“Ralkap uknak tang in Kawlram luat ve cang seh” ti a duhmi paoh nih nan rak itel ve cio naklai kan in sawm hna

Hawile hna, Kawlram ralkap nih uknak hramhram in a laakmi cu ramchung a ummi lawng si loin ramleng a ummi Kawlrammi dihlak kan lung a faak. Ramchung a ummi nih cun an caan le an thazaang lawng si loin an chawva tiang in Kawl ralkap doh-aunak ah an itel kho. Ramleng a ummi nih cun ramchung a ummi bang in kan cawlcangh khawh ve lo caah kan chawva te tal in telkhawh izuam cio ding in saduh kan that. Cu kan chawva zong cu a pikpak tete in luhter loin hmunkhat te ah kan kalter ahcun hmual a ngei deuh lai ti kan zumh.

Kannih hi Thantlang cawlcanghnak caah kan tuah, a ruang cu kau tuk in kan tuah ahcun kan chei lo sual lai kan phan pinah peng dang (Hakha, Falam, Mindat, tbk) zong nih an peng cio in an tuah ve ahcun hmual a ngei deuh hrim lai tiah kan ruah caah a si. Hlut belte cu khoika peng a ummi an si zong ah hlut khawh a si ko nain hlutmi tu cu Thantlang ah a kal dih lai tinak. Kan chawva hi ralkap doh-aunak ah a herhning in an hman lai pin ah a harsa deuhmi cozah riantlai hna nih rian-ulh in doh-aunak an tuah ve khawh nakhnga, an chungkhar pawcawmnak le inn hlan man tepawl ca tiang va bawm te ding a si lai.

Cucaah “Ralkap uknak tang in Kawlram luat ve cang seh” ti a duhmi paoh nih nan rak itel ve cio naklai kan in sawm hna. Fiang deuh in theih nan duh ahcun a chung i ca kan ttialmi khi rak kan relpiak chih te uh tiah zaangfah kan in nawl hna.

Relchap, Hriamtlai phu an thawh caan te a si. Atu bantuk Kawlram mipi nih ralkap doh-aunak tuah lio ahhin democracy, federal le self-determination caah meithal itlaih in Kawl ralkap doh ai timmi hriamtlai phu pawl nih an ramkulh cio i ralkap sakhan pakhat hnu pakhat in la ve thluahmah hna sehlaw Kawlrampi cu democracy le federal ram ah kan chuak put hnga. Daite in a ummi phu (mipi) nih an celh ti lo i lamcung an chuah lio ah hriam in kan doh a hau a timi hriamtlai phu pawl an daih ziar hi a poibikmi a si. Kawl ralkap nih aa-na ting ai tim i ceasefire a tuahpi luklak hna le an dai bak. Mipi an daih tikah Kawl ralkap nih an kah tthan te hna ding khi an thei rua lo.

Biakam a let pengmi le zumhtlak a si bak lomi Kawl ralkap cu atu lio te ahhin meithal in rak doh ve caan a si ko.
CNF kan upa pawl zong nih an hawi tlangcungmi hriamtlai phu pawl an chimh hna i tlangcung hriamtlai phu an dihlak lungrualte in an dohtti ding hna Caan ttha bik a si. Tutan ah an doh ve lo i Kawl ralkap nih uknak an laak tthan sual ahcun tlangcung hriamtlai phu pawl cu an miphun cio nih bawmhnak an pek tawnmi zong ruah tthan a hau ve te hnga, an itinhmi an tuah lo caah. (Fak nawn in ttial ve ko ning Ka theithiam uh). Credit: Van C Mang