Rev. Dr. Hai Vung Lian Caah Thlacam Bawmhhalnak

Thlacam Bawmhhalnak USA, Ohio, Columbus , Emmanuel Chin Baptist Church Senior Pastor Rev.Dr.#Hai_Vung_Lian cu a tulio Covid -19 zawtnak in a zawtnak ah Sibawi te nih dam lei panh lo in a zual lei deuh asi ti in kan theih caah kan lung ai nuam kho hrim loh. Damnak tuante a hmuh khawhnak lai Zumtu dawtu nan dih lak nih Pathian sinah thlacamnak in bawm cio hna usih tiah kan sawm hna. Credit; Lian Iap

A tu kan nih Myanmar Agape Ministries le Orphanage cu a cunglei thawng kan theih le cangka in kan ngakchia hna he thlacamnaak kan ngei thluahmah ko hih. BAWIPA PATHIAN nih damnaak tlaamtling pee hram ko seh.

Relchap ding capar a tha kho tuk. Atu lio kan herh bik mi biafang pathum: Dawt (Love), Bawmh (Help), Zohkhenh/zawnruah (Care) Covid-19 boruak nih a chuahpi mi pakhat cu “thinlung baatnak” a si.

A cheu cu khahlan tein lungretheih, nun thilrit, le lungthin hma a tuar cang mi an um i a tu boruak chungah an tuar ning a fak chinchin. Pumpak thinlung lei retheih lawng siloin chungkhar, pawngkam, rualchan cingla kong ah re a thei mi an um len.

A cheu cu a tu boruak ruangah an i tinh mi a tluang ti lo. Ruahchannak a dong i khua an ruah mi a pingpalo ah aa su. Thinphannak, nun rihnak le lung uamnak hna hi thuk pi in an tuar. Pawcawmnak, ngandamnak le zumhnak kong ah biahalnak tampi an hung ngei. Nun a rit. Lungdongh a fawi. Ruahchannak a dong thluahmah.

Biangai tein, atu lio ah hin pum in a dam nain thinlung a baa mi kan tampi lai.
Khat lei ah, hi lio caan te ah hin Pathian umpinak a tep mi si kan herh i Pathian fa/minung kan sinak langhter a hauh bik lio caan a si ve. Mi tampi cu an hmurka in an chim lo nain an nun a rit cio ko. Cu cucaah, atu lio caan hi “Dawt, Bawmh, Zohkhenh” ti mi biafang pathum in nun samh a hauh lio caan a si. Cu nih cun kan pumpak nun a zaangter, a damter i chungkhar le pawngkam ca zong ah ṭhatnak a chuahter.

1. Pakhatnak biafang cu “Dawt (Love)” a si. Nangmah le nangmah i daw: Pathian muisam ken na si nak kha i tlaih peng. A tu na ton mi ruangah nangmah le nangmah man na thumh tuk ko lai nain Pathian caah man sung na si. Man ngei na si. Na sining muru ah man ngei cia na si.

Na chungkhar kha daw: Atu lio caan te hi chungkhar tling tein um caan a si i pumhnak tuah a herh caan a si kan ti nain, khatlei ah chungkhar buainak (Domestic violence) a chuak kho mi caan zong a si. Cu caah, chungkhar hi daw deuh ko hna u sih. Caan pek lawng a za lo. Lawmhnak le daihnak a sertu si kan biapi.

Na pawngkam le na hawile daw hna: Na pawngkam zong kha zoh hna law daw ko hna. An dawtu lawng dawt na tim ahcun na thinlung a cheubang lawng a dam lai. An remlotu, an huatu zong kha daw ko hna. Caan chia chung ah kan caan a ṭha bik in hman deuh ko hna usih. Dawtnak leiba dah ti lo a dang leiba ngei rih lo in, thinlung baatnak i damter cio u sih. Dawtnak lawnglawng nih sining a hrawmh kho. Velhle siloin a tak in dawt i zuam hmanh! Na ral hmanh khan na hawi ṭhabik a cang kho ko.

2. Pahnihnak biafang cu “Bawmh (help)” a si. Thinlung baatnak a dam khawhnak lam pakhat cu “bawmh” a si. Na tuar mi nakin na pawngkam i bawmh a herh mi hna na cuanh tikah le na bawmh hna tikah na lung a dam tawn lai. Hi hi, psychologist le psychotherapist hna zong nih an chim tawn mi a si.

“Kan cung i a tlung mi fahnak lawng kha kan thutpi (cuanh/buaipi) a si ahcun fahnak lawnglawng aa chap. Asianin, kan pawngkam le kan Chungkhar ah kan tuah khawh mi kan tuah i kan ṭuan tikah kan fahnak zong a zor tawn.” Cu cucaah, zeibantuk mi na si zong ah “Bawmtu” na si a biapi tuk. Cucu nangmah le nangmah na bawmh ve tinak zong a si.

3. Pathumnak biafang cu “Zohkhenh/zawnruah (Care)” a si. Vawlei cung ah a fakbik mi bia pakhat cu, “Na ka care lo” ti hi a si. Lai dictionary ahcun “Zawnruahnak” tiah an leh. Kawl holh in cun ဂရုပြုခြင်းti a si. Paul nih, “Ka derthawm caan ah hin ka ṭhawnbik caan a si” a rak ti. A sullam cu fahnak a tuar lio zong ah mi zawn a ruat. Cu zawnruahnak nih cun nun man a ngeih ter chinchin.

“Keimah ca” ti caan a si lo. “Kanmah ca” ti mi a bu nun ah kan lung kan mer caan a si. Zeicahtiah, nangmah lawng na si lo hih. Kan in dir kamh! ti mi Lungput in kan i dam ter cio ding a si. Nangmah le nangmah na care deuhdeuh na dam deuhdeuh lai. Na pawngkam na care deuhdeuh zatlang a dam deuhdeuh ko lai. Zeihmanh aa sai lo (pehtlai lo) mi bantukin kan nung ahcun aa phetchem mi kan si ko lai. Cucaah, i care deuh ko usih!

Atu lio kan ton mi boruak nih a hohmanh a thleidan hna lo. Mirum, sifak, catang sang, catang niam, mi fim, mi hrut a zapi tein a huai cuahmah. Kan pum lawng hlah maw a kan tlunh tiah, kan thinlung zong fak taktak in a hun kan hrawh. Hi lio caan te ah i daw hna usih. I bawmchan hna usih law i care rih ko hna usih. Cucu purai kan teinak sii phunkhat cu a si.  Credit: Abednego Cenhrang

 

Leave a Reply

Your email address will not be published. Required fields are marked *