Rev. Kep Lian Thang ttialmi Vice President Henry Van Tthio kong cauk ka rel ve i, khua tampi a ka ruahter ngaingai

Rev. Kep Lian Thang ttialmi Vice President Henry Van Tthio kong cauk ka rel ve i, khua tampi a ka ruahter ngaingai. A nunnak le konglam hi cawn le zohchun awktlak ngaingai si. Cu chungah, tlawmpal ka van langhter duhmi cu: 1. Pathian ai bochannak, 2. A nu thlacamnak, 3. A dirpimi dinfelnak, 4. Theidan ngeih lonak, 5. Ram sersiam le tthanchoter a duhnak tbk hna hi an si.

Cheukhat news le media nih Tikir Tidil le UPC Biakinn ruangah an rak soisel in mawhchiat ngai, nain Lairam ah kohhran dang caah bawmhnak a tuahmi vialte le hmun dangdang i tthanchonak a tuahmi vialte he tahchun ahcun, pipa cherhchan in rak soiselnak ding ah ka van ruat lo. Kum 2025 tiang karlak a rianttuan dingmi nih a tuanbia cu thil ttha tampi he Pathian nih pehzulhter hram ko seh. Note: Keimah tam tuk chim cu ttha lai lo, a konglam cauk ngeih le rel cio tu rak i-zuam uh. By – Van Nun Lian

Relchap lo cu a pam tuk hringhran. Tthanchonak Lam Pathum; Tulio vawlei ah a tthangcho bikmi, rummi bik le tthawng bikmi timi hna hi, an dirhmun pehtlai ah thil tampi hoih in chim khawh si. Cu chungah thil pathum langhter ka van ka duhmi cu: 1. Cauk/capar rumnak – cauk le capar hi tampi an ttial in zamh. Cun, cauk le capar a ttial ve lomi nih tampi an rel. Theihhngalhnak (knowledge), information le thiamsannak (science) ah an rum in sang. Ruahnak le tiori ttha cem timi pawl cauk le capar hna cu sianginn ah cawn an si. Laimi zong hi cu cauk le capar ttial, chuah le rel ah tthawng in rum usihlaw, chan raulo ah kan tthangcho lai. News bultan le hnatun ngaih lawng in kan kal peng rih ko cun, kan tthanchoning a khulfum pah rih lai. Cun, miphun dang ttialmi cauk le capar lawng zong rel huam tuk ding si lo. Capar le cauk bak in “critics” zong hi hehchet tiah i-pek le i-tuah ding si, ruahnak thar a chuahnak ding ah.

2. Ningcang hruainak – siangpahrang, ramuk le ralkap uknak tang nakin nangcang hruainak ahhin tthanchonak, zalonnak le duhdimnak a tam deuh (party pakhat uknak van hrial rih usih). A tthangcho hmasa bik le rum hmasa cem ram le miphun kan timi hna zong hi ningcang hruainak in a kalmi an si deuh. Hlethlainak le zalong in thil tam deuh zong tuah khawh si. Cun, tiori le ruahnak (idea) tampi zong chuahpi le chim ngam a si. Cu bantuk nih thil thar tampi a hrin. Ningcang hruainak ahcun zalong in duhnak langhternak le lamzawhnak zong a um kho. Meitel, cozah, ralkap le thuam (uniform) ttih in minung nun a si lo, ningcang hruainak ahcun.

3. Lungput onnak (open-minded) – minung cu tuaktannak le hmuhning ah ai ralkahmi kan si cio hna. Cun, kan herhmi, duhmi le kawlmi zong ai dang cio. Cu tikah, lungput ong in um hi a rak biapi tuk. Ai kalhmi le zuamcawhmi thil um tikah, lungput onnak um lo ahcun, huatnak, tthennak le ralnak tampi a um kho. Lungput le ruahnak ong ngai in um khawhnak caah a herhmi cu cauk le capar tampi le phunphun relnak hi si. Theihhngalhnak ah a rummi hna hi theihthiamnak le ruahthiamnak zong “soiselnak, dohdalnak, biadohnak le critics” tbk um tikah, an ngei deuh. Nunzia, lungput le thil hi ai thleng khomi an si caah, lungput onnak in thil hi cuanh le kherhhlai a biapi fawn. Laimi zong hi lungput onnak ah tampi kan herh. Note: Biafunnak he rel na duh ahcun, “Chin Kristian Apologetics” page ah rel khawh si lai. Credit: Van Nun Lian