Raltuknak tank tehna a hrawk kho helicopter si tikah, iralrin hau a si!

NatChaung khua a khaang dihtu Russia ser helicopter
==========
Nihin ah SAC ralhrang nih Kalay le Gangaw kar Natchaung khua cu Russia ser raltuknak helicopter Mi-35P in an khuapi ningin an khangh dih. Natchaung khua cu Laimi tampi khuasaknak a si. Dr. Hla Aung timi kha a hrihhram Bualtak si nain, Natchaung khuami an si ve.

2010 lio ah, Kawl ralkap nih Russia ser raltuknak helicopter 50 a rak cawk tiah Irrawaddy nih a rak thanh bal. Cu a rak cawkmi lakah atu i an hmanmi Mi-35 le Mi-24 an si. Cu lakah thilri phurhnak helicopter 2 ai tel chih an rak ti.
Mi-35 helicopter cu raltuknak ah vawleicung minthang a si ve.

Raltuknak tank tehna a hrawk kho helicopter si tikah, iralrin hau a si. Helicopter le helicopter ituknak ca zong ah an hman. Mi-35 helicopter pakhat a man khi US $ 135 million a si, an ti. Chan thar helicopter pawl cu meithal le miakpi sawhsawh phun in thlak khawh an si lo.

Pem lak kah zongah a rawk lo. A engine le a seh thilri a computer system pawl khi pakhatkhat a can sual tikah, a dang pakhat ai rolhtu dingin an ser chih. Tikah, chan thar helicopter pawl vawlei in hei kah i thlak khawh ding cu a fawi lo. A khaltu pilot khi sniper in thi lak kah lawng ah an tla kho, tiah an ti.

Nain, Mi-35 helicopter pawl cu Kachin ram ah KIA nih kan thlak khawh, kan kah khawh an rak ti tawn. A kah cu an rak kah khawh tak ko rua nain, a rak rawk taktak rua lo. Kawl ralkap lei nih sehlei rawhnak a um caah kan ṭumter bia a si tiah, an rak iphisin bal. 2013 lio ahkhan a si.

A hnu zong ah KIA nihcun Russia ser Mi-35 cu kan thlak khawh tiah an rak ithanh tawn. They just claimed! No one knows whether they really could shoot down that helicopters. Atu i vanlawng kahnak kan caw lai an ti leenmi pawl nihkhin Mi-35 phun cu thlak khawh dawh cu si rua lo. Iralrin deuh cu a haumi si ko rua.

Thinphan le lau dingah thaimi si lo. Thil sining tak theih a herh. A kherhlai huam nih tam deuh in van kherhlai tuah ulaw, theih herh vemi cu a si. Ai dawh lo ngangmi hring deldul buluk a lomi khi Mi24 a si. Adang pahnih hi Mi-35P an timi cu an si.

Gangaw peng ah ralhraang nih inn 30 ciam dih in an duah, khuami ca eidin le hrukaih bawmh an herh. Magwe ramthen, Gangaw peng, Sanmyo khua cu December 21 ah ralhraang 100 hrawng le Pyo Saw Htee 50 hrawng nih an luhhnawh hna i khuami inn 30 ciam dih lak in an duah. Eidin le hrukaih thilri bawmhchanhnak kan herh tiah tualchung mi nih Yangon Khit Thit Media ah an chim.

“Ralhraang nih khuami inn 30 ciam dihlak in an duah. Zeihmanh kan la manh lo. A dihlak in a ciam dih. Eidin tirawl le hrukaih thilri kan herh. Ralhraang pawl khuachung ah an lut ti kan theih in kan i hrukaih mi thil he lawng kan zaam i inn i kan zaam taak mi cu a ciam dih. A rannak in bawmh kan herh ko,” tiah khuami pakhat nih a chim.

YDF-Kyaw nih ralhraang motor bomb an puah hna i 30 leng an thi; December 22 zaanlei suimilaam 2:34 ah Kyaw le Gangaw kar Pungngia chuktum zawn ah ralhraang motor tlar 24 hna cu YDF-Kyaw Battalion No, 12 nih bomb voi riat le kutser launcher in voi li an kah hna i ralhraang 30 leng an thi lai tiah zumh a si. YDF-Kyaw Battalion No. 12 chung in hliamtuar kan um lo tiah YDF-Kyaw nih an thanh.

Myaing ah Council ralhraang pawl bomb puah an tong i 23 an thi. Magwe ramthen, Myaing peng ah Council ralhraang pawl cu Myaing PDF le Pouk peng in တိမ်လွှာ phu nih bomb in an puah hna i ralhraang 23 an thi tiah Myaing PDF nih an thanh.

December 21 ah Pouk- Myaing ramri ah kahdohnak a chuak i Kanpyu lam ah bomb kan puah hna ca ah ralhraang 5 an thi. Pouk-Zepya lam in a ra mi ralhraang motorcyle panga le motor pakhat in minung panga an thi. Motorcycle panga le kuan zeimaw zat kan lak tiah an thanh.

