Rev. Dr. Thawngling Mualhlun: Hrin Kan Si Ve Cang Maw?

Sermontawi: HRIN KAN SI VE CANG MAW? “Nau na pawi lai i fapa na hrin lai i a min ah Jesuh na sak lai” (Luka 1:31).
“Jesuh nih cun, biatak tein, biatak tein kan chimh: Ahohmanh hrinṭhan a si lo ahcun Pathian Pennak kha a hmu kho lai, tiah a leh” (Johan 3:3).

Unau hawile hna, Jesuh chuahcam kan lawmh hi lawmh phu hrimhrim a si. Covid 19 tlangrai lio ah kan lawmhning cu aa dang ngai lai nain zeitin kan lawmh zong ah lawmh a phu mi chuahcam a si. Nangmah le keimah chuahcam hmanh pei kan thiam khawh chung in kan lawmh tawn hi. Van sunparnak vialte kaltak in kan ca ah a rak chuakmi kan Bawipa Jesuh Khrih, Pathian Fapa chuahcam cu kan lawmh hrimhrim ding a si bak ko. Zumtu hna chimlo vawlei hmanh nih amah lawmh in a rak lawmh ve cu. Jesuh chuahcam hi vawlei nih a hngalh ve bak ko.

JESUH CU NU CHUNG IN HRIN A SI. Kanmah bantuk tein Jesuh kan Bawipa hi nu chung in a hong chuak ve. Asi nain kanmah bantuk in a chuahnak hi ai thoknak a rak si lo. Anih cu zungzal in a rak um cangmi, a hramthok tein a rak um cangmi pa a si. Bia cu minung ah a hong cang i, kan lak ah khua a rung sa (Jn 1:14) timi tu khi a si. Minung ah ai can duhmi hi zeidang ruang silo in nangmah le keimah nunnak ding caah a si. Rak i cang hlah sehlaw nangle kei hi zei huahdah kan huah hnga mu.

JESUH CU PATHIAN FA SINAK IN HRIN A SI. Kan Bawipa Jesuh hi vawlei pa a ngeimi a si lo, minung pa nih ngeihtermi le hrinmi a si lo, Joseph cu a pa ei a si. A pa taktak cu Bawipa Pathian a si i, Thiang Thlarau in a hrinter mi a si. Mary cu ngaknu thiang a rak si, Jesuh a pawi hlan tiang. Pathian cu a cung ah a lung a tling i, Thiang Thlarau in nau a pawimi a si (Luka 1:34,35). Ngaknu thiang in a chuak timi hi biapi taktak mi pakhat a si ve.

JESUH CU KHAMHTU SIDING AH HRIN A SI. Matthai 1:21 kan zohtik ah Bawipa Jesuh a hrin channak kan hmuh, cucu Khamhtu siding ah a si. Vawlei a um lio ah thil lianngan tampi a tuah ta, mizaw a dam ter, rawltam mi rawl a pek hna, mithi tiang in a thawh ter hna. Asi nain cu vialte lak ah a liangnganbik thil cu a tlaumi khamh awk ah a hrinmi hi a si.
Hawile,

JESUH CU NU CHUNG IN HRIN A SI, PATHIAN FA SINAK IN HRIN A SI, KHAMHTU SIDING AH HRIN A SI. Haleluia! Ulenau, Nang le kei teh HRIN KAN SI VE CANG MAW? Vawlei hrin cu kan si cang nain Cucu zungzal ca ahcun a za lo. Thlarau in HRIN mi lawng nih zungzal nun a co lai. Cucu Bawipa Jesuh nih Johan Thawngtha chung ah a kan chimhmi cu a si: HRINṬHAN na si lo ahcun… a timi kha. Lenglei sawhsawh in cun khamhnak co khawh a si lai lo. Ti le Thlarau in hrinṭhan ve hrimhrim kan herh ko.

Tukum Christmas kan hman tik ah zei dirhmun he dah kan hman? Jesuh hrin a si chan hi kan fiang taktak maw? Rak i chek ve. Bawipa nih sunparnak co dih ko sehlaw reltu dihlak caah thlaraulei thluachuah hmuhnak ah cang hram ko seh. Amen. Khrih ah nan hawi, Thawngling Mualhlun, CEBC Indianapolis, December 26, 2020.