Ralkap Nih Cunglei Upa Rian Khinhmi Pu Maung Har

Breaking News: Ralkap Nih Cunglei Upa Rian Khinhmi Pu Maung Har
==================
Pu Vom Tu Maung fapa si an ti. Anih hi Bank Manager si i ramkhel kong a ruat balmi si lo, ti si. Mindat, Kanpetlet le Htilin khuasa a si. MAH nih State Admin Council (SAC) chungtel an bet chapmi ah an telhmi si. “Chin Party in U Maung Har” tiah an ti nain, party politics ah ai tel balmi si rua lo. Shan in USDP pa, Kachan in anmah Kachin party pa, Kayah in Saw Daniel timi tarpa (utlak party in), NLD in a rak chuakmi MP hlun pahnih tbk kha Council chungtel ah cun an thim hna. Ralkap 8 le civil 8 in an council cu an dirh. Pu Maung Har an thimmi reng khi Pu Van Kulh reng he khan ai khat. Pu Maung Har nihcun zei ruangah an thim ti zong ai thei tuk ve rih lo, ti si.

Ṭihnun dawh a si hih. Miding bak a si an ti. Eihmuar, ziknawh a rem lo, ti si. Tutan ralkap nih an itinhmi hi NLD dinlonak kawl zong cu ai tel tikah. Zeidah lawh te lai? Hlai vek hna seh! NLD min in a rak lor tukmi eihmuar ziknawh pawl kha a hlai dih hna cun, thil ṭha pakhat si ve ko cu.

Relchap, Ralkap sin i rawl nuar, Nu le pa sin i rawl nuar khi cu nuar hmang pawl nih a nuam tuk, an ti. An van hnemh hna i, van hnemhnak feeling te khi a nuam an tinak cu si rua. Ruruhranghrang minung thinlung khom ngeilo ralkap sin rawl nuar teh, zeidah lawh hnga? Tu lio ram chung i “Civil Disobedience” an timi khi “rawl nuar” phun cu si ko cu. “Pa ei cu kan in duh bak lo. Na rawl pekmi ei zong kan duh lo,” ti phun si ko, kan hei ti ko hnga ta.
Rawl nuar pawl cu a hneem te hna hnga maw? Teraap pawl cu mi hnemh an hmang rua loh. A nuar phunphai paoh, na duh le ei, na duh lo le ei hlah. Na ai ah midang kan rolhter lai ti phun an si.

Cucaah thiamnak a ngei tuk leem lo zong Kawlram University kip le department kip ah lutlai ah an rak chiah pet hna. Minung an nawnnok vek salam. An sentari cong hring deldul, a sen hmai-hup meithal sau pipi ai tlaihmi pawl he biaknaklei lutlai pawl sin kip ah an va leen hna. Meithal tang ah daihnak an va ser. Khin Nyunt hna nihkhan MBC GC bak a rak leen ti si ko. A sullam cu, “kan bia ngai uh. Buaibainak tuah hlah uh” ti khi si lai dah. Bible hna an itlaihter thulh ve. Khin Nyunt nih John 3:16 a rak rel ti si. “Halleluijah le Amen!” a rak petu zong cu an rak um thotho.

2020 thimnak lio i Rev le vei pawl kha MAH caah thla an cam te kho ngaimi si. Tuyekaung buaih hna dawh an rak pek ko kha mu! Cuti cun, rilte pehnak caah rawl ei hau. Rawl nuar cu mah sunghnak an ti lai i sau nguh te lai lo.
A caan lio, a pawt saling ah tuah ve lo cu, ti bel ah cun, hei tuah ve awk cu si ko hmeteh. Nain, rawl nuar cu mah sunghnak men a si ti an hmuh te lai. 1990 lio ah NLD nih thimnak result kan cohlanpiak uh tiah an rak ichang peng. Cu an rak ichaan ruangah Kawlram cu teraap kuttang ah chan khat bakte rak luh a si.

2021 ah Pi Suu nih mipi au uh a ti. Min Ko Naing nih kan au lai, kan khuang lai a ti. Dr Myo Nyunt pakhat lawng nih au hlah uh, khuang hlah uh, daihnak in a lam kawl kan izuam lai a rak titu si. Pi Suu le Min Ko Naing zong cu an tactic ileet dawh an si. An ileet nain, rawl nuar cu tha an pek thotho. “2020 thimnak result an cohlan lo cun si kho lo. Mipi zei an rel lo bia a si” an ti hna. An dik lo si lo. An dik tuk ta. Ralkap nih Phunghram an buar an ti hna. Ralkap nih Pi Suu te lei bia cu an zul hna lai maw? Nemmam. Thimnak a diklo an ti ruangah uknak la na lakah, 2020 thimnak result cu an cohlang ti lai lo. A dih cang. Hi zawn i NLD an lung khon peng ahcun, Kawlram mi vialte caah chan khat kan sung rih lai.

1988 liote in Pi Suu nih aa rak ipalh lengmangnak a si. Mipi nih ralkap uknak taang sau tuk kan um tikah, a fim hnga dingmi, mino vialte kan sung dih. Chan khat lawng si loin, chan hnih chan thum tluk Kawlram cu a tlau lengmang. Tutan zong hi 2020 thimnak result kha cohlang ko uh an ti peng cun, chan khat rau hoi te lai. Sahrang nih uknak a lak cang hnu cun rul bantuk in fim le zerthiam a herh. Kum 1 a tlin bakah ralkap nih thimnak an tuah nakhnga, NLD an fiim a herh ngai. UN le Democracy ram cozah ngan deuh pawl isawm in ralkap nih tu hnu kum 1 chungah thimnak a tuah hrimhrim nak ding lam tu kawl a herh. Rawl nuar huam nih nuar thluahmah ding. A au huam nih au ding. Nain, nan baa lam. Sahrang cu Khrihfa nihcun thlacamnak in kan tei khawh ding lawng a taang ko cang. Credit: Salai C ALexander