Rev. Dr. Hai Vung Lian Cu Doctors Hospital West In Select Specialty Hospital ah An Thial Cang

Dr. Hai Vung Lian cu tuni ah Doctors Hospital West in Select Specialty Hospital (Downtown) ah an thial cang tiah an nu Hannah Lian nu sin in thawng kan theih. Damnak tlamtling a hmuh khawh nak lai thlacam ko rih hna usih. A nupi le a fale ca zongah fak piin thlacam bawm rih ko hna usih.

Vice President Thawngthanh mi a si. Van rel law a fiang ko lai dah tiah ka zumh. Tuchun cu thawngpang thar kan van thei than le khua ruah awk bak kan hngal loh. A thalei kam tu si hram ko seh ti lawng kan chim khawhmi asi ko. Atu lio i Rev. Dr. Hai Vung Lian a um nak Hospital hi a ngan tuk lo mi asi. A fat pah caah mizaw hi an dam deuh ko ahcun caan saupi chiah awk an tha tuk loh. Atu zong hi, tuchun ah a hrom vih ( tracheatomy ) cu tlamtling tein an vih cang i thaizing hin cun sizung dangah kan thial cang lai an ti. Mahcu cu lungre a van thei pahmi cu asi. An thialnak ding ahhin ICU thiamthiam ah a um lai ti asi. Amah belte atu a um nak hi caan sau um a ngah lomi asi i an thialnak sizungah hincun caan sau deuh ICU ah um a ngah cang lai an ti. A dam deuh in Regular Floor ah kan thial te lai an ti. Caan sau deuhpi zong a um kho men, van that le caan tawi teah regular floor ah thial khawh asi hnga. A dam deuh ngai ko tu ahcun a kaa in rawl cu kan pek te lai ti asi.

Cuhlan chung vialte thla a kan campitu nan dihlak cungah kan lunglomhnak kan van langhter than. Hi pinlei zong hi nan thlacamnak kan herh peng ko rih. A nunnak le a damnak taktak cu Pathian kut chungah a um ko ti hi kan zumhmi asi ko. Nan thlacamnak vialte Bawipa nih an theihpiak hna lai i a fapa zong vel a ngaih than lai i damnak tling he sizung in a chuak te ko lai ti hi kan i bochanbik mi cu asi ko.

Relchap ding thawngpang a peh, CBC USA nulepa le ulenau vialte hna, Bawi Khrih min in nan kut kan tlaih hna. Kan senior pastor Rev. Dr. Hai Vung Lian damlonak he pehtlai in siaherhnak taktak le dawtnak thinlung taktak he pumpak in siseh, khrifabu in siseh thla nan kan campiaknak thawng kan theihmi nih kan hna a kan ngamter hrinhran. Nan dihlak cungah kan i lawm tuk ti hi van chim hmasa than ta ka duh ko. Thinlung tak tein thla nan camnak Bawipa nih a theih ko. Kan pastor pa zong nikhat hnu nikhat cho lam panh in a sining kan theih ko ti kha van in hrawmh ve hna kan duh ko hna.

Tuchun hi zanlei suimilam 1:00pm tluk ahkhan doctor te nih amah pum chungah oxygen 89% a um i seh in 70% kan pek an ti. Zanlei suimilam 6:00pm tluk hrawng ah khan amah pum chungah oxygen 92% a um i seh in 70% kan pek an ti. A thatur le a thi ( vital ) cu a tha dih ko an ti. Amah belte a ka in a cuap tiang oxygen peknak hri ( ventilator ) an hrolhmi ruangah hngilh sii an pek peng i amah cu zeihmanh hngallo in an ihter ko rih. Kha ti an umter lawngah thlop awk a tha ding asi caah asi.

Sizung lei nih an kan chimh mi ( oxygen pekmi percentage le amah pum ah a ummi level tbk ) hi medical lei cawnnak a ngei ve lo kan caah cun theih fian a har ngaimi asi caah oxygen level kong he pehtlai in a percentage ah khin buai tuk lem loin amah mipum dirhmun le sining ah nizan le tuchun a dangmi a um maw ti tu ahkhin biapi deuh in kan ruah khawh ahcun a tha deuh hnga ti zong van chim chih ka duh. Lungthin tak tein Pathian sin tu ah thla cam hna usihlaw a damnak ding le a nunnak ding cu amah kut ah a um mi asi ko. Nan dihlak cungah kan i lawm tuk. Bawipa nih thluachuah in pe ko hna seh! Lunglomhnak chimcawklo he, Nan dihlak cungah kan i lawm. Richard Ngun Lian
ECBC, Columbus,Ohio.