Yuasin lam ah ralhraang 100 hrawng cu bomb in an puah hna i pathum an thi, hliam tuar tampi an um tiah kan theih. Zaanlei sang ah, zing i bomb kan puahnak Zepya lam cung ah bomb a taang mi pawl a fimhlawm lio mi ralhraang hna cu bomb in kan puah than hna i Officer tel in pahra hrawng an thi. Officer pa nih bomb cu khuaruahhar in a zoh lio ah an puah hi a si tiah kan theih. Credit: The Hakha Post

Nay Pyi Taw ah ralhraang pawl bomb puah an tong i 12 an thi. Nay Pyi Taw Pyinmana peng chung ah ralhraang motor pahnih cu bomb an puah hna i ralhraang 12 an thi tiah Nay Pyi Taw PDF nih an thanh.

December 20, zing suimilaam 11:00 hrawng ah Nay Pyi Taw Pyinmana peng, Pyihtaungko khuate komh le Lathpattaung khua pawng ah Nay Pyi Taw PDF nih phu hnih ah i then in kan bawh hna i ralhraang motor pahnih cu bomb paruk in kan puah hna ca ah ralhraang 12 an thi tiah an chim.

Cu bomb puahnak ah cun, ralhraang 12 nih an i cit mi motor pakhat cu cheng ah a tla i aa cit mi an zapi in an thi. Motor pakhat ah minung 5 hma pu an um. Nay Pyi Taw PDF lei hliam tuar um lo tein hnu kan pil kho than tiah an thanh chih.

Monekoe kahdohnak ah ralhraang lei a thi mi le hliam tuar 100 hrawng an um i hriamnam zong tampi an lak. Shan ramkulh, Monekoe um MNDAA sakhaan hna cu ralhraang nih hriamngan le raltuknak vanlawng hmang in atu le atu a kah tiah The Kokang thawngzamh nih a tial.

Cu ti thazaang tampi hmang in kahdohnak a tuah nain a hmun taktak ahcun ralhraang lei a thi mi le hliam tuar 100 hrawng an um. Hriamnam zong tampi an lak tiah The Kokang thawngzamh nih a thanh.

KNLA le Ralhrang kar nizaan ah kahdohnak voi 2 a chuak, ralhrang lei in minung 9 an thi. KNU brigade 5 hmunhma Phapun (ဖာပွန်) Mutaw (မူတြော်) pengkulh chungah nizaan December 20 ah ralhrang phu hna le KNLA kar kahdohnak voi 2 a chuak, cu kahdohnak ah cun ralhrang phu lei in minung 9 an thi i minung 4 nih hliamhma an tuar tiah Mutaw (မူတြော်) thawngzamhnak nih cathanh a chuah.

Nizaan zinglei suimilam 9:40 ah Thibaaye(ထီးဘာအဲ) khua ah kahdohnak voi 1 a chuak i, cu kahdohnak ah cun ralhrang minung 3 an thi minung 2 nih hliamhma an tuar. Cun zinglei suimilam 10:10 ah Tamiloe(တမီးလူ) khua ah kahdohnak voi 1 a chuak than. Cu kahdohnak ah cun ralhrang phu minung 6 an thi i minung 2 nih hliamhma an tuar. Ralhrang phu le KNLA kar kahdohnak ah KNLA lei a thi le hliamtuar um lo in hnu an tolh kho tiah theih a si.

A tu lio Kayin ramkulh chungah ralhrang phu hna le KNLA, PDF phufonh kar kahdohnak a fak kho a si caah mizapi nih ralrinnak ngeihcio ding in KNU Mutraw(မူတြော်) thawngzamhnak nih a langhter.

Kalaymyo ah PDF le ralhrang kar kahdohnak a chuak, ralhrang lei minung 5 an thi. Sagaing ramthen Kalay peng nitlak chaklei ah Kalay-PDF battalion 5 le ralhrang phu kar December 20 ah kahdohnak a chuak, ralhrang phu lei in minung 5 an thi tiah khuachung thawngzamhnak nih a langhter.

Cu kahdohnak cu Kalay-PDF battalion 5 cun battalion 6 nih an bawmh hna i battalion 6 in minung pakhat a nunnak a liam. Ralhrang phu hna nih Kalay-Gangaw, Kalay-Tedim tlanghrawn ah rallam sial ding in timhtuahnak an ngei tiah theih a si. Cun nihin December 21, ni ah Sisan (စီးစံ) khua cu ralhrang phu hna nih luhhnawh in khuachung ning ti ngawt in mei khangh in an hrawh tiah khuachung mizapi hna nih an chim. Credit: The Hakha Post, The Chin Post, Khit Thit Media