Ralkap uknak chiahru kan tei hlan tiang cu pehzulh in lam zawh kan pehzulh

Nikhat hnu nikhat ralkap dohnak lam zawhtu kan tam chin, cozah zung le siizung riantuantu rian an kal ti lo caah hmun tampi ah cun ralkap cozah a thaw pit cang. Hakha zong ah nidang nakin tuni lam zawhtu an tam deuh. Yangon ah cun a baa deuhmi cheukhat an i din caan ah midang lam an zawh ko caah lam zawh ai ngol bal lo. Ai ngol lo tikah mizapi thinlung a thawng chin lengmang ko.

Hakha lam zawh belte thaizing nikhat ngol rih an timh ti kan theih, hruaitu hna nih a tha bik tiah khua nan khanmi a si ko lai ka zumh. Nain, si thiam sehlaw ralkap uknak chiahru kan tei hlan tiang cu pehzulh in lam zawh kan pehzulh pi ko ulaw a tha bik lai ka zumh, a baa deuhmi i dinh caan ah aa dinh cangmi nih lam zawh than tibantuk in tuah khawh a si ko hnga. Pehzulh in ralkap uknak chiahru kan doh lo ahcun mino kan thi a dai lai i kan lung a dong sual lai ka phang, hruaitu hna nih a tha bik in khua rak khang lengmang hram ko u.

Relchap, Yangon lam zawh kan i thawh hlan ah ‘covid zawtnak kan ngah kho, thong kan tla kho, meithal in kah kan tong kho, kan thi kho’ timi kan thei cia dih ko. Nain, cu vialte nakin ralkap uknak a letza in tih a nung deuh, kan techin fapar ca tiang ah tih a nung ti kan theih caah hmurka raldoh kan i thawh cio hi a si. Rammi dihlak caah tih a nungmi kan ral kan tei khawhnak ding caah cun cozah zung riantuantu le bank riantuantu vialte zong nih nan kan telpi cio a hau. Caan zeimawzat chung cu rian kal rih loin um hram ko uh, ralkap dohnak hriamnam tha bik nanmah kut ah a um.

Cozah zung le bank riantuannak ai hel kho ti lo ahcun ralkap uknak aa cawl kho ti lai lo, a tlu colh lai. Kan lung ai rual i pumpak cio kan i tel ko ahcun Min Aung Hlaing tham cu kan tei colh ko lai, atu hmanh khi ‘kai chuah sual cikcek cang hi ta’ tiin ai ther len cang ko lai. Credit: Salai Lungthli Tum