Rev. Abraham Sang Nawl: Kum Thar In Nunning Thar Ah I Thawk Usih

Rev. Abraham Sang Nawl: Kum Thar In Nunning Thar Ah I Thawk Usih
==================
Ni cu zingka ah a chuak i zanlei ah a tlak than bantukin kum le caan hna zong January ni khat ah kumthar a hung chuak i December ni 31 h kum hlun nih a liampi than. Cuticun kum le caan hna cu tlaih awk tha loin an chuah i an liam than lengmang. Cu bantukin minung kan nunnak kum le caan hna zong hi kum khat hnu kumkhat in an liam ve lengmang i, minung kan taksa cu (Gen 3:19) ah kan hmuh bantukin leidip ah a kir thannak ding cu kum khat hnu kum khat in kan naih chin lengmang.

Vawlei cung i minung kan nunnak caan hna hi ruah lengmang tikah a tawi tuk hringhran. Cucaah Moses nih (Salm 90:10,12)ahcun kan chan cu kum 70 a si ko, kan thazang a thawn deuh le sawm riat a si, cu hmanh ah retheihnak le harnak lawng kha kan ing, kan nunnak cu a dih zau i kan lo. Ka nunnak hi zeitluk in dah a tawi ti kha ka hgnalhter law cuticun kan fim deuh lai, tiah a ti. Sihmanhselaw minung tampi nih kan nunnak caan hna hi a rel awk kan hngal hna lo i, kan rel thiam tawn hna lo. Kan duhning in kan thu kan dir, kan um kan kal i kan ei kan ding hna. Cucaah minung tampi hna cu an chantim hlan ah an nunnak a liam zau tawn.

Minung tampi cu kum thar a chuah cun Bible ca ka rel cang lai, rawlulh thla ka cam cang lai, zukhmawm zu, kuak, khaini ka phiat cang lai, cheuhra cheukhat le thawhlawm zong ka pek lengmang cang lai, zarh chiarte ka pum cang lai tiah a phunphun in kan ti i kan I timtuah ve tawn. Asinain kum thar a hung chuak, zarhkhat hnih a hung rau i kanmah ningah kan i chuah than lengmang. Cucaah kumthar cu kannih caah cun kum hlun ah a cang i kan caah a thar kho ve hrimrhim tawn lo.

Kum thar nih minung kan nunnak a thleng in a thar ter kho lo i, kum hlun nih kan nunnak kha a hnawmh in a hlunh pi kho hlei lo. Kan nunnak kha a thleng in a thar tertu ding cu Jesuh Khrih lawnglawng kha a si i, Kan nunnak a thurhhnawmhter tu le sualnak in a temtawntu cu kan ralpa Setan le kanmah minung kan a si. Cucaah Jesuh Khrih kan ngeih i a Thiang Thlarau kan cotin lawnglawng ah kan i thleng lai, kan thar kho lai i mi thar kan si kho lai. Amen. Kum thar cu kum 50 hmanh hmang usih law, Jesuh Khrih kan ngeih hlan poah cu kannunak a thleng lai lo i amah ning peng a si ko lai. Cucaah Paul nih (2Kor 5:17) ah mi zeihmanh hi Khrih he an i pehtlaih tikah cun mithar a si, a nunnning hlun kha a lo I nunning thar kha aa thawk cang tiah a ti. Amen.

Cucaah kum 2021 chungah hin nunnak thar a ngei rih lomi hna nih nunnak thar kan ngeih khawhnak ding le a ngei ko nain a phunphun ruangah a derthawm i, a hnawm thanmi hna zong nih a thar in nunnak le kan ngeih khawhnak dingah I thawk than hna usih tiah kan sawm hna. Paul nih Efesami hna nan lungthin le nan ruahnak ah ser thanmi nan si awk a ti (Efesa4:23) a ti bantukin thinlung thar ruahnak thar le nunnak thar in kumtar ah kar hlang cang hna usih. Amen.
Credit: Rev. Abraham Sang Nawl