Kalay Khuapi Ah PDF Min Hmang In Fir Le Mi Thil Chuhnak Pawl A Chuak. Sagaing ramṭhen, Kalaymyo khuapi chung ah PDF min hmang in fir le hramhram in mi thil chuhnak pawl a chuak i ralhrial ruang ah minung an umlonak inn pawl zong an thilri an firpiak hna, tiah theih a si.
2024, March 1 ah Kalaymyo, TatOoThiDa sang, Ayechanmyatta sii-inn hmai, Bogyoke lamcung ah meithal aa tlaihmi minung 4 nih aa chawkmi tualchung mi 6 hna cu Phone, sui tumbul le Bank Card pawl an chuh hna i Taungzalat sang zong ah mino 2 nih changreu zuarnak dawr cu PDF min hmang in tangka an hal hna, tiah theih a si.
“Mah hna pawl cu meithal an i tlaih cio i PDF hruaitu hna nih tangka a kan halter tiin an chim. Kan thilzuar mi in kan hmuhmi tangka pawl cu an i kalpi” tiah hramhram in chuh a tongmi nu pakhat nih a chim.
Kahdohnak a fah caah Kalay tualchung mi hna cu ral an hrial i annih nih caanṭha ah i laak in Tahan sang minung an umlonak inn cheukhat ah an thilri pawl an firpiak hna, tiah tualchung mi hna sinin theih a si. Lungmili Post