Rev. Dr. C Duh Kam: Kum Thar Thawngtha, A Tha Kho Taktak

Kum Thar Thawngtha
2020 Christmas le Kum Thar 2021 kan phan. Laimi tampi nih hmun kip ah BBQ kan tuahnak cu FB ah kan hmuh tung hna. A tha tuk. Laimi cu kan pipu chan in sapherh car a uar tuk mi kan si. Hlan pipu chan ahcun Lairam ah sa a rak tamtuk. Sa hi a car he a hring he an duhning paoh in an rak ei kho. Falam peng Lun khua ah saya rian ka rak tuan lio ah an patar le pawl nih nan khua Thau ram zuur (tlang tibual) pakhat ah ram riah ah an rak kal tiah an ka chimh. Kan no deuh lio ahcun zuur ti a tlanmi sa cu an tam tuk i, zuk neng zong cakei nih a rak seh ngai hna. Nengpi ki tha zong char khawh ding a rak um bal tak. Atu ahcun a um ti lo. Ram sa an dih cang. Sapherh ei ding a har cang.

Pathiaan thawng in ram dang ah kan rak phanh tikah sa cu mei in khangh mi BBQ cu kan uar tuk hna. BBQ cu a tha nain, i dinhmi ti bel hi pumsa a thattu a si sual lai ti cu phan ngai awk cu a si ve. Lairam ahcun kan nulepa nih sapherh car cu khualtlung meh le tihang caah an kenret mi rawl sunglawi a si. Khuazing Pathian tihzahnak an ngei. Khualtlung mileeng cu Pathian vancungmi bantuk in an dawt hna. Cathiam lo an si nain, hi tluk in minung hawi zawnruahnak a ngeimi cu “ca rel thiam lo mifim” an si.

Chan cu a van i thleng lengmang i, carel kho mi lawng mifim ah i ruah chan ah kan van lut. “Lai fim” timi kha kan uar set ti lo. Kan hngal kho ve ti lo. Mifim zatceu lawng kan rak si diam. Hi fimnak cu miphun dang zong nih an ngei theng lo kho men. Kan fale nih an cawn hau ding phun in a um. Vunrang mi hna ruahnak lawng a dik le tha ah kan ruahmi nih a kan hruhternak a tampi ve. Kan Lairam lila ah a si ve ko. Chan cu pei ai thleng tuk fam cu. Aw, a zeiti si paoh ah chan cu van dawi phawt ko usih.

Peter nih Cathiang nih a ti bangin, “Mi vialte cu ram bantuk an si, An sunparnak vialte cu ramlak pangpar bantuk a si; Ram cu a thi i pangpar cu a ṭil, Sihmanhsehlaw Bawipa bia cu zungzal in a hmun.” Thawngṭha nih an chimhmi hna bia cu hi bia hi a si, tiah a ti (I Peter 1:24-25).

Chan kan dawi lai ti zong ah “minung nunak cu ramlak pangpar” bantuk men a si fawn. James nih “Thaizing ah na nunnak cu zei a lawh lai hmanh na hngalh tung lo. Nang cu minmei zaammi bantuk, atute a hung um i a lo zaumi bantuk pek na si ko cu” tiah a kan ti than (Jeim 4:14).

Milung fim lo caah cun BBQ rawh lio ah, dinmi tu hi i hne deuh ko ning” ti a awl te lai. Lai mifim hna nih khual caah sapherh car an i chiah bantuk in kenret ding ruah lo sual a awl ngai lai. Zeitindah kan si ne lai? Ni kum 2020 cu BBQ rawh caan zong kan ngei kho lo. A kum khat ning pi in pulrai nih a kan tlun hnawh. Hi vawlei mifim hna le sibawi zong tampi an thi hna. Minung hi zei ngai tuah kho kan si lonak a lang dih cang. Zeizong thil ti khotu cu Pathian lawng a si ti hi kan fiang dih cang ko lai.

Paul nih “Zeitindah kan nuncan a si ti kha ṭha tein i zoh u. Mihrut bantukin um hlah u, mifim bantukin um u. Atu kan nikhua hi caan chia a si caah, caan ṭha nan hmuhmi paohpaoh kha ṭha tein hman i zuam u. Mihrut si ti hlah u, Bawipa nih tuah hna seh ti an duhmi hna tu kha tuah i zuam u. Zu ri hlah u, zu cu nanmah hrawktu lawnglawng a si ko, Thlarau tu khan khat deuh u. Hla dawh in pakhat le pakhat i chawn u; Bawipa cu hla le aw dawh in nan lung taktak in thangṭhat u. Kan Bawipa Jesuh Khrih min in zeizong kip caah Pathian cu lawm u” (Efesa 5:15-20) tiah a kan cawnpiak mi hi kum thar ahcun kan nun cio awk ah a tha cem ko lai.

Minung kan nunnak ah BBQ le a tihang nak in a mui hmuh khawh lo mi “rawl ka thawtnak” Pathian nih a kan pek mi hi a sunglawi deuh tukmi a si. Zeizong kip ah Pathian cu lawm cio hna usih. A min thangtha ko seh. Credit: Rev. Dr. C Duh Kam