Ralkap nih Zeiruangah Uknak An Lak

Ralkap nih Zeiruangah Uknak An Lak
================
1). Thailand bantuk in kalpi an duh rua? A ruang cu NLD nih fak tuk in 2015 le 2020 thimnak ah teinak a hmuh. Cu tikah hmailei caah an thin a phang. 2008 phunghram nih nawlngeihnak tam tuk a pek ko hna bu ah, Kawlram ah party pakhat a tthawn tuk peng ding kha an duh ruam lo. Atu ning in cun 2025 a phak tik ah, ralkap dirhmi USDP party cu Ne Win nih a rak dirhmi NUP party bantuk ah a can te ding kha a fiang ngai cang. Cucaah uknak lak i, thimnak phunglam remh tthan hnu ah, ralkap duh lo mi nih cozah an ser khawh ti lo ding in, atu lio Thailand ram bantuk in kalpi an timhmi a lo.

Thailand ram ah Siangpahrang chung hi an nawlngeihnak a sang tuk. Thai ralkap nih an dirkamh hna. Cucaah Thai siangpahrang chung le ralkap nih duh lo mi hna nih cozah an tlaih caan paoh ah ralkap nih uknak an lak peng ve.
Atu lio Thailand ram cu siangpahrang chung le ralkap hnatlak lo mi nih cozah ser khawh a si lo tjah ti khawh a si.
A ruang cu: Thailand ram house of representative ah MP hmunhma 500 a um i, 375 hmunhma kha thimnak hmun (constituency) ah teinak a hmumi hna caah a si. Phundang in chim ahcun, thimnak hmun (constituency) pakhat ah thimfung tam bik a hmu mi kha an pek hna. Asinain a tangmi hmunhma 175 belte kha cu Party cio nih thimfung an hmuhning zoh in an phawtzamh hna. Cu tikah MP hmunhma pakhat hmanh a hmu lo mi party zong MP hmunhma zeimawzat pek ve an si, thimfung an hmuhning zoh in.

Senate ah hmunhma 250 a um i, a dihlak in Thai ralkap nih an lak dih. Ralkap nih an duhmi minung an thim hna.
House ah a ummi MP 500 le Senate ah a ummi ralkap rian pekmi MP 250; an dihlak 750 nih Prime Minister an thim.
Cucaah Thailand ram ah party pakhat fak tuk in an tthawng kho ti lo. Siangpahrang chung le ralkap duh lo mi zong nih cozah an ser kho lo.

Cu bantuk cu, atu lio Kawl ralkap bator pawl nih an duh ve mi a lo. Thimnak an tuah tthan te sual hmanh ah NLD a tthawn tuk ti lo ding in an tuah hmasa hnu lawng ah a si te lai zumh a si. Party nih thimfung an hmuhning zoh in MP hmunhma phawtzamh maw, asiloah, ralkap hmunhma karhter maw an tuah te lai zumh a um. NLD an tthawn tuk ti lo ding in an tuah hmasa hnu lawng ah thimnak an tuah tthan te ttheo lai.
A dang a ruang pakhat cu:

2). Min Aung Hlaing bator pa ruangah a si. Pension a la cang ding a si. Hmailei kong a ruat. A chungle kong a ruat. A fale kong a ruat. Pension a lak hnu an dirhmun le an si te dingmi dirhmun pawl a ruah tikah, a khuaruah a pit, a thin a phang, khuaci a mui. Royinga kong ah tazacuai a tong fawn. US nih amah pumpak sanction an tuah. Kam khat lei in le nawlngeihnak a tlaih mi kha thlah a duh ti lo. Cu tikah uknak lak dah ti lo, thim ding lam a ngei ti rua lo. Politics ah hin minung sining le nawlngeih duhnak (realpolitik) hi a biapi taktak mi pakhat a si ve. A bik in zapi nih thim lo in uktu si a duhmi pawl an sining theih duh tikah.

President si zong a duh fawn, a fiang ko. Thimnak an tuah tthan sual te hmanh ah, amah President tlin khawh nak lam a sial te lai zumh a um. Asiloah, amah duhmi President an tlin khawh nak lam tal a sial te men lai. A cunglei pawl hi Kawl ralkap bator nih uknak an laknak a ruang an si ko rua tiah ka ruah. Credit: Lian Ding Hmung