Ralkap Tlak A Duh Lo Mi Mino Pawl Cu Sangbawi Nih Tangka Kyats Sing 50 An Hal Hna. SAC nih a ralai mi April thla dongh ah Ralkap tlak ding in auh an timh mi ah tel a duh lo mi mino pawl cu sangbawi nih tangka Kyats sing 50 an hal hna i an aiawhtu kawlpiak an timh hna, tiah tualchung mi nih Khit Thit Media ah an chim.
Khit Thit Media nih an ṭial ning atu hrawng hi Yangon ramṭhen chung sang cheukhat ah sangbawi sin ah tangka a pe kho mi mino paoh cu ralkap tlak ding mi cazin ah an telh hna lo i tangka a pe kho lo mi tu cu cazin ah an khumh hna.
“Yangon ramṭhen, Thongwa peng, Htunsein khua khuabawi Htay Kyi nih ralkap tlak a duh lo mi mino pawl cu tangka Kyats sing 50 a hal hna, aiawhtu minung an kawl mi hna cu sing 30 a pek hna i a rianṭuan hawi he sing 20 an i laak,” tualchung mi nih an chim.
Yangon ramṭhen, Kamayut peng, Thanlwin lam, No.10 sang chung mirum cheukhat nih cun an fale ralkap tla ding mi cazin ah i tel lo ding in sangbawi sin ah tangka an pek nain tangka a pe kho lo mi mino 14 cu ralkap tla ding cazin ah an khumh colh hna, tiah tualchung mi nih cun an chim. The Chin Post
Relchap: Letpanchaung Ah SAC Hriamngan Kahnak In Tualchung Mi 2 Nunnak A Liam. Sagaing ramṭhen, Kalaymyo peng chaklei, Letpanchaung khuachung ah SAC ralhrang nih hriamngan an kah i tualchung mi 2 an nunnak a liam, tiah theih a si.
2024, March 14, zanlei suimilam 9:15 tluk ah Letpanchaung khuachung ah SAC ralhrang nih an sakhan in hriamngan an kah caah hriamngan khennak in Pi Zuali le Pu Ramdika hna cu hmakhatte ah an nunnak a liam i hliam a tuarmi zong an um, tiah theih a si.
SAC ralhrang nih hriamngan an kahmi ruang ah Letpanchaung khuami minung 7nak tlawm lo nunnak a liam cang i minung 15 tluk nih hliamhma an tuar cang, tiah khuami hna sin in theih asi.
Kalaymyo thlanglei le chaklei ah kahdohnak a faak i SAC ralhrang nih Kalaymyo khua le a kiangkap khua hna cu duhpaoh in hriamngan an kah caah khuami a thong leng nih ral an hrial, tiah theih a si. Lungmili Post