Ralzam kan sinak le innlo khanghpiak dih kan sinak hliamhma le temtuarnak hi a fak hringhran ko!

Zeitin dah kan leh lai? Jeremiah 29:12-14a
============
Ralzam kan sinak le innlo khanghpiak dih kan sinak hliamhma le temtuarnak hi a fak hringhran ko. Atu kan ton cuahmah mi sinak hi zeitin dah kan leh lai? Kan ton ning le kan lehning nih kan zumhnak le kan lungput, mizei kan si a langhter ngai lai tiah ka ruah.

Hi bantuk buainak le zatlak puicimhnak kan ton tik ah zeitin dah na tei, kan lonh lai? ti mi he pehtlai in, “Na nun ah/Kan nun ah zei dah biapi bik ah na/kan chiah,” ti mi nih tampi lai a rel fawn lai. Mi cheukhat nih chawva, nawlngeihnak, minthannak asiloah an ngeih mi thilri tbk ah an mit an chiah, biapi bik ah an chiah. Kan nun ah biapi bik i kan chiah mi zei dah a si ti mi kan hngalh le fiannak nih kan ton mi harbuainak kan leh ning zong ah lai a relchih lai.

Minung le harbuainak cu kan i ṭhen kho lo. A fak deuh le a din deuh in kan ton mi lawng ah kan i dang. Baibal ah Pathian mihman tampi zong nih an rak hrial kho lo. Hagar zong ṭhawl le dawi ruangah nun rocar le nun king tein ramcar a rak phan (Genesis 16:1ff).

Vawleicung ah a nun a nem bik ti mi Moses (Nambar 12:3) zong Israel miphun a hruainak ah, “Zeitin dah keimah lawng nih nan hnahnawhnak le nan thilrit le nan phunzainak cu ka phurh khawh lai,” (Deuteronomi 1:12) tiah a rak ti bal. Pathian nih a zumhraih bak mi Job (Job 1:8) zong a fak bik sunghzatlaknak le nganfahnak nih a zual i, a tem hmual a fahzia hmanh chimpit a si ve.

Profet lak ah a lianngan bik, mei-alh profet tiah auh mi Elizah (I Siangpahrang 19:4ff) zong ramlak ah a rak zam i thih hmanh i ham deuh in lungdonghnak a rak tong ve. Judah Siangpahrang Jehoshaphat (II Chanrelnak 20:1) zong, Moab, Ammon le Meunim nih an tuk ding a theih tik ah thinphannak he a khahnak kan hmuh.

Kan ton mi harnak zeitindah kan leh lai? Kan ton mi thih lonak, ralzam sinak, innlo le thilri khanghpiaknak le covo buarpiak kan sinak hliamhma vialte hi ai khat ko. A lettu bel kan i dang. A lettu lungput le zumhnak nih lai a rel lai.

Unau hna pahnih tuanbia: A upa cu zutama a si. “Ziah, zutama ah na can khawh zia?” tiah an hal tik ah, “Ka pa pei zutama a si cu,” tiah a leh hna. A naupa cu mifel mirum a si. “Ziah, hitluk mifel, mirum ah nai chuah khawh zia?” tiah an hal tik ah, “Ka pa hi zutama a si. Cucaah amah bantuk si ve ding cu ka duh lo caah a si,” tiah a leh hna. Unau hna nih an ton mi cu ai khat ko nain an ton mi thil cung in an leh ning le thazaang an i lak ning cu ai dang.
Kan ton mi leh le lonhnak ah a tanglei hin thazaang lei Pathian bia hin thazaang la usih.

Pakhatnak: Kan ton mi temtuarnak le nganfahnak hi Pathian nih a hmuh Khrihfa kan si le Pathian nih a dawt mi kan si hi zeitik hmanh ah kan philh lo a hau. A mui bik le a chiakha bik kan nun hi Pathian nih a kan hmuh ko. Salm 62:8, “Ka mi hna, Pathian cu i bochan zungzal u, Amah cu kan himnak a si caah nan harnak vialte kha chim dih u.”

Job nih a temtuarnak vialte chung in Pathian cu, “Hna theihnak lawng in nangmah cu ka rak in theih, sihmanhsehlaw atu ahcun ka mit in kan hmuh cang,” (Job 42:5) tiah Pathian cu a leh. Hagar nih Bawipa cu, “Nang cu mi a hmutu Pathian na si,” ti min in a auh (Genesis 16:13).

Pahnihnak: Kan ton mi temtuarnak le harnak nakin Pathian cu a ngan deuh. Kan ton mi ralzam sinak, innlo thilri kanghuh dihnak, zatlak puicimhnak vialte nakin Pathian cu a ngan deuh mi le pe than khotu a si. Jeremiah 32:17 ah, “Maw Bawipa Pathian, na ṭhawnnak a ngan mi le samh mi na ban in van le vawle hi na ser hna; nangmah caah a si kho lo mi thil zeihmanh a um lo.”

Moses nih, “Bawipa, nangmah nih na kan kalpi lo cun hi hmun hin kan thawhpi hlah” (Exodus 33:15) a ti. Joshua nih, “Kei le ka innchungkhar nihcun Bawipa kha kan biak ko lai,” (Joshua 24:15) a ti.

Pathumnak: Kan temtuarnak chung in Pathian ah i hrimh a hau. Midang nih hnemh le thazaang pekchom lawng kan i rinh ahcun teitu kan si kho taktak bal lai lo. A temtuar a har tuk mi kan hliamhma hna hi midang nih chempiak khawh dih a si lo. Cucaah kanmah tein Pathian ah kan i hrimh, thazaang thar kan lak le kan i tharchuah a hau. Cuti i hrimhnak ca ah a ṭha bik cu thlacam a si.

Moab, Ammon le Meunim mi nih tuk an timh a theih bak in Jehoshaphat nih, “Pathian kawl awk ah ai tim i Judah ram chung vialte ahkhan rawlulhnak a thanh (II Chanrelnak 20:3). Jeremiah 29:12-14a ah, “Nan ka hal i ka sin ah thla nan cam ahcun nan bia kan ngaihpiak hna lai. Nan ka kawl tik ah nan ka hmuh lai; nannih nan lung dihlak in nan ka kawl tik ah keimah cu nan ka hmuh lai, tiah Bawipa nih a ti.” Mark 9:29, “Jesuh nih, hi bantuk phun hi cu thlacamnak dah ti lo nihcun zeihmanh nih a ṭhawl kho lo,” tiah a leh hna.

Tlangkawmnak; Tutan kan ram dohthlennak ruangah kan ton mi thihnak, ralzam sinak, innlo le thilri khangh-uhnak le chimrel cawklo minung covo buarsopiak kan sinak vialte hi Pathian khuakhan a si lo. Asinain hi thil hmang in Pathian nih tinhpiak mi le tei khawhnak le lonh khawhnak lam cu a kan ruahpiak mi a um ko lai. Zeicatiah kan ton mi harbuainak hna hi Pathian nih a hmuh, hi nakin a ngan deuh i teipi khotu cu amah lawng a si, ti zumhnak le bochannak he Pathian ah kan nun hrimhthan in teitu si i zuam hna usih.

Chinchiah: Nihin 2022 January 23, Zarhpi Ni, JMBC MINO Zoom pumh ah ka chim mi a si. Ka facebook careltu kan hrawmh chin hna. Pathian nih thluachuah in pe ko hna seh. Kai lawm. Credit: Pastor Lian Chawn