Rev. Dr. Gordon Za Thio: Ralzam Hna Sinah Biacah!

BAIBAL THEIHTLEI; 105. Ralzaam Hna Sinah Biacah
==========
1 Siang 19:3 = Khi tikah a thin a phang i a tho i a zaam i Judah ta asimi Beersheba khua ah a phan, khi kaah a sinum kha a chiah ta. Vawlei cungah ralzaam hi an um lengmang ko. Arun zong in an zam i pumpak zong in an zaam. Ralzaam lakah profet minthang Elijah zong ai tel. Kha tluk paral tha ziah hme a zaam hnga ti lo awk a tha lo.

Karmel tlangah Pathian nih a umpi i vancung in mei tiang a thlatu le Baal profet vialte zong a that dihtu asi nain nu sual le nu thalo a tih ruangah a zaam daih ko. Ahab nih Jezebel kha Elijah nih Baal profet vialte a thah dih hna ti a van chimh le cangka Elijah sibah mi pakhat a thlah i bia a cah.

“Na nunnak cu annih lak i pakhat nun-nak bantuk ah khan thaizing atutik caan i ka ser lo ahcun, cubantuk in le cunak tam deuh zong in pathian hna nihcun ka cungah tuah ko hna seh,” ati (1Siang 19:2). Cucaah thih a tih i a zaamnak asi. Jeim bia a dik tuk ka ti. “Elijah kha kanmah ban tuk minung asi ve ko,” ati, Jeim 5:17. Aherh lo le, cuu lo zaalo i thih cu Pathian mi hman Elijah zong nih a tih le a zaam. Thih tih ruangah tutan ah Kawlram hmunkip in ram dang le khuadang le ramlakah kan zaam tung hna. Elijah kan hluan ve ko.

Azaammi lakah zumtu zong nan i tel i zumlotu zong an i tel. Zaam hi a herh ahcun zaam ding asi ko. A zaammi soisel a herh lo. A zaammi zong nih i phuhrun tuk ding asi lo. Elijah hmanh pei a zaam ve cu, nan mawh tung lo. Hiti ka ti tikah zaam hi a tha tuk ka ti duhnak asi lo i nan zaam hi nan palh ka tinak zong asi lo. Nihin i kan hrawmh duhmi hna cu “Ralzaam na si zongah Pathian sin in na zaam kho lo,” ti tu hi asi.

Sam catialtu nih hitin ati. “Na Thlarau sin in khuazeiah dah ka zaam khawh lai? Na hmaika hin khuazeiah dah kai thuh khawh lai?” Sam 139:7. Khuazei nan phak hmanhah Pathian sin in kan i thup kho lo ti philh hlah usih. Sam tialtu nih a van peh.

“Vancungah khin hung kai ning tiah, cuka ahcun na rak um ko lai………..Nichuahlei ah khin lodiam in hei zuang ning law, asiloah nitlaknak lei a hlatnak bik hmun zongah khin hei um hnik ning law, cuka zongah cun a ka hruaitu dingah nangmah na rak um thiamthiam ko lai. Aka bawmtu dingah na rak um thiamthiam ko lai,” Sam 139:8-10.

Mizoram nan zaam zongah siseh, Thailand le Tilukram nan zaam zongah siseh, khuate le ramtang i nan zaam zongah
bawm ding in Jehovah Pathian a rak um diam ko cang. Elijah zong meng 40 hrawng ava zaam i hmunphiah kung tang ah thi ding in thla a cam. Ralzaam si cu lung a rawk tuk ko. Asinain hmunphiah kung tang a ihnakah vancungmi nih a tongh i, “Tho law ei tuah,” ati. Atho, khua a van zoh i lunglin in emmi changreu hlum khat le ti thawl khat a hmuh. A ei a din i a it than.

Cun Bawipa vanvungmi ara i a tongh than. “Tho law ei tuah, na khualtlawnnak lam cu na celh sual lai lo,” ati. Cun a tho i a ei i a din i rawl thazaang in ni 40 le zan 40, Pathian tlang Horeb leiah cun a kal (1Siang 19:4-8). Bawipa vancungmi cu Bawipa Jesuh asi ko tiah mithiam hna nih an ti.

Ralzaam Elijah zong a phaknak paoh ah Jehovah Pathian nih a umpi i a zohkhenh bang zumtu ralzaam hna zong Jesuh Khrih nih nan umnak hmun cio ah an umpi ko hna kha mu. Mizo kan unau hna hi Pathian nih a vancungmi hna bantuk in a hman hna caah an ti khawh tawk in an in zohkhenh hna i tluninn an i awnh hna.

Hihi Pathian riantuannak asi ti philh hna hlah usih. Annih zong kanmah bawmtu ah a hman hna hi an thluachuah lianpi asi. Mifir nih an tuk le an denmi a tuammuaitu Samaria mi thapa an hluan. Damiah vuakmi sinak in Samaria mi
thapa si kha kan uar deuh ko cuh.

Vawlei cung ralzaam tampi cu an phaknak khua le ramah an um lan tawn. Mi tampi cu an khua le an ram an hlam than ve. Kan Chinmi a zaammi hi cu kan khua le kan ramah nan kir than te ko lai. Nihin i kan cah duhmi hna cu: Elijah profet lian zong a rak zaam ve bal. A zaam nain Bawipa nih a nihsawh lo, ti le rawl tu a peek i rian tuan
than a fial.

Nannih zong khuazei nan um le zeiinn tang i nan i dor chung zongah kan biak Pathian nih an umpi ko hna. Ti le rawl an peek ko hna. Cucaah nan umbak hmun cio in Elijah bang Bawipa he i hawikomh philh hlah u. Nan sining kha Bawipa chim ko u. Lam thabik ah an hruai ko hna lai tihi asi. Bawipa nih thluachuah he nan umnak paoh ah in umpi in, in veeng ko hna seh. Amen.