Ralkap uknak hrawhnak ding ah CRPH nih a herh mi hriamnam/hman rua

Ralkap uknak hrawhnak ding ah CRPH nih a herh mi hriamnam/hman rua (By: Rolian)
================
Ralkap uknak hrawh cikcekle Federal hmuh nakding ah CRPH cawlcanghnak cung ah a ahngat taktak. CRPH kong kan tial tik ah CRPH kong hna cimrel caan a si lo tiah ti ding a si lo. CRPH nih a tlangpi in rian a tuan cnag caah aa palh lo ding hi keh orh in kan dirkamh a hau. Apalh ahcun CDM cawlcanghnak le Ramdang lei bawmhnak hmanh man a ngei lo kho mi a si. Cucaah CRPH hi raltha tein, ning le cang tein a kal khawh nakhgna aa palh hlan in heh tiah CRPH kong hi chim chih ding a si.

Ram mipi he: CRPH nih ram mipi kan dih lak ti awk duhnak le duhning kha aa hmaithlak a herh. Mipi he naih niam taktak in a cawlcangh a herh. Zeibantuk thil tuah lai zong ah mipi ca ah a tha maw timi ruah chih kha hamsa bik ah chiah. Mipi thachiatnak, a si nak hnga lo mipi he naih niamte in riantuan ti a herh.

Ramkheel thiamsang hna he: Ramchung Ramkheel Party, a bik in Tlangcung Miphun le Federal a duh mi hna miphun chung in Party chung ramkheel thiamsang hna he riantuan ti a herh. NLD nih a hruai ko hna zong ah TlangCung miphun chung in bochan mi ramkheel thiamsang he khua khan ti a herh. Pangpar dum aa dawhnak cu pangpar phun khat lawng cin ah si loin pangpar phuntling cin lawng ah cu dawm cu aa dawh. Federal khualipi sernak ah zei party le miphun poh an tlin ve a herh.

Miphun hriamtlai hna he: CRPH nih Tlangcung Hriamtlai hna hi Federal Army pakhat in a cohlan hna i hmun khat ah rian an tuan ti a herh. Hi tlangcung miphun hriamtlai hna hi Federal Army ah kan cohlan piak khawh hna ahcun Federal hmuhnak ding ah a lam kip in thazaang an chuah lai. Federal kan hmuh hnu zong ah uknak tha lo a khamtu le kan hmuh mi Federal a kilvengtu tha an si lai.

Cozah riantuan-CDM lut mi he: Ralkap dohnak ah CDM cu a tha taktak mi asi. CDM ah a lut mi vialte hna aiawh in minung pakhat le CRPH riantuan ti ding. CDM a lut mi hna hi civil mi sawhsawh bantuk in umter ding an si lo. CRPH riantuannak bawmtu hriamnam pakhat ah hman ve an herh. Cucu CDM a lut mi cozah riantuan hna nih phu dirh hna sehlaw an hruaitu kha CRPH cawlcanghnak ah telh ve ding. Aruang cu CDM ruang ah mipi kan sining le rianrang in riantuan a herh ning chimrel tu an herh ve.

Nuhrin Covo Dirkamhtu Phu he: CRPH nih Ramchung hram bunh mi “Nuhrin Covo Kilvengtu Phu (Human Right Organization) Phu he i bawm in rian an tuan ti aherh. HRO hi an biapi tuk. Ramchung thil sual tuahnak, ramdang in bawmh hau mi thil kong ah vawlei kildeng tiang a cawlcang kho mi an si. Tahchunnak ah Ralkap hi Nuhrin Covo buar case in dantat ding sisehlaw ramchung Human Right hna hmuh ning le statement chuah mi kha UN nih mark a pek mi a si caah HRO hi CRPH riantuannak ah hriamnam tha taktak an si.

Ramcung Civil Soceity hna he: CRPH nih Ramchung Zatlang Phu (Civil Society) phu kip he rian an tuanti aherh. zeicatiah Ramchung buainak te tuai deuh le adangdang thanchonak rian zong hi Civil Society nih tampi Cozah a bawmh khawh. Cozah tuan cia mi hmaban nehhnu zulh, pehzulh le fimtawlnak ah an biapi tuk ve caah hi Civil Society hna hi telh chih bak ding.

Upadi thiamsang hna he: Ralkap uknak doh ding in aa ready mi upadi thiamsang tampi an um. Hi hna lak in minung pakhat aiawhtu thim i CRPH ah telh ve ding. zeirian tuannak hmanh ah upadi lei thiamsang an herh. Upadi thiamsang lei an i tel tik ah riantuan ning aa fufim i ramdang i Ramdang cozah le UN zong nih CRPH riantuannak tha an pek chin lai.

Media: Ramchung media (Independent media- Non-profit media, non partisan media) hna hi CRPH nih hriamnam tha ah a hman hna aherh. Ram sersiamnak caah media hna hi mithmaan bantuk an si. a luancia cozah nih Media a hma hna lo caah mipi le cozah kar ah transparency a um tawn lo. Nihin kan ram thil sining vialte ramleeng a phakter tu hna hi atu kan chim mi media hna thawng in tampi aa tel. Ral tampi lal ah thihri le nunri ah heh tiah thawnglak a si. Cucaah CRPH nih media hi hriamnam tha ah a hman bak a herh,

CRPH cu caan karlak ca ah sermi a si. aa tinh mi cu ralkap uknak hrawh kha a bik in aa tinh mi a si bantuk in hi ralkap uknak hrawhnak ding ah hriamnam tha ngeih a herh. Cu hriamnam tha hna cu a cunglei kan langhter mi Phu hna hi an si.

CRPH cu NLD nih ahruai zong ah achung riantuantu kha NLD chung in Palai a tling mi theng a herh loh. Hihi cu Cozah thutden kong asi rih lo caah NLD party chung minung thengtheng kha a herh nak a um lo.

Tlangcung Miphun hna nih Miphun aiawh in upa pakhat cio, Hriamtlai Phu hna chung in an hruaitu pakhat cio, Miphun Party kip in an duh bik mi ramkheel upa pakhat cio, Civil Society phu vialte hna lak in aiawh tu pakhat , Ramkulh kip Human Right Organization upa, Baknak lei vialte aiawh in upa pakhat ti bantuk hna zong an i tel dih a herh. Cucu Federal uknak ser kan duh ahcun a cunglei minung hna hi CRPH ah telh an herh bak mi a si. Acunglei kan langhter mi vialte hna hi CRPH caah thazaang tha bik le hriamnam tha bik an si.