Rev. Dr. Rualuk: Christmas Le Nichuahlei Mifim Hna

CHRISTMAS LE NICHUAHLEI MIFIM HNA. “Herod siangpahrâng a țuan lio ah Judia ram Bethlehem khua i Jesuh a chuah hnu ah, ngaihmanh, nichuahlei in mifim kha Jerusalem ah an ra i “Judah Siangpahrâng a chuakmi cu khuazeiahdah a um? Nichuahlei ah a arfi kha kan hmuh i amah bia dingin kan ra,” tiah an ti. Mt. 2:1-3

“Arfi an hmuh tikah a ngan tak takmi lomhnâk in an khat. Inn chung an luh tikah, Naute le a nu Mary he an hmuh, cun an bok i amah cu an biak. An robawm kha ong in Sui, Frankincence le Mura kha laksawng an pêk,” Mt. 2:10-11.
Cathiang nih fel le fiang tein a kan chimh bangin Bethlehem khua sațil rawlpeknâk inn ah a chuakmi Nau te a hmu i a ngan tak takmi lunglomhnâk he Christmas a hmangtu pa hnihnâk cu nichuahlei mifim hna an si. Zeizat set dah an si ti kha Baibal nih a chim lo nain an pêkmi laksawng phun thum Sui, Frankincence le Mura nih a fiantermi cu mi pathum si dawh bik an si.

Nichuahlei mifim hna tiah ti an si i Israel ram in nichuahlei ah cun Assiria, Babilon, Persia le Baibal zongah a ummi India tiang zong a si i khuazei ram set in dah an at timi hi tuanbia dah ti lo Cathiang nih a chim lo caah fiang tein kan hngal lo ti hi a him bik. Bethlehem khua sațil zuatnâk inn ah a chuak i sațil rawl pêknâk kuang ah an ih termi, Christmas a ngeitu Khrih Bawipa an hmuh khawh nâk hnga, cu hmun ah tukhâl hna a hruaitu cu vanlei speaker nih an chimmi bia, Pathian Bia a si lio ah nichuahlei mifim hna a hruaitu cu van arfi a si.

Hla sertu nih:- Fiang tein hmu kho u sih law, Vulei dihlak biakinn a si, Sermi thil vialte hna zong hi, Pathian lamkaltu an si dih, tiah a rak ti bangin sermi Vân arfi zong khi nichuahlei mifim hna caah cun Christmas a ngeihtu Khrih an hmuh khawh nâk ding ah Pathian lamkaltu a rak si. Fimthiamnâk zeihmanh an ngeih lo ruang ah mi duh lo le nautat bik tukhâl rian a țuantu hna le a hlei khun in fimthiamnâk a ngeitu nichuahlei mifim hna kha Bethlehem khua sațil zuatnâk inn ah an phân ve ve i Christmas a ngeitu Khrih an hmu veve timi hi țha tein na ruat bal maw?

Țha tein ruat set set hmanh na khuariah a har hrim hrim ko lai. Țha tein na ruah i thil sining fiang tein na hngalh hnu hmanh ah na khuaruah a har lo ah cun hlengtu nih a hlen ruang ah thlarau lei ah mihrut ah a canter mi na si tinâk a si. Fiamthiamnâk a baumi tukhâl hna a hruaitu cu vânlei speaker chimmi bia a si i a hlei khun in fimthiamnâk a ngeimi nichuahlei mifim hna a hruaitu cu vân arfi a si lio ah an hmuhmi cu Christmas a ngeitu misual Khamhtu Khrih Bawipa kha a si.

An panhnâk lam ai dang nain an panhmi le an hmuhmi cu ai khat ko. Nichuahlei mifim hna i palhnâk le a chuahpimi
“..nichuahlei i an hmuhmi arfi kha, Naute umnâk cung a phâk i a dir hlân tiang an hmai ah a kal. “Mt. 2:9. A cunglei Cathiang kan hmuh bangin hruaitu arfi nih khan nichuahlei mifim hna kha siangpahrâng Herod inn si loin Bethlehem khua i sațil zuatnâk inn i phâkpi kha a timhmi a si. Asinain nichuahlei mifim hna nih khan hruaitu van arfi hruainâk si loin an fimthiamnâk le khuaruahnâk hmangin an tuakmi “siangpahrâng cu siangpahrâng inn ah hrin a si tawn” timi khuaruahnâk nih a hruai hna i Bethlehem khua ah Sațil zuatnâk inn an phâk hlân ah siangpahrâng Herod inn tu ah an phân hmasa.

Nihin zûmtu tampi zong a palh kho lomi hruaitu Cathiang le Thiang Thlarau hruainâk zoh loin, kan fimthiamnâk le khuakhân lairel thiamnâk kha hmai ah chia in kei ka ruahnâk ah cun, kei ka zumhning ah cun ti le kei ka pomning ah cun kan timi hna nih lam a kan tlau ter tawn. “Baibal nih chim a duhmi cu” tiah ti loin “Chim ka duhmi cu” tiah kan ti tawnmi hna hi Cathiang hruainâk in lam a kan tlau tertu phun khat a si. Nichuahlei mifim hna nih hruaitu van arfi zoh loin an fimthiamnâk i rinh in lam an pialnâk nih khan tuk a sûm tak takmi thahnâk, Judia ram chung ah sualpalhnâk a ngei lomi pa ngakchia kum hnih tang lei vialte thahnâk kha a chuahpi.

Nihin ah Hruaitu Cathiang le Thiang Thlarau zoh loin Baibal sianginn ah dikkiri sâng sâng a latu cheu khat hna nih an fim thiamnâk le cawnnâk lawng i rinh in mi an hruai tik ah rel cawk lo thlarau kha a mit lomi hell lam ah an hruai cang hna i an hruai ciahmah lio i an hruai țhân te hna lai, ti hi na ruat bal maw. Asinain nichuahlei mifim hna kha Herod inn in an chuah hnu ah hruaitu van arfi an hun hmuh țhân i Baibal nih ” A ngan tak takmi lomhnâk in an khat” tiah a ti i hruaitu arfi hruainâk thawng lawng lawng in Christmas a ngeitu Khrih kha an hmuh i an ro sung bik zong chuah in laksawng kha an pek.

Nihin ah kan nih zong nih a palh kho lomi hruaitu Cathiang le Thiang Thlarau lam hruainâk hi kan zulh ah cun Christmas a ngeitu Khrih kan hmuh lai i a ngan tak takmi lomhnâk in kan khat lai. Sui le Frankincence le Miru kan ngeih lo hmanh ah kan ngeihmi ro sung bik kan lungthin hi Christmas a ngeitu Khrih sinah kan pek hrim hrim ko lai.
Careltu vialte nan cungah Christmas daihnâk le lomhnâk um ko seh. CHRISTMAS LE SIMEON timi in peh a si țhân te lai. Credit: Rev. Dr. Rualuk