Rev. Dr. Stephen Hre Kio bia; dai tein um ziar awk asi lo!

Rev. Dr. Stephen Hre Kio bia dai tein um ziar awk asi lo!
============
Laimi kanpa bik, Rev. Dr. Stephen Hre kio bia dai tein um ziar awk asi lo. Zei tal kan tuah khawh ve mi aum maw? Khuaruat tti, Bia iruah tti tuah hna usih. Atu lio kan caan hi cu Amiphun, Atlang in afa bik ah akhua hruaitu Upa tiang hi dai ziar awk attha lo. Zei tal kan tuah kho maw? Tiin, khuaruat thiam ahau ko.

Azei maw caan ah cun, hruaitu Mifim, mirum nih an theih lo mi, tei nak hi mi nih zeirel lo pa misifak pa te sin zong ah Pathian nih theih nak apek khawh tawn ko. (Phunchimtu 9:15. Cu Khua chungah cun misifak te asimi Mifim pakhat hi aum i afim nak in khua cu a luatter khotu ding a rak si.

Sihmansehlaw ahohmanh nih cu misifakpa cu an ruat lo). Kan philh sual Mifim hna an um sual maw ruat ding. CCOC Chan ah AD kum 2000 tling hlan ah Chinram cu miphun dih lak Ceu dih cang seh an ti. Pathian thawng in Khrihfa kan si dih aceu dih cang.

Atu 2022 chung ah uknak ttha lo Min Aung Hlaing sal luat dih ding in, Biatak tein, kan miphun caah mission Rian kan ttuan ahau rih ko. Chin miphun cu Zei kan tuah lai paoh ah Pathian sin thlacam nak in athawk hmasa tu miphun kan si. Kan ti kho ko. Thla kan cam lai ka doh lai kan tei lai.

Ralhrang Hna Nih Akan Teilo Caah Strategy Thar An Thlen! Raltuknak mawtaw tampi kan hmang lai, miakpi tha zaang le ralkap tha zaang kan hmang chih lai i, Vui sual rual dum le hau bauh in kan bauh hna lai, ti kha ahmasa bik an strategy cu a si. Cu ticun Hakha le Mindat in an rak kan nam tikah fak taktak in kan hliam hna caah, ral hmai an fong kho tilo. Cucaah an raltuk ning strategy kha a thar in an hun thlen. A tu an strategy thar hi kan zoh tikah Mawtaw ‘Cars’ kha hmang tuk loin kei in raltuknak ah kal in, acunglei in vanlawng nih bawmh hna ding kha an itimh.

Atutan an strategy hi an hlawh atlinglo ahcun strategy thar kha an suai kho lem ti lailo, ti hi zumh ciomi asi. Mawtaw in kan kal tikah a thi lomi kan tam pinah hliamhma zong tampi kan tuar, cucaah kei in kan kal ahcun athi lomi kan tlawm deuh lai i, ral bawmh aherhmi kha vanlawng nih akan bawm chih lai, ti khi an itimh mi cu a si.
Cucaah vanlawng tha zaang kha tamdeuh in ahmang teh lai.

Ralhrang pawl nih hmai an kal ngam lonak hmunhma kha vanlawng nih ‘bomb’ athlak hmasa lai, ral bawmh an herh tikah vanlawng in ‘parachutes’ in ralkap kha athlak teh hna lai, ‘ti hi zumh a si. Vanlawng ahmang tikah tihding asi hrim loh. A ruangcu; kan nih ral kan tukning hi,guerrila ‘ral thli’ in ral atukmi kan si caah kan umnak hmun kha fiangfai tein an theih lailoh caah khawika zawn ah dah bomb ka thlak lai, ‘ti kha atheih lailoh. Ruahdom in bomb thlak sehlaw, A zen le kuan kha alakin va hlawnh men khi asi caah vanlawng tha zaang kha santlainak a tlawm ngai teh lai.

Cucaah kan Chinram ahcun vanlawng tha zaang hi hmual aneituk lem lailoh. Vanlawng tha zaang hi hmual aneih lo ahcun kei in ral ram a kalmi ralhrang pawl hi fawi tein kan kah khawh cang hna lai. Aruangcu; ralhrang pawl cu thawng pe tu an neih loh, an vawlei asi lo pinah fing le tlang zong an theih loh, Hi hi kan teinak hna ding kan lam pakhat cu asi.

Afghannistan le Irag raltuknak ah vanlawng an hman ning kan zoh tikah, hmual aneihnak khi atlawm ngai, Ramtang hriamtlai ‘ral thli’ pawl an umnak kha fiang in an theih lo caah bomb an thlak mi kha alak ah ai cang hi atamtuk,, cucaah ahnu ahcun vanlawng tha zaang kha an hman duh tiloh. Khatlei ah ralthli pawl nih kan umnak hmun akan theih cang, ‘ti kha an theih tikah an ‘sakhan’ kha an chuahtak i, hmun 2/3 ah an ithen i ralthli in an vakah hna tikah khoika ah dah bomb kan thlak lai, ‘ti kha an theih ton lo caah vanlawng tha zaang kha an hmang kho ton lo.

Cun hmai suangin ral atuk mi hna kha, vanlawng parachutes in ral bawmh ding ah van lawng cung in athlak hna tikah, ral thli pawl nih mahkazawn ahhin athlak hna lai, ‘ti an zumhnak paoh ah bomb an kamh i, vanlawng in ralkap an thlak mi hna kha, bomb rawl ah an i cang tikah ahnu ahcun vanlawng in ral bawmhtu ding zong athlak ngam ti hna lo. Cucaah Afghannistan cozah an sunghnak aruang ngan ngai pakhat zong kha vanlawng tha zaang an hman khawhlo ruang le an ralkap hmaikal pawl an bawmh khawh hna lo caah a si.

Ralhrang pawl nihhin zeibantuk straregy zong va thlen ko hna seh, akan tei lailo, Aruangcu; Guerrila ralkap kan si, Kan vawlei kan fingtlang kanmah ta asi rih, An lungput le kan lungput hrim hi BAWI ruahnak le SAL ruahnak bantuk in ai thlau rih fawn, Thawngpang vialte kanmah ta an si rih hoi, Cucaah raltuknak ah aherhbik mi vialte hi kan kut ah a um dih, Cucaah an strategy suaimi le an van lawng tha zaang hi pakhathmanh tihding asi loh.

Kan ral tukning kan zohtikah ahramthawk ahcun ikhamnak ral lawng kan tuk khawh, Asinain nihin ni ahcun ral hmai ser in kan va doh khawh cang hna, Cucaah ral kantuk ning step 2 ah kan kai cang, Cucaah ramdawtu pasal tha hna, nan lung dongh hla seh, ‘teinak lam kan zawh chin lengmang cang. Credit: Van Neih Thang