Republican Party Policy Le Riantuan Dan Cu Biakam Hlun Can A Lo Ngai, Democratic Party Pawl Hi Biakam Thar A Lo Ngai Ve

Keimah ka hmuh ve ning tlawmpal te ka van chim ahcun Republican party i policy le rianttuan dan le cawlcangh dan khi Pathian nih Biakam hlun chan i rian a ttuandan le a cawlcangh dan he a lo ngai ka ti/a khatmi a tam ngai ka ti. Cuve bantuk in Democratic party pawl i policy le rianttuan dan le cawlcangh dan hi Pathian nih Biakam thar chan i Bawi Zisuh hmang in rian a ttuandan he a lo ngai fawn ka ti. Thuk deuh le kau deuh ruah awk ah tiah. An ttha veve nan a zeidah a ttha deuh i a zeidah a tharhlam deuh i a zeidah a hlun deuhmi a si ti ruah a hau. A zeidah a kau deuh i a zeidah a bi deuh ti zong. A zeidah mi zapi caah a ttha deuh i a zeidah mibu pakhat calawng ah san a tlai ti pawl ruah a hau, US party pawl policy le rianttuan ning le Pathian nih Biakam hlun le Biakam thar i rian a ttuan ning pawl ahhin. A zeidah violence a tamdeuh i a zei hi dah non-violence a tamdeuh ve ti zong. Chim awk a tam ngai nan za rih seh. Vawlei ah dinnak, daihnak le remnak a um khawhnak ding caah Pathian fapa neihchunte Bawi Zisuh cu pek kan si.

Biden le Trump kan ttanh hna nak in kan nun ziaza tamtuk a lang, an konglam thei huaha loin. Atutan US ram thimnak kongah Laimi zong biatak tein kan buai ve i kan ttanhmi zong a dang. Mahhi buaiphu a si ko. Sau nawn zong buai ding a si ko. Aruang cu Khrihfa kan biaknak he tampi pehtlaihnak a nei, an policy kongah le an ziaza, an lungput kongah. A biapi bak i buaipi tlak a si. Mah belte buai ziathiam lo kan tam. Kawlca le mirang ca zong rel a thiam lomi, ruahdomhnak sawh in hehtiah a rak buai len vemi pawl hi a poinak cu a si. An konglam theihmi kan nei set fawn lo i Bible hmanh kan rel huaha fawn lo lioah ningcang lo piin hehtiah a rak buaimi pawl hi nan poi ngai. Mah ruangah fawh musalim ralhrang nan lo kan tinak hna a si cu. Musalim ralhrang pawl khi an muslim biaknak hruhttanh in an ttanh i anmah le anmah hna bom an i puah hnawh i midang nunnak zong tamtuk an lak. An biaknak cu hruhttanh le palhttanh in an ttanh. A tak te cun Islam a sullam cu daihnak a si. Na theih fiang lomi kongah cun dai tein um ko law a theimi pawl ttialmi le chimmi kha ngai law rel ko. Cucun na fim deuh lai. Kan Khrihfa nun he a tlak lomi holhchia, holh ttha lo tamtuk nan hmang.

Biden kong zongah micheu khat cu a konglam zong thei huaha ttung loin hehtiah sual vialte nan puh i bia ttha lo tamtuk nan hmangmi hi a poi bak. A silo ning piin hehtiah nan ti i Khrihfa ttha a timi Laipawl nan lung a thiang loning le nan thinlung put a thurhnawmh ning vialte le nan ziaza ttha lo vialte a lang dih. Pathian a lawm lai lo. Biden kong cu US ramah saupi a ummi le a relmi nih fiangtuk in an theih ruangah US president caah an thim hi a si ko. Trump cu popular vote hrim in a tei tuk. Kum 77 a si, a upa tuk cang nan US mipi nih an dawt i an pekmi a siko. Aruang cu US vice-president zong kum 8 a ttuan cang i senator le a dangdang zong kum 35 leng a ttuan cangmi a si. Delaware state aiawh in senator a ttuan lio zongah US tuanbia ah kum nobik senator pa 6nak a si, kum 1972 lioah. Mah lio ahcun kum 29 lawng a si. Nang le kei hna cu US ram ah nizan tihni ceo ah a phanmi kan si i Biden bantuk in US ram caah rian nganpi zong kan ttuan kho lo. Laimi kan poinak cu ka theih ve ka hngalh ve ti lungput kan neihmi hi a si. Biden le Trump kongah nihchuak capo i kan chim ahcun a poi lem lo. Nan an konglam le an policy theih huaha loin hehtiah faktuk in biadawh loin kan timi hna le kan hmangmi hi mirang pawl hna nih cun kan thei hna seh law zeitin dah an kan ruah hnga i an kan hmuh hnga. A thluak a tlamtling lomi hmuh in an kan hmuh ko lai. Biden kongah bia ttha lo tamtuk kan hmangmi hrim nih a langhtermi cu kan lungput a thiang lo ning le kan ruahnak a chiatning a langhter, ruahnak bituk kan neihzia a langhter. Kan Khrihfa nun le cawnpiaknak he cun a kalh bak/a tlak lo. Pathian zong a lawm lai lo.

Relchap lo cu a pam tuk, US Laimi kan pastor te le vawlei lei hruaitu nih politics kongah kan thluak an kan ttawl tuk rua ka ti. US Laimi kan palhnak le kan poinak pakhat asi tiah ka ruahmi cu a caan ah biaknak lei kan hruaitu pastor te le vawlei lei hruaitu an biachim kan ngai, ka zulh ngai nan a caan ahcun zei ah kan rel hna lo i kan upat fawn hna lo. A caan ah le an chimmi le an pommi ttha tein ruat loin kan zulh top/kan pom top. Mah tein hlathlainak, tuaktannak, le ruahnak le duhthimnak zong Pathian nih a kan pek ve ko nan mah cu hmang loin biaknak lei i hruaitu cheukhat ruahnak bituk in a kalmi biachim kan ngaih tawn/kan zulh tawn/kan zumh tawn. Cucu atutan US thimnak ahhin a fiang ko. Pastor te cawnpiaknak cu zulh ding an si ko. An bia zong ngaihding an si ko. Upat ding an si fawn ko.
Asinan politics le sipuazi kong le zeidang kong ahcun pastor cheukhat cu cawnnak sang zong an nei ko lai nan ruahnak bituk in a kalmi an um len ve tihi philh loding a si lai. Politics kong, sipuazi kong, le zeidang kong an theih lomi a tampi ve.

Cucaah cun pastor te le vawlei lei hruaitu chimmi poh zulh i ngaihdih ding a si hlei lo. Mah tein hlathlai i ruahnak kaupi le thuk piin a tthami le a ttha lomi cu i thlet ve ding kan si ko ka ti. Atu cu si loin ar rawl fahtu cu ar pawl nih a hnulei in an zulh bang kan hruaitu pastor le vawlei lei hruaitu chimmi poh kha tuaktannak um set loin kan zulh hna. Hruaitu nih hi ka hin ra u law sa le rawl eiding a um tiah a tinak lei poah ruitiah kan zulh hna i a um tthan lo e hika lei ahhin ra u law a ti tthan i ruitiah a tinak lei poah ah kan zulh hna. Buh le sa eiding a um a tinak ahkhan ei ding a um taktak maw, um taktak lo ti kha kanmah tein ttha tein hlat ding a siko. Cuve bantuk in US thimnak kong i mee pek ding kong zongah mah tein i hlat i kan duhmi le a tthami tiah kan ruahmi cu vote pek ding an siko. Kan pastor te le vawlei lei hruaitu chimmi poah ngai in pek ding a si hlei lo. Sipuazi kong le politics kongah cun kan hruaitu pawl nak in a thei deuhmi an tampi.

US Laimi nak in Laitlang Laimi hi politics lei ahcun an fim deuh i an ruahnak zong a kau deuh tikhawh a si. Annih cu anmah tein an i tuak i a ttha an timi cu vote an pek ko hna. US pastor le hruaitu cheukhat zong mipi hehtiah vote pek ding kongah forh kan hmang. Laitlang lei pastor cu an hmang lem lo tikhawh a si. Pastor te nih cun vote pek ding le pek lo ding kongah tampi a chim awk a si lo. Amah a duhnak lawng le a ttha a timi konglawng tlawmpal te chim seh law cucu a za ko. US pastor te cheukhat cu politics leiah ruahnak bituk in a kalmi an um i an theihmi zong a tlawmtuk tihi philh lo ding a si lai. Politics kong le sipuazi kongte hna ahcun biaknak lei hruaitu nak in a thei deuhmi an tampi ko lai. Pastor te nih politics kong ahcun kan thluak kan ttawl tuk hna hlah seh law a ttha lai ka ti. Credit: Van Tum