Ralkap Rothil Chiahru le Atu Lio Sicaan Ning

Ralkap Rothil Chiahru le Atu Lio Sicaan Ning
==============
1. Myanmar ralkap nih uknak/ rampi nawlngeihnak an lak tikah a nung cuahmahmi phunghram kha an thah ton. Cucaah kum 14 hrawnghran a nguhmi 1947, 1974 phunghram kha an thah hna. Atu tan rampi nawlngeihnak an lak cu anmah nih kum 14 chung bak an rak tialmi kha an thah lo. A nung thiamthiam rih. Thimnak an tuah than tik zongah a tu lio huat a tlai tukmi phunghram pi ning in a si thiamthiam lai.

2. Kum 1990 thimnak theitlai kha an rak co hlang lo. Thlitu lak biachim bantuk biakamnak kha ram pumpi sinah an rak kan pek. Thlitu nih a duhnak ah a kalpi. Atu tan zong hi kum 14 chung an tialmi ning in cun a tawi bik kum 1, a sau bik kum 2 hrawng, anmah kutchungah kan um lai. Phunghram nih a hruai hna lai maw, anmah nih dah phunghram kha an hruai lai ti cu chim cia awk a har ngaingai.

3. Aluan ciami SLORC ralkap uknak chan ah mipi sin nawlngeihnak pek thannak caah lam phun 2 an rak hman. Cu lam hna cu caan sauternak le ram riantuantu le ramrian kong a huammi hna hremnak lam an rak hman hna (Jalal Alamgir)
4. Lamkhatnak a simi nawlngeihnak peknak caan sauternak (to delay as far as possible the transfer of power) hi acunglei ah ka langhter cang bantukin a tlang piin kum 2 hrawng cu sau dawh a si nain kum zeizatdah nawlngeihnak an lak chung lai i, mipi sinah cu nawlngeihnak cu an pek than te lai ti chimcia hi a har ngaingai. Zanmang tal cu khua tal a dei. Ralkap uknak cu zeidah a lawh te lai!

5. Lamhnihnak a si mi ram riantuantu hna le ram rian kong a huammi nak hremnak (“to crush opposition political leaders to the extent that they either give up or are subdued”) kong he pehtlai in uktu pawl tam deuh cu an tlaih cang hna. A phunphun lam an hman lai i, ka palh cang tiah hramhram in ma an ti ter hna lai, ralkap hruainak tang, mipi nih ton khawh lonak ah maw, thonginn chungah ah saupi an chiah te hna lai timi kongah a fiangmi thil pakhat hmanh a um lo.

6. Political party Law le Bylaw thar an tial than kho men. An remh kho men. Party registration rak tuah uh an ti kho men nain atu lio teitu party hi party thar upadi nih lam onh lo tiang in an tuah kho. 7. Atu lio tlaih a tongmi le tlaih a tong te dingmi hna zong hi anmah nih an tuahchommi ram pumpi thimnak ah I zuam khawh lo ding in upadi hna an ser an tial kho men. 8. Hlan lio USDA chungtel ah an rak kan luhter bantuk khan atu uknak an lak chungah kha bantuk chungtel phun ah an kan luhter than kho. Atu cu anmah nih an hrinmi an party chungtel tampi an um cang an ti tikah thimnak an tuah kho men.

9. Ahman a dikmi Democracy an ti. Democracy kong a thawthnam a thei lomi nih a dik a hmanmi di mawh ka ra si lam ah an kan kal pi lai dingmi hi cu “Thli lak ah Taik inn sak” timh bantuk a si than te ko lai. 10. Uknak/ nawlngeihnak an lak tikah a tlang piin atu lio hman cuahmah a si mi phunghram bantuk hi an hrawh cio dih. Thailand ram ti bantuk zongah – Myanmar ram cu a luan cia ah an rak hrawh nain a tu tan cu an caah a tha tukmi phunghram a si tikah a poi ko. An duh caan ah anmah nih an hman, an duh caan ah phunghram nih a hman hna. Atu lio phunghram pi hi fehternak an tuah lio ah milu zat le Myanmar ram pumpi milu zat ah a rak i khah lo khah! Lih hlen fehternak an rak tuahmi! Credit: Thawng Za Pum