Rev. Dr. Abraham Nih IZip Ai Fuh Sual

ABRAHAM NIH IZIP AI FUH SUAL; Izip nih a hmuhsakmi cu vawlei thil, vawlei sinaak, Sehtan pennaak, Sehtan duhnak kha asi. Kanaan ram nih a hmuhsakmi cu Thlarau pennak, Thlarau nun, biatak ram, Pathian pennak ram kha asi.

1. KANAAN RAM AH MANGTTAAM A TLUNG; Pathian nih Abraham cu a zungzal in Kanaan ram kha peek nain Kanaan ram ah mangttaam faaktukin a tlung (Gen. 12: 10). Pathian pennaak chungah a ummi fale hna zonghi nuamhnak le lomhnak thil lawngte hi kan tonmi asi ve lo, harnaak phunphun kan cungah a tlung ve lengmang. Kanaan ram hi harsatnak tampi a umnak ram asi ve. Zumtu Thlarau nun hi harsatnak tampi a umnak ram asi ve i Pathian bochan buin, Pathian bawmhnaak bochan in khuasaknaak ram asi ve.

2. ABRAHAM CU KANAAN IN IZIP AH A ZAAM (Gen. 12: 10); Hihi thil poi ngaimi asi. Pathian pennak ram chung i a ummi zumtu tampi hna nih tuukforhnaak le temtuarnaak kan ton tikah Izip ram (vawlei thil) ah Abraham bantukkin kal sual a fawi te. Pathian rianttuanmi tampi zong harsat ruang ah an rian an kal taak tawn i vawlei thil ah an i mer tawn kha kan hmuh. Pathian nih Abraham, a peekmi hmun cu Kanaan ram asi, Izip rak asi bak lo. Zumtu hna Pathian nih a kan peekmi ram cu Thlarau ram, Pathian pennaak ram asi ve, vawlei sinaak asi lo. Vawlei sinaak ah na peem sual ve maw?

3. TTIHNAAK IN AN KHAT (Gen. 12: 12); Izip ram an phanh in Abraham le Sarah nihcun an kan thah sual lai tiah an thin a phang. Izip ram cu thinphannaak le ningttihnaak ram asi. Zumtu Thlarau ram i a ummi hna zong vawlei nuamnak le Sehtan ram i kan ka sual ahcun ttihnaak le thinphannaak kha kan cungah a tlung ve lai. Abraham te caah Izip ram ah nuamnak a um lo. Zumtu hna caah vawlei nun ah nuamnak a um kho ve lo.

4. LIH AN VA CHIM (Gen. 12: 13); A nupi, Sarah, ai dawh tuk caah ka nupi asi ka ti ahcun Izip miphun nih an ka thah sual lai ti a phang i Abraham nih a nupi cu a far ka si tiah lih a chim ter. Amah zong nih lih a chim ve. Lihchim sualnak an va tuah. Kanaan rammi Abraham caah cun Izip ram cu lih chimnaak hmun asi. Zumtu tampi zong Sehtan ram i kan kal sual ahcun sualnak kan tuah ve ko lai.

5. A NUPI AN CHUHI (Gen. 12: 14 ff); A nupi cu Abraham nih ka far asi a ti caah Pharoah nih nupi ah ai laak i Abraham kha satil tampi a peek ve. Vawlei sinaak nihhin laksawng tampi an peek ve men ko hnga, asinain na sian lo bikmi, nangmah he pakhat asimi Thlarau tthawnnak (Sarah) kha vawlei nih an chuh ve lai i lungretheihnaak in na khat ve lai. Abraham caah Pharoah peekmi satil maw a sunglawi deuh ai dawh bikmi a nupi dah? Vawlei nih an peekmi laksawng maw a sunglawi deuh, Khrih ah na hmuhmi sunparnak dah?

6. PATHIAN BAWMHNAK IN SARAK A RAK KIR (Gen. 12: 17); Pharoah nih saltil tampi a peek i Sarah cu ai laak. A siang lo tuk ko nain Abraham nih laak tthan khawhnak tthazaang a ngei ti lo. Pathian bawmhnak thawng lawnglawng in Sarah cu a sinah a rak kir tthan. Sehtan sin ah Pathian nih an peekmi Tlarau hmual le tthawnnak (Sarah) cu na sung men lai. Asinan nangmah ttawnnak cun na hmu tthan kho ti lai lo. Pathian bawmhnak lawnglawng in na hmuh tthan khawh ve lai.

7. IZIP RAM IN AN RAK TTHAWL HNA (Gen. 12: 20); Pharoah nih nupi ah Sarah cu ai laak caah Izip ram cu Pathian nih dan a tat hna. Cucaah Pharoah nih Abraham le a minung pawl cu a tthawl hna. Pathian nih a kan umpi kha an theih caah Pathian fale cu Sehtan nih a kan rem lo, vawlei zong nih a kan rem lo. Kan ram asi lo kha an theih. Pathian nihcun Izip ram zongah a umpi ko hna, a bawmh ko hna. Zumtu fale hna sualnak ram chung ah kan len sual tthan ko zongah Pathian nih a kan hlaw lo, a kan bawmh i Kanaan ram ah a kan hruai tthan.

8. HLAWKNAAK NGEI LOIN AN KIR TTHAN; Kanaan ram in Izip tiang a ke bak in an kal i buainak lawngte an ton caah Kanaan ram ah an ke bakin an rak kir tthan. Miakmi an ngei lo, alakin a tha a ba, an caan a dih. Zumtu hna caah Sehtan pennak chung ah thil ttha hmuh ding kan ngei lo. Kan caah ahcun thabaatnak hmun le caan sunglawi thlaunak hmun lawng asi ko.

9. KANAAN RAM I A RAITHAWINAK HMUN AH A RAK PHAN TTHAN (Gen. 13: 1); Zumtu hna cu Sehtan pennak, vawlei nuamnak i kan kal sual zongah Pathian Thlarau pennaak ram ah kan kir tthan awk asi. Abraham cu tuan i a rai thawinaak hmun ah a rak kir i rai a thawi tthan bantuukin zumtu hna cu Pathian he pehtlaihnaak le ihawikomhnaak kan tuah tthan awk asi.

10. KANAAN RAM A KIR BAK IN A RUM; Kanaan ram an phanh in Izip in a rak kirmi Abraham cu satil le sui le ngun in a rum (Gen. 13: 1-2). Thlarau in kan rum khawhnaak caah Izip rak ah kan rum kho lo. Pathian Thlarau ram i na rak kir tthan ahcun Thlarau ah na um lai, thluachuahnaak taktak na hmu ve lai. Credit: Rev. Dr. Aung Myint Thang

Leave a Reply

Your email address will not be published. Required fields are marked *