi pakhat nih a chim.
“Cu pin ah April 5 ni ah Magway ramṭhen, Pauk peng, Shwelan khua ah SAC ralkap pawl rallam sial in an lut i inn 20 leng an khangh, tualchung mi cu a himnak hmun kawl in an zaam dih,” tiah tualchung mi pakhat nih cun a chim. The Chin Post