Ralkapzia Le Kawlzia Tawi Tein

Ralkapzia Le Kawlzia Tawi Tein
=========================
Ralkap le USDP Zia ; Phunghram kan remh lai ti paoh ah USDP le Ralkap nih kan nih cu phunghram a veng tu ding kan si. Ralkap cu miphun ramkhel kan si an ti i phunghram remh an duh bal lo. Nain an kawp Party a simi USDP mizapi nih an duh hna lo ning le an sungh ning a fahtuk tikah phunghram remh cu chimhlah a herh ahcun phunghram kan hrawh khawh an ti than hoi.An hrawh lai maw? An ven lai dek? Zaapi cu kan lung zong a fiang ti lo. A fiangmi cu an ven pek, an hrawh pekah a tuartu cu Tlangcungmi thotho kan si hoi. Kawl Zia; Kawlzia timi ahcun Kawl Ralkap le Kawlmi nih hruaimi Party paohpaoh an itel dih caah “Kawlzia” tiah ka tialmi nihhin NLD zong a huap ve ti kha ka ruah piak chih u.

Ralkap an rian tampi lakah mee thlak khawh ding tiangin a dai lomi hmunhma kha dai tein mee thlak khawh dingin kilven hi an rian a si. Nain NLD thimmi UEC nih Tlangcung Party thawnnak hmun a simi Myone 16 (Hluttaw Palai 60) reng lo hmunhma cu meekuang hun lo dingin thawng a thanh tikah USDP le Ralkap nih an itheihter lo. Phundang cun NLD nih Tlangcungmi a kan namneh lio ahcun an lungthli tein an rak ilawm i daizor in an iumter. Hinih a fiantermi cu Tlangcungmi tei khawhnak caah cun Kawl hruaimi bu paohpaoh meeting thut in bia an iruah lo nain an lung ai khat peng tihi a fianter ngaingai.

A tu ahcun Ralkap nih UEC le NLD biatak tein Election kongah a vun ngiar cang hna. NLD nih tanpitu Tlangcung Party a herh lio te a si. Tlangcung Party nih Ralkap hi au hnawh hna seh ti a duhtuk lai timi cu a fiang. Independent a khel lomi paohpaoh nih cun au hnawh hna seh tihi kei zong ka duh ve. Nain 88 lio thisen vialte philh in NLD nih kanmah lawng Democracy caah a aumi kan si, Kanmah lawng nih Ralkap kan doh tiah an rak chim caah Kawlram zalennak caah a rak cawlcang mi Tlangcungmi tamtuk lung a fahter. Anmah Kawlmi lila chungin 88 lio siangngakchia pawl zong Party thar an dirh beh. Cu lawng hlah, A cung i ka tial cia bang nai tan election ah Tlangcung Party thawnnak tam lak te meekuang a hun duh lo tikah Tlangcungmi tampi lung a fahter than. Tikah, Atu ahhin Tlangcung Party le Hriamtlai pawl nih Ralkap hi auhnawh hna hmanh sehlaw NLD nih a raoh hlan ah kanmah lawnghi Kawlram Democracy caah apum aa pemi kan si an ti hoi sual lai maw? Timi hi ruah lo awk a tha lo. Um! Zeitik tiang dek Kawl le Kawl an iseh ruangah hin Tlangcungmi nih kan tuar rih hnga mu. Credit: Aceu-Salai Sang Ceu Lian