Rel Lomi Vote 5600+ An Hmuh

REL LOMI vote 5600+ AN HMUH

===========

GEORGIA STATE i vote an thlakmi cu kut bak in an relter ṭhan hna i zahan tiang ah Fayette County ah vote 2755 reng lo bak rel lomi an hmuh ti si i tuchun ah vote 3000 reng lo Walton le Floyd county ah an hmuh chap i vote 5600 reng lo an hmuh cang ti a si. Pu Trump le a team pawl hi tlawmte cu an hnabei sei deuh kho men.

Nain, Pu Trump nih Georgia ah hin tei ṭhan hmanh seh law a hmuhmi vote hi 248 lawng a si ṭhiam lai i 270 a tling kho hlei lo i a sung ṭhiam lai. Cucaah, state dang Wisconsin, Pennsylvania le Michigan lei ah an cawl rih herh. Wisconsin hi Georgia bantuk in vote relter ṭhan ding a si ahcun tuchun suimilam 5:00 hlan ah Trump team an busipi a herh i phaisa million $7.9 hrawng an thaap ngam a herh. Tuchun i an buaipi lo ahcun Wisconsin vote relmi result hi CERTIFIED tuah ding a donghnak ni a si cang i Certified an tuah cang hnu ahcun legal challenge hi tuah khawh a si ti lai lo. President Trump le team hi sn lungrethei ngai lai ti a fiang.

State dihlak nih an vote relmi result cio hi December 8 hlan ah fehter (certified) dih ding a si i December 14 ah Electoral College (state cio nih an thimmi hna Electors) nih vote thlak ding a si. Electoral college nih vote an pekmi hi CONGRESS nih January 6, 2020 i rel ding hi an schedule cu a si. Nain, Senate le House an lung ai khah lo sual ahcun thawn khawh zong a si. An lung ai khah ko i electoral college vote hi an cohlan ko ahcun January 20 ah President ding cu biakamnak (Oath) tuahter a si telai.

US President thimnak vote hi State 45 hrawng nih cun an rel dih cang nain an relmi result hi certified an tuah cio rih hna lo. Cucaah, US President thimnak result hi official nih thanhmi pakhat hmanh a um rih lo. Media pawl nih an zumh ning an phuan chungmi lawng a si rih. Cucaah, Biden nih a tei, Trump a sung cang tiah i al len ding khi a herh in a herh lem lomi a si. Phung ningte in a herhmi an tawlrel lai i an dih in an thanh te ko lai.
Ref: The Chin Voice, FoxNews, Reuters

Leave a Reply

Your email address will not be published. Required fields are marked